| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၃. အန္ဓကဝိန္ဒသုတ္တဝဏ္ဏနာ
3. Andhakavindasuttavaṇṇanā
၁၈၄. တတိယေ အန္ဓကဝိန္ဒန္တိ ဧဝံနာမကံ ဂာမံ။ ဥပသင္ကမီတိ ‘‘သတ္ထာ ဣဒာနိပိ ဝီရိယံ ကရောတိ ပဓာနမနုယုဉ္ဇတိ, ဂစ္ဆာမိသ္သ သန္တိကေ ဌတ္ဝာ သာသနာနုစ္ဆဝိကံ ဝီရိယပဋိသံယုတ္တံ ဂာထံ ဝက္ခာမီ’’တိ ဥပသင္ကမိ။
184. Tatiye andhakavindanti evaṃnāmakaṃ gāmaṃ. Upasaṅkamīti ‘‘satthā idānipi vīriyaṃ karoti padhānamanuyuñjati, gacchāmissa santike ṭhatvā sāsanānucchavikaṃ vīriyapaṭisaṃyuttaṃ gāthaṃ vakkhāmī’’ti upasaṅkami.
ပန္တာနီတိ ဇနတံ အတိက္ကမိတ္ဝာ မနုသ္သာနံ အနုပစာရေ ဌိတာနိ။ သံယောဇနဝိပ္ပမောက္ခာတိ တာနိ စ သေနာသနာနိ သေဝမာနော န စီဝရာဒီနံ အတ္ထာယ သေဝေယ္ယ, အထ ခော ဒသသံယောဇနဝိပ္ပမောက္ခတ္ထာယ စရေယ္ယ။ သင္ဃေ ဝသေတိ တေသု သေနာသနေသု ရတိံ အလဘန္တော ဥပဋ္ဌာကာဒီနံ စိတ္တာနုရက္ခဏတ္ထံ ဂဒ္ရဘပိဋ္ဌေ ရဇံ ဝိယ ဥပ္ပတန္တော အရညေ အစရိတ္ဝာ သင္ဃမဇ္ဈေ ဝသေယ္ယ။ ရက္ခိတတ္တော သတီမာတိ တတ္ထ စ ဝသန္တော သဂဝစဏ္ဍော ဂောဏော ဝိယ သဗ္ရဟ္မစာရိနော အဝိဇ္ဈန္တော အဃဋ္ဋေန္တော ရက္ခိတတ္တော သတိပဋ္ဌာနပရာယဏော ဟုတ္ဝာ ဝသေယ္ယ။
Pantānīti janataṃ atikkamitvā manussānaṃ anupacāre ṭhitāni. Saṃyojanavippamokkhāti tāni ca senāsanāni sevamāno na cīvarādīnaṃ atthāya seveyya, atha kho dasasaṃyojanavippamokkhatthāya careyya. Saṅghe vaseti tesu senāsanesu ratiṃ alabhanto upaṭṭhākādīnaṃ cittānurakkhaṇatthaṃ gadrabhapiṭṭhe rajaṃ viya uppatanto araññe acaritvā saṅghamajjhe vaseyya. Rakkhitatto satīmāti tattha ca vasanto sagavacaṇḍo goṇo viya sabrahmacārino avijjhanto aghaṭṭento rakkhitatto satipaṭṭhānaparāyaṇo hutvā vaseyya.
ဣဒာနိ သင္ဃေ ဝသမာနသ္သ ဘိက္ခုနော ဘိက္ခာစာရဝတ္တံ အာစိက္ခန္တော ကုလာကုလန္တိအာဒိမာဟ။ တတ္ထ ပိဏ္ဍိကာယ စရန္တောတိ ပိဏ္ဍတ္ထာယ စရမာနော။ သေဝေထ ပန္တာနိ သေနာသနာနီတိ သင္ဃမဇ္ဈံ ဩတရိတ္ဝာ ဝသမာနောပိ ဓုရပရိဝေဏေ တာလနာဠိကေရအာဒီနိ ရောပေတ္ဝာ ဥပဋ္ဌာကာဒိသံသဋ္ဌော န ဝသေယ္ယ, စိတ္တကလ္လတံ ပန ဇနေတ္ဝာ စိတ္တံ ဟာသေတ္ဝာ တောသေတ္ဝာ ပုန ပန္တသေနာသနေ ဝသေယ္ယာတိ အရညသ္သေဝ ဝဏ္ဏံ ကထေတိ။ ဘယာတိ ဝဋ္ဋဘယတော။ အဘယေတိ နိဗ္ဗာနေ။ ဝိမုတ္တောတိ အဓိမုတ္တော ဟုတ္ဝာ ဝသေယ္ယ။
Idāni saṅghe vasamānassa bhikkhuno bhikkhācāravattaṃ ācikkhanto kulākulantiādimāha. Tattha piṇḍikāya carantoti piṇḍatthāya caramāno. Sevetha pantāni senāsanānīti saṅghamajjhaṃ otaritvā vasamānopi dhurapariveṇe tālanāḷikeraādīni ropetvā upaṭṭhākādisaṃsaṭṭho na vaseyya, cittakallataṃ pana janetvā cittaṃ hāsetvā tosetvā puna pantasenāsane vaseyyāti araññasseva vaṇṇaṃ katheti. Bhayāti vaṭṭabhayato. Abhayeti nibbāne. Vimuttoti adhimutto hutvā vaseyya.
ယတ္ထ ဘေရဝာတိ ယသ္မိံ ဌာနေ ဘယဇနကာ သဝိညာဏကာ သီဟဗ္ယဂ္ဃာဒယော, အဝိညာဏကာ ရတ္တိဘာဂေ ခာဏုဝလ္လိအာဒယော ဗဟူ အတ္ထိ။ သရီသပာတိ ဒီဃဇာတိကာဒိသရီသပာ။ နိသီဒိ တတ္ထ ဘိက္ခူတိ တာဒိသေ ဌာနေ ဘိက္ခု နိသိန္နော။ ဣမိနာ ဣဒံ ဒီပေတိ – ဘဂဝာ ယထာ တုမ္ဟေ ဧတရဟိ တတ္ရဋ္ဌကဘေရဝာရမ္မဏာနိ စေဝ သရီသပေ စ ဝိဇ္ဇုနိစ္ဆာရဏာဒီနိ စ အမနသိကတ္ဝာ နိသိန္နာ, ဧဝမေဝံ ပဓာနမနုယုတ္တာ ဘိက္ခူ နိသီဒန္တီတိ။
Yattha bheravāti yasmiṃ ṭhāne bhayajanakā saviññāṇakā sīhabyagghādayo, aviññāṇakā rattibhāge khāṇuvalliādayo bahū atthi. Sarīsapāti dīghajātikādisarīsapā. Nisīdi tattha bhikkhūti tādise ṭhāne bhikkhu nisinno. Iminā idaṃ dīpeti – bhagavā yathā tumhe etarahi tatraṭṭhakabheravārammaṇāni ceva sarīsape ca vijjunicchāraṇādīni ca amanasikatvā nisinnā, evamevaṃ padhānamanuyuttā bhikkhū nisīdantīti.
ဇာတု မေ ဒိဋ္ဌန္တိ ဧကံသေန မယာ ဒိဋ္ဌံ။ န ယိဒံ ဣတိဟီတိဟန္တိ ဣဒံ ဣတိဟ ဣတိဟာတိ န တက္ကဟေတု ဝာ နယဟေတု ဝာ ပိဋကသမ္ပဒာနေန ဝာ အဟံ ဝဒာမိ။ ဧကသ္မိံ ဗ္ရဟ္မစရိယသ္မိန္တိ ဧကာယ ဓမ္မဒေသနာယ။ ဓမ္မဒေသနာ ဟိ ဣဓ ဗ္ရဟ္မစရိယန္တိ အဓိပ္ပေတာ။ မစ္စုဟာယိနန္တိ မရဏပရိစ္စာဂိနံ ခီဏာသဝာနံ။
Jātu me diṭṭhanti ekaṃsena mayā diṭṭhaṃ. Na yidaṃ itihītihanti idaṃ itiha itihāti na takkahetu vā nayahetu vā piṭakasampadānena vā ahaṃ vadāmi. Ekasmiṃ brahmacariyasminti ekāya dhammadesanāya. Dhammadesanā hi idha brahmacariyanti adhippetā. Maccuhāyinanti maraṇapariccāginaṃ khīṇāsavānaṃ.
ဒသာ စ ဒသဓာ ဒသာတိ ဧတ္ထ ဒသာတိ ဒသေဝ, ဒသဓာ ဒသာတိ သတံ, အညေ စ ဒသုတ္တရံ သေခသတံ ပသ္သာမီတိ ဝဒတိ။ သောတသမာပန္နာတိ မဂ္ဂသောတံ သမာပန္နာ။ အတိရစ္ဆာနဂာမိနောတိ ဒေသနာမတ္တမေတံ, အဝိနိပာတဓမ္မာတိ အတ္ထော။ သင္ခာတုံ နောပိ သက္ကောမီတိ မုသာဝာဒဘယေန ဧတ္တကာ နာမ ပုညဘာဂိနော သတ္တာတိ ဂဏေတုံ န သက္ကောမီတိ ဗဟုံ ဗ္ရဟ္မဓမ္မဒေသနံ သန္ဓာယ ဧဝမာဟ။ တတိယံ။
Dasā ca dasadhā dasāti ettha dasāti daseva, dasadhā dasāti sataṃ, aññe ca dasuttaraṃ sekhasataṃ passāmīti vadati. Sotasamāpannāti maggasotaṃ samāpannā. Atiracchānagāminoti desanāmattametaṃ, avinipātadhammāti attho. Saṅkhātuṃ nopi sakkomīti musāvādabhayena ettakā nāma puññabhāgino sattāti gaṇetuṃ na sakkomīti bahuṃ brahmadhammadesanaṃ sandhāya evamāha. Tatiyaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၃. အန္ဓကဝိန္ဒသုတ္တံ • 3. Andhakavindasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃. အန္ဓကဝိန္ဒသုတ္တဝဏ္ဏနာ • 3. Andhakavindasuttavaṇṇanā
