| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၀. အာနန္ဒသုတ္တံ
10. Ānandasuttaṃ
၂၁. သာဝတ္ထိယံ ။ အာရာမေ။ အထ ခော အာယသ္မာ အာနန္ဒော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော အာယသ္မာ အာနန္ဒော ဘဂဝန္တံ ဧတဒဝောစ – ‘‘‘နိရောဓော နိရောဓော’တိ, ဘန္တေ, ဝုစ္စတိ။ ကတမေသာနံ ခော, ဘန္တေ, ဓမ္မာနံ နိရောဓော 1 ‘နိရောဓော’တိ ဝုစ္စတီ’’တိ? ‘‘ရူပံ ခော, အာနန္ဒ, အနိစ္စံ သင္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ။ တသ္သ နိရောဓော 2 ‘နိရောဓော’တိ ဝုစ္စတိ။ ဝေဒနာ အနိစ္စာ သင္ခတာ ပဋိစ္စသမုပ္ပန္နာ ခယဓမ္မာ ဝယဓမ္မာ ဝိရာဂဓမ္မာ နိရောဓဓမ္မာ။ တသ္သာ နိရောဓော ‘နိရောဓော’တိ ဝုစ္စတိ။ သညာ။ သင္ခာရာ အနိစ္စာ သင္ခတာ ပဋိစ္စသမုပ္ပန္နာ ခယဓမ္မာ ဝယဓမ္မာ ဝိရာဂဓမ္မာ နိရောဓဓမ္မာ။ တေသံ နိရောဓော ‘နိရောဓော’တိ ဝုစ္စတိ။ ဝိညာဏံ အနိစ္စံ သင္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ။ တသ္သ နိရောဓော ‘နိရောဓော’တိ ဝုစ္စတိ။ ဣမေသံ ခော, အာနန္ဒ, ဓမ္မာနံ နိရောဓော ‘နိရောဓော’တိ ဝုစ္စတီ’’တိ။ ဒသမံ။
21. Sāvatthiyaṃ … ārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘‘nirodho nirodho’ti, bhante, vuccati. Katamesānaṃ kho, bhante, dhammānaṃ nirodho 3 ‘nirodho’ti vuccatī’’ti? ‘‘Rūpaṃ kho, ānanda, aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ. Tassa nirodho 4 ‘nirodho’ti vuccati. Vedanā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tassā nirodho ‘nirodho’ti vuccati. Saññā… saṅkhārā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tesaṃ nirodho ‘nirodho’ti vuccati. Viññāṇaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ. Tassa nirodho ‘nirodho’ti vuccati. Imesaṃ kho, ānanda, dhammānaṃ nirodho ‘nirodho’ti vuccatī’’ti. Dasamaṃ.
အနိစ္စဝဂ္ဂော ဒုတိယော။
Aniccavaggo dutiyo.
တသ္သုဒ္ဒာနံ –
Tassuddānaṃ –
အနိစ္စံ ဒုက္ခံ အနတ္တာ၊ ယဒနိစ္စာပရေ တယော။
Aniccaṃ dukkhaṃ anattā, yadaniccāpare tayo;
ဟေတုနာပိ တယော ဝုတ္တာ၊ အာနန္ဒေန စ တေ ဒသာတိ။
Hetunāpi tayo vuttā, ānandena ca te dasāti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁-၁၀. အနိစ္စသုတ္တာဒိဝဏ္ဏနာ • 1-10. Aniccasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁-၁၀. အနိစ္စာဒိသုတ္တဝဏ္ဏနာ • 1-10. Aniccādisuttavaṇṇanā
