| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
10. ආධිපතෙය්‍යසුත්‌තවණ්‌ණනා
10. Ādhipateyyasuttavaṇṇanā
40. දසමෙ අභිභවිත්‌වා පවත්‌තනට්‌ඨෙන අධිපති යං කිඤ්‌චි ජෙට්‌ඨකං න කාරකං අත්‌තානං අධිපතීති කත්‌වා අත්‌තා එව අධිපති, තතො ආගතං අත්‌තාධිපතෙය්‍යං. තෙනාහ ‘‘අත්‌තාන’’න්‌තිආදි. ලොකන්‌ති සත්‌තලොකං. සො ච ඛො ඉද්‌ධිවිධාදිගුණවිසෙසයුත්‌තො අධිප්‌පෙතො අධිපතිභාවස්‌ස අධිප්‌පෙතත්‌තා. නවවිධං ලොකුත්‌තරධම්‌මන්‌ති උක්‌කට්‌ඨනිද්‌දෙසෙන වුත්‌තං. ඉති භවොති එවං සම්‌පත්‌තිභවො, තත්‌ථ එවං අභිවුද්‌ධීති. සම්‌පත්‌තිභවස්‌ස හෙතූති තංතංසම්‌පත්‌තිභවස්‌ස තත්‌ථ ච අභිවුද්‌ධියා හෙතු. ජාතිනිමිත්‌තස්‌ස කම්‌මභවස්‌ස කතූපචිතත්‌තා ජාති අන්‌තොපවිට්‌ඨා. ජරාදීසුපි එසෙව නයො හෙතුසිද්‌ධියා ඵලසිද්‌ධිතො.
40. Dasame abhibhavitvā pavattanaṭṭhena adhipati yaṃ kiñci jeṭṭhakaṃ na kārakaṃ attānaṃ adhipatīti katvā attā eva adhipati, tato āgataṃ attādhipateyyaṃ. Tenāha ‘‘attāna’’ntiādi. Lokanti sattalokaṃ. So ca kho iddhividhādiguṇavisesayutto adhippeto adhipatibhāvassa adhippetattā. Navavidhaṃ lokuttaradhammanti ukkaṭṭhaniddesena vuttaṃ. Iti bhavoti evaṃ sampattibhavo, tattha evaṃ abhivuddhīti. Sampattibhavassa hetūti taṃtaṃsampattibhavassa tattha ca abhivuddhiyā hetu. Jātinimittassa kammabhavassa katūpacitattā jāti antopaviṭṭhā. Jarādīsupi eseva nayo hetusiddhiyā phalasiddhito.
අසල්‌ලීනන්‌ති න සඞ්‌කොචප්‌පත්‌තං. උපට්‌ඨිතාති කායාදිසභාවසල්‌ලක්‌ඛණවසෙන උපට්‌ඨිතා. අසම්‌මුට්‌ඨා සම්‌මොසාභාවතො. අසාරද්‌ධොති සාරම්‌භස්‌ස සාරම්‌භහෙතූනඤ්‌ච වික්‌ඛම්‌භනෙන අසාරද්‌ධො. එකග්‌ගං අනෙකග්‌ගභාවස්‌ස දූරසමුස්‌සාපිතත්‌තා. නිම්‌මලං කත්‌වාති රාගාදිමලානං අපනයනෙන මලරහිතං කත්‌වා. ගොපායතීති සංකිලෙසානත්‌ථතො රක්‌ඛති. අයන්‌ති එවංපටිපන්‌නො භික්‌ඛු. සුද්‌ධමත්‌තානං පරිහරති අසුද්‌ධභාවස්‌ස කිලෙසස්‌සපි අභාවතො.
Asallīnanti na saṅkocappattaṃ. Upaṭṭhitāti kāyādisabhāvasallakkhaṇavasena upaṭṭhitā. Asammuṭṭhā sammosābhāvato. Asāraddhoti sārambhassa sārambhahetūnañca vikkhambhanena asāraddho. Ekaggaṃ anekaggabhāvassa dūrasamussāpitattā. Nimmalaṃ katvāti rāgādimalānaṃ apanayanena malarahitaṃ katvā. Gopāyatīti saṃkilesānatthato rakkhati. Ayanti evaṃpaṭipanno bhikkhu. Suddhamattānaṃ pariharati asuddhabhāvassa kilesassapi abhāvato.
අතික්‌කමිත්‌වා මඤ්‌ඤසීති අසක්‌ඛිං කත්‌වා මඤ්‌ඤසි. තාය තණ්‌හාය නිබ්‌බත්‌තොති තම්‌මයො, තණ්‌හාවසිකො. තස්‌ස භාවො තම්‌මයතා, තස්‌සා තම්‌මයතාය අභාවෙන. න හායති පඤ්‌ඤාදිගුණවෙපුල්‌ලප්‌පත්‌තියා.
Atikkamitvāmaññasīti asakkhiṃ katvā maññasi. Tāya taṇhāya nibbattoti tammayo, taṇhāvasiko. Tassa bhāvo tammayatā, tassā tammayatāya abhāvena. Na hāyati paññādiguṇavepullappattiyā.
ආධිපතෙය්‍යසුත්‌තවණ්‌ණනා නිට්‌ඨිතා.
Ādhipateyyasuttavaṇṇanā niṭṭhitā.
දෙවදූතවග්‌ගවණ්‌ණනා නිට්‌ඨිතා.
Devadūtavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. ආධිපතෙය්‍යසුත්‌තං • 10. Ādhipateyyasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 10. ආධිපතෙය්‍යසුත්‌තවණ්‌ණනා • 10. Ādhipateyyasuttavaṇṇanā
