Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂-၆. ဒုတိယာဒိပာစီနနိန္နသုတ္တပဉ္စကံ
2-6. Dutiyādipācīnaninnasuttapañcakaṃ
၁၂၈-၁၃၂. ‘‘သေယ္ယထာပိ , ဘိက္ခဝေ, ယမုနာ နဒီ ပာစီနနိန္နာ ပာစီနပောဏာ ပာစီနပဗ္ဘာရာ; ဧဝမေဝ ခော, ဘိက္ခဝေ, ဘိက္ခု။ပေ.။ သေယ္ယထာပိ, ဘိက္ခဝေ, အစိရဝတီ နဒီ ပာစီနနိန္နာ ပာစီနပောဏာ ပာစီနပဗ္ဘာရာ; ဧဝမေဝ ခော, ဘိက္ခဝေ, ဘိက္ခု။ပေ.။ သေယ္ယထာပိ, ဘိက္ခဝေ, သရဘူ နဒီ ပာစီနနိန္နာ ပာစီနပောဏာ ပာစီနပဗ္ဘာရာ; ဧဝမေဝ ခော, ဘိက္ခဝေ, ဘိက္ခု။ပေ.။ သေယ္ယထာပိ, ဘိက္ခဝေ, မဟီ နဒီ ပာစီနနိန္နာ ပာစီနပောဏာ ပာစီနပဗ္ဘာရာ; ဧဝမေဝ ခော, ဘိက္ခဝေ, ဘိက္ခု။ပေ.။ သေယ္ယထာပိ, ဘိက္ခဝေ, ယာ ကာစိမာ မဟာနဒိယော, သေယ္ယထိဒံ – ဂင္ဂာ, ယမုနာ, အစိရဝတီ, သရဘူ, မဟီ, သဗ္ဗာ တာ ပာစီနနိန္နာ ပာစီနပောဏာ ပာစီနပဗ္ဘာရာ; ဧဝမေဝ ခော, ဘိက္ခဝေ, ဘိက္ခု အရိယံ အဋ္ဌင္ဂိကံ မဂ္ဂံ ဘာဝေန္တော အရိယံ အဋ္ဌင္ဂိကံ မဂ္ဂံ ဗဟုလီကရောန္တော နိဗ္ဗာနနိန္နော ဟောတိ နိဗ္ဗာနပောဏော နိဗ္ဗာနပဗ္ဘာရော။ ကထဉ္စ, ဘိက္ခဝေ, ဘိက္ခု အရိယံ အဋ္ဌင္ဂိကံ မဂ္ဂံ ဘာဝေန္တော အရိယံ အဋ္ဌင္ဂိကံ မဂ္ဂံ ဗဟုလီကရောန္တော နိဗ္ဗာနနိန္နော ဟောတိ နိဗ္ဗာနပောဏော နိဗ္ဗာနပဗ္ဘာရော? ဣဓ, ဘိက္ခဝေ, ဘိက္ခု သမ္မာဒိဋ္ဌိံ ဘာဝေတိ နိဗ္ဗာနနိန္နံ နိဗ္ဗာနပောဏံ နိဗ္ဗာနပဗ္ဘာရံ။ပေ.။ သမ္မာသမာဓိံ ဘာဝေတိ နိဗ္ဗာနနိန္နံ နိဗ္ဗာနပောဏံ နိဗ္ဗာနပဗ္ဘာရံ။ ဧဝံ ခော, ဘိက္ခဝေ, ဘိက္ခု အရိယံ အဋ္ဌင္ဂိကံ မဂ္ဂံ ဘာဝေန္တော အရိယံ အဋ္ဌင္ဂိကံ မဂ္ဂံ ဗဟုလီကရောန္တော နိဗ္ဗာနနိန္နော ဟောတိ နိဗ္ဗာနပောဏော နိဗ္ဗာနပဗ္ဘာရော’’တိ။ ဆဋ္ဌံ။
128-132. ‘‘Seyyathāpi , bhikkhave, yamunā nadī pācīnaninnā pācīnapoṇā pācīnapabbhārā; evameva kho, bhikkhave, bhikkhu…pe… seyyathāpi, bhikkhave, aciravatī nadī pācīnaninnā pācīnapoṇā pācīnapabbhārā; evameva kho, bhikkhave, bhikkhu…pe… seyyathāpi, bhikkhave, sarabhū nadī pācīnaninnā pācīnapoṇā pācīnapabbhārā; evameva kho, bhikkhave, bhikkhu…pe… seyyathāpi, bhikkhave, mahī nadī pācīnaninnā pācīnapoṇā pācīnapabbhārā; evameva kho, bhikkhave, bhikkhu…pe… seyyathāpi, bhikkhave, yā kācimā mahānadiyo, seyyathidaṃ – gaṅgā, yamunā, aciravatī, sarabhū, mahī, sabbā tā pācīnaninnā pācīnapoṇā pācīnapabbhārā; evameva kho, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto nibbānaninno hoti nibbānapoṇo nibbānapabbhāro. Kathañca, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto nibbānaninno hoti nibbānapoṇo nibbānapabbhāro? Idha, bhikkhave, bhikkhu sammādiṭṭhiṃ bhāveti nibbānaninnaṃ nibbānapoṇaṃ nibbānapabbhāraṃ…pe… sammāsamādhiṃ bhāveti nibbānaninnaṃ nibbānapoṇaṃ nibbānapabbhāraṃ. Evaṃ kho, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto nibbānaninno hoti nibbānapoṇo nibbānapabbhāro’’ti. Chaṭṭhaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. ဧကဓမ္မပေယ္ယာလဝဂ္ဂာဒိဝဏ္ဏနာ • 7. Ekadhammapeyyālavaggādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. ဧကဓမ္မပေယ္ယာလဝဂ္ဂာဒိဝဏ္ဏနာ • 7. Ekadhammapeyyālavaggādivaṇṇanā