Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. အာဒိတ္တဝဂ္ဂော
5. Ādittavaggo
၁. အာဒိတ္တသုတ္တံ
1. Ādittasuttaṃ
၄၁. ဧဝံ မေ သုတံ – ဧကံ သမယံ ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ အထ ခော အညတရာ ဒေဝတာ အဘိက္ကန္တာယ ရတ္တိယာ အဘိက္ကန္တဝဏ္ဏာ ကေဝလကပ္ပံ ဇေတဝနံ ဩဘာသေတ္ဝာ ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ အဋ္ဌာသိ။ ဧကမန္တံ ဌိတာ ခော သာ ဒေဝတာ ဘဂဝတော သန္တိကေ ဣမာ ဂာထာယော အဘာသိ –
41. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavato santike imā gāthāyo abhāsi –
‘‘အာဒိတ္တသ္မိံ အဂာရသ္မိံ၊ ယံ နီဟရတိ ဘာဇနံ။
‘‘Ādittasmiṃ agārasmiṃ, yaṃ nīharati bhājanaṃ;
တံ တသ္သ ဟောတိ အတ္ထာယ၊ နော စ ယံ တတ္ထ ဍယ္ဟတိ။
Taṃ tassa hoti atthāya, no ca yaṃ tattha ḍayhati.
‘‘ဧဝံ အာဒိတ္တကော လောကော၊ ဇရာယ မရဏေန စ။
‘‘Evaṃ ādittako loko, jarāya maraṇena ca;
နီဟရေထေဝ ဒာနေန၊ ဒိန္နံ ဟောတိ သုနီဟတံ။
Nīharetheva dānena, dinnaṃ hoti sunīhataṃ.
‘‘ဒိန္နံ သုခဖလံ ဟောတိ၊ နာဒိန္နံ ဟောတိ တံ တထာ။
‘‘Dinnaṃ sukhaphalaṃ hoti, nādinnaṃ hoti taṃ tathā;
စောရာ ဟရန္တိ ရာဇာနော၊ အဂ္ဂိ ဍဟတိ နသ္သတိ။
Corā haranti rājāno, aggi ḍahati nassati.
‘‘အထ အန္တေန ဇဟတိ၊ သရီရံ သပရိဂ္ဂဟံ။
‘‘Atha antena jahati, sarīraṃ sapariggahaṃ;
ဧတဒညာယ မေဓာဝီ၊ ဘုဉ္ဇေထ စ ဒဒေထ စ။
Etadaññāya medhāvī, bhuñjetha ca dadetha ca;
ဒတ္ဝာ စ ဘုတ္ဝာ စ ယထာနုဘာဝံ။
Datvā ca bhutvā ca yathānubhāvaṃ;
အနိန္ဒိတော သဂ္ဂမုပေတိ ဌာန’’န္တိ။
Anindito saggamupeti ṭhāna’’nti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. အာဒိတ္တသုတ္တဝဏ္ဏနာ • 1. Ādittasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. အာဒိတ္တသုတ္တဝဏ္ဏနာ • 1. Ādittasuttavaṇṇanā