| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. အာနန္ဒသုတ္တံ
5. Ānandasuttaṃ
၃၇. သာဝတ္ထိနိဒာနံ။ အထ ခော အာယသ္မာ အာနန္ဒော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝတာ သဒ္ဓိံ သမ္မောဒိ။ သမ္မောဒနီယံ ကထံ သာရဏီယံ ဝီတိသာရေတ္ဝာ ဧကမန္တံ နိသီဒိ။ ဧကမန္တံ နိသိန္နံ ခော အာယသ္မန္တံ အာနန္ဒံ ဘဂဝာ ဧတဒဝောစ –
37. Sāvatthinidānaṃ. Atha kho āyasmā ānando yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca –
‘‘သစေ တံ, အာနန္ဒ, ဧဝံ ပုစ္ဆေယ္ယုံ – ‘ကတမေသံ, အာဝုသော အာနန္ဒ, ဓမ္မာနံ ဥပ္ပာဒော ပညာယတိ, ဝယော ပညာယတိ, ဌိတသ္သ 1 အညထတ္တံ ပညာယတီ’တိ? ဧဝံ ပုဋ္ဌော တ္ဝံ, အာနန္ဒ, ကိန္တိ ဗ္ယာကရေယ္ယာသီ’’တိ? ‘‘သစေ မံ, ဘန္တေ, ဧဝံ ပုစ္ဆေယ္ယုံ – ‘ကတမေသံ, အာဝုသော အာနန္ဒ, ဓမ္မာနံ ဥပ္ပာဒော ပညာယတိ, ဝယော ပညာယတိ, ဌိတသ္သ အညထတ္တံ ပညာယတီ’တိ? ဧဝံ ပုဋ္ဌောဟံ, ဘန္တေ, ဧဝံ ဗ္ယာကရေယ္ယံ – ‘ရူပသ္သ ခော, အာဝုသော, ဥပ္ပာဒော ပညာယတိ, ဝယော ပညာယတိ, ဌိတသ္သ အညထတ္တံ ပညာယတိ။ ဝေဒနာယ။ သညာယ။ သင္ခာရာနံ။ ဝိညာဏသ္သ ဥပ္ပာဒော ပညာယတိ, ဝယော ပညာယတိ, ဌိတသ္သ အညထတ္တံ ပညာယတိ။ ဣမေသံ ခော, အာဝုသော, ဓမ္မာနံ ဥပ္ပာဒော ပညာယတိ, ဝယော ပညာယတိ, ဌိတသ္သ အညထတ္တံ ပညာယတီ’တိ။ ဧဝံ ပုဋ္ဌောဟံ, ဘန္တေ, ဧဝံ ဗ္ယာကရေယ္ယ’’န္တိ။
‘‘Sace taṃ, ānanda, evaṃ puccheyyuṃ – ‘katamesaṃ, āvuso ānanda, dhammānaṃ uppādo paññāyati, vayo paññāyati, ṭhitassa 2 aññathattaṃ paññāyatī’ti? Evaṃ puṭṭho tvaṃ, ānanda, kinti byākareyyāsī’’ti? ‘‘Sace maṃ, bhante, evaṃ puccheyyuṃ – ‘katamesaṃ, āvuso ānanda, dhammānaṃ uppādo paññāyati, vayo paññāyati, ṭhitassa aññathattaṃ paññāyatī’ti? Evaṃ puṭṭhohaṃ, bhante, evaṃ byākareyyaṃ – ‘rūpassa kho, āvuso, uppādo paññāyati, vayo paññāyati, ṭhitassa aññathattaṃ paññāyati. Vedanāya… saññāya… saṅkhārānaṃ… viññāṇassa uppādo paññāyati, vayo paññāyati, ṭhitassa aññathattaṃ paññāyati. Imesaṃ kho, āvuso, dhammānaṃ uppādo paññāyati, vayo paññāyati, ṭhitassa aññathattaṃ paññāyatī’ti. Evaṃ puṭṭhohaṃ, bhante, evaṃ byākareyya’’nti.
‘‘သာဓု သာဓု, အာနန္ဒ! ရူပသ္သ ခော, အာနန္ဒ, ဥပ္ပာဒော ပညာယတိ, ဝယော ပညာယတိ, ဌိတသ္သ အညထတ္တံ ပညာယတိ။ ဝေဒနာယ။ သညာယ။ သင္ခာရာနံ။ ဝိညာဏသ္သ ဥပ္ပာဒော ပညာယတိ, ဝယော ပညာယတိ, ဌိတသ္သ အညထတ္တံ ပညာယတိ။ ဣမေသံ ခော, အာနန္ဒ, ဓမ္မာနံ ဥပ္ပာဒော ပညာယတိ, ဝယော ပညာယတိ, ဌိတသ္သ အညထတ္တံ ပညာယတီတိ။ ဧဝံ ပုဋ္ဌော တ္ဝံ, အာနန္ဒ, ဧဝံ ဗ္ယာကရေယ္ယာသီ’’တိ။ ပဉ္စမံ။
‘‘Sādhu sādhu, ānanda! Rūpassa kho, ānanda, uppādo paññāyati, vayo paññāyati, ṭhitassa aññathattaṃ paññāyati. Vedanāya… saññāya… saṅkhārānaṃ… viññāṇassa uppādo paññāyati, vayo paññāyati, ṭhitassa aññathattaṃ paññāyati. Imesaṃ kho, ānanda, dhammānaṃ uppādo paññāyati, vayo paññāyati, ṭhitassa aññathattaṃ paññāyatīti. Evaṃ puṭṭho tvaṃ, ānanda, evaṃ byākareyyāsī’’ti. Pañcamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅-၆. အာနန္ဒသုတ္တာဒိဝဏ္ဏနာ • 5-6. Ānandasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅-၆. အာနန္ဒသုတ္တာဒိဝဏ္ဏနာ • 5-6. Ānandasuttādivaṇṇanā
