| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
10. සළවග්‌ගො
10. Saḷavaggo
1. අදන්‌තඅගුත්‌තවණ්‌ණනා
1. Adantaaguttavaṇṇanā
94. සළවග්‌ගස්‌ස පඨමෙ අදන්‌තාති අදමිතා. අගුත්‌තාති අගොපිතා. අරක්‌ඛිතාති න රක්‌ඛිතා. අසංවුතාති අපිහිතා. දුක්‌ඛාධිවාහා හොන්‌තීති නෙරයිකාදිභෙදං අධිකදුක්‌ඛං ආවහනකා හොන්‌ති. සුඛාධිවාහා හොන්‌තීති ඣානමග්‌ගඵලපභෙදං අධිකසුඛං ආවහනකා හොන්‌ති. අධිවහාතිපි පාඨො, එසෙවත්‌ථො.
94. Saḷavaggassa paṭhame adantāti adamitā. Aguttāti agopitā. Arakkhitāti na rakkhitā. Asaṃvutāti apihitā. Dukkhādhivāhā hontīti nerayikādibhedaṃ adhikadukkhaṃ āvahanakā honti. Sukhādhivāhā hontīti jhānamaggaphalapabhedaṃ adhikasukhaṃ āvahanakā honti. Adhivahātipi pāṭho, esevattho.
සළෙවාති ඡ එව. අසංවුතො යත්‌ථ දුක්‌ඛං නිගච්‌ඡතීති යෙසු ආයතනෙසු සංවරවිරහිතො දුක්‌ඛං පාපුණාති. තෙසඤ්‌ච යෙ සංවරණං අවෙදිසුන්‌ති යෙ තෙසං ආයතනානං සංවරං වින්‌දිංසු පටිලභිංසු. විහරන්‌තානවස්‌සුතාති විහරන්‌ති අනවස්‌සුතා අතින්‌තා.
Saḷevāti cha eva. Asaṃvuto yattha dukkhaṃ nigacchatīti yesu āyatanesu saṃvaravirahito dukkhaṃ pāpuṇāti. Tesañca ye saṃvaraṇaṃ avedisunti ye tesaṃ āyatanānaṃ saṃvaraṃ vindiṃsu paṭilabhiṃsu. Viharantānavassutāti viharanti anavassutā atintā.
අසාදිතඤ්‌ච සාදුන්‌ති අස්‌සාදවන්‌තඤ්‌ච මධුරඤ්‌ච. ඵස්‌සද්‌වයං සුඛදුක්‌ඛෙ උපෙක්‌ඛෙති සුඛඵස්‌සඤ්‌ච දුක්‌ඛඵස්‌සඤ්‌චාති ඉදං ඵස්‌සද්‌වයං උපෙක්‌ඛෙ, උපෙක්‌ඛාමෙවෙත්‌ථ උප්‌පාදෙය්‍යාති අත්‌ථො. ඵස්‌සද්‌වයං සුඛදුක්‌ඛං උපෙක්‌ඛොති වා පාඨො, ඵස්‌සහෙතුකං සුඛදුක්‌ඛං උපෙක්‌ඛො, සුඛෙ අනුරොධං දුක්‌ඛෙ ච විරොධං අනුප්‌පාදෙන්‌තො උපෙක්‌ඛකො භවෙය්‍යාතිපි අත්‌ථො. අනානුරුද්‌ධො අවිරුද්‌ධො කෙනචීති කෙනචි සද්‌ධිං නෙව අනුරුද්‌ධො න විරුද්‌ධො භවෙය්‍ය.
Asāditañca sādunti assādavantañca madhurañca. Phassadvayaṃ sukhadukkhe upekkheti sukhaphassañca dukkhaphassañcāti idaṃ phassadvayaṃ upekkhe, upekkhāmevettha uppādeyyāti attho. Phassadvayaṃ sukhadukkhaṃ upekkhoti vā pāṭho, phassahetukaṃ sukhadukkhaṃ upekkho, sukhe anurodhaṃ dukkhe ca virodhaṃ anuppādento upekkhako bhaveyyātipi attho. Anānuruddhoaviruddho kenacīti kenaci saddhiṃ neva anuruddho na viruddho bhaveyya.
පපඤ්‌චසඤ්‌ඤාති කිලෙසසඤ්‌ඤාය පපඤ්‌චසඤ්‌ඤා නාම හුත්‌වා. ඉතරීතරා නරාති ලාමකසත්‌තා පපඤ්‌චයන්‌තා උපයන්‌තීති පපඤ්‌චයමානා වට්‌ටං උපගච්‌ඡන්‌ති. සඤ්‌ඤිනොති සසඤ්‌ඤා සත්‌තා. මනොමයං ගෙහසිතඤ්‌ච සබ්‌බන්‌ති සබ්‌බමෙව පඤ්‌චකාමගුණගෙහනිස්‌සිතං මනොමයං විතක්‌කං. පනුජ්‌ජාති පනුදිත්‌වා නීහරිත්‌වා. නෙක්‌ඛම්‌මසිතං ඉරීයතීති දබ්‌බජාතිකො භික්‌ඛු නෙක්‌ඛම්‌මසිතං ඉරියෙන ඉරීයති.
Papañcasaññāti kilesasaññāya papañcasaññā nāma hutvā. Itarītarā narāti lāmakasattā papañcayantā upayantīti papañcayamānā vaṭṭaṃ upagacchanti. Saññinoti sasaññā sattā. Manomayaṃ gehasitañca sabbanti sabbameva pañcakāmaguṇagehanissitaṃ manomayaṃ vitakkaṃ. Panujjāti panuditvā nīharitvā. Nekkhammasitaṃ irīyatīti dabbajātiko bhikkhu nekkhammasitaṃ iriyena irīyati.
ඡස්‌සු යදා සුභාවිතොති ඡසු ආරම්‌මණෙසු යදා සුට්‌ඨු භාවිතො. ඵුට්‌ඨස්‌ස චිත්‌තං න විකම්‌පතෙ ක්‌වචීති සුඛඵස්‌සෙන වා දුක්‌ඛඵස්‌සෙන වා ඵුට්‌ඨස්‌ස කිස්‌මිඤ්‌චි චිත්‌තං න කම්‌පති න වෙධති. භවත්‌ථ ජාතිමරණස්‌ස පාරගාති ජාතිමරණානං පාරං නිබ්‌බානං ගමකා හොථ.
Chassu yadāsubhāvitoti chasu ārammaṇesu yadā suṭṭhu bhāvito. Phuṭṭhassa cittaṃ na vikampatekvacīti sukhaphassena vā dukkhaphassena vā phuṭṭhassa kismiñci cittaṃ na kampati na vedhati. Bhavattha jātimaraṇassa pāragāti jātimaraṇānaṃ pāraṃ nibbānaṃ gamakā hotha.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 1. අදන්‌තඅගුත්‌තසුත්‌තං • 1. Adantaaguttasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. අදන්‌තඅගුත්‌තසුත්‌තවණ්‌ණනා • 1. Adantaaguttasuttavaṇṇanā
