| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
9. අනිමිත්‌තපඤ්‌හසුත්‌තවණ්‌ණනා
9. Animittapañhasuttavaṇṇanā
340. විපස්‌සනාසමාධිංයෙව, න ඵලසමාධිං. ඡෙජ්‌ජකිච්‌චං න නිප්‌ඵජ්‌ජති අවිච්‌ඡෙදවසෙන අප්‌පවත්‌තනතො. නිකන්‌තීති විපස්‌සනං අස්‌සාදෙන්‌තී පවත්‌තතණ්‌හා. සාධෙතුං නාසක්‌ඛි උපක්‌කිලිට්‌ඨත්‌තා. නිමිත්‌තානුසාරීති නිච්‌චසුඛඅත්‌තනිමිත්‌තානං අපූරණතො රාගදොසමොහනිමිත්‌තානිපෙත්‌ථ නිමිත්‌තානෙව. වුට්‌ඨාන…පෙ.… සමාධින්‌ති එතෙන යාව මග්‌ගො නාධිගතො, තාව වුට්‌ඨානගාමිනිවිපස්‌සනමනුයුඤ්‌ජන්‌තොපි යථාරහං අනිමිත්‌තං අප්‌පණිහිතං සුඤ්‌ඤතං චෙතොසමාධිං අනුයුත්‌තො විහරතීති වත්‌තබ්‌බතං අරහතීති දස්‌සෙති. විපස්‌සනාසම්‌පයුත්‌තන්‌ති විපස්‌සනාසඞ්‌ඛාතඤාණසම්‌පයුත්‌තං. චෙතොසමාධින්‌ති චිත්‌තසීසෙන විපස්‌සනාසමාධිමාහ. උපරිමග්‌ගඵලසමාධින්‌ති පඨමමග්‌ගසමාධිස්‌ස පගෙව අධිගතත්‌තා.
340.Vipassanāsamādhiṃyeva, na phalasamādhiṃ. Chejjakiccaṃ na nipphajjati avicchedavasena appavattanato. Nikantīti vipassanaṃ assādentī pavattataṇhā. Sādhetuṃ nāsakkhi upakkiliṭṭhattā. Nimittānusārīti niccasukhaattanimittānaṃ apūraṇato rāgadosamohanimittānipettha nimittāneva. Vuṭṭhāna…pe… samādhinti etena yāva maggo nādhigato, tāva vuṭṭhānagāminivipassanamanuyuñjantopi yathārahaṃ animittaṃ appaṇihitaṃ suññataṃ cetosamādhiṃ anuyutto viharatīti vattabbataṃ arahatīti dasseti. Vipassanāsampayuttanti vipassanāsaṅkhātañāṇasampayuttaṃ. Cetosamādhinti cittasīsena vipassanāsamādhimāha. Uparimaggaphalasamādhinti paṭhamamaggasamādhissa pageva adhigatattā.
අනිමිත්‌තපඤ්‌හසුත්‌තවණ්‌ණනා නිට්‌ඨිතා.
Animittapañhasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 9. අනිමිත්‌තපඤ්‌හාසුත්‌තං • 9. Animittapañhāsuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. අනිමිත්‌තපඤ්‌හාසුත්‌තවණ්‌ණනා • 9. Animittapañhāsuttavaṇṇanā
