Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၈. အနုပာဒာပရိနိဗ္ဗာနသုတ္တံ
8. Anupādāparinibbānasuttaṃ
၄၈. သာဝတ္ထိနိဒာနံ။ ‘‘သစေ ဝော, ဘိက္ခဝေ, အညတိတ္ထိယာ ပရိဗ္ဗာဇကာ ဧဝံ ပုစ္ဆေယ္ယုံ – ‘ကိမတ္ထိယံ, အာဝုသော, သမဏေ ဂောတမေ ဗ္ရဟ္မစရိယံ ဝုသ္သတီ’တိ, ဧဝံ ပုဋ္ဌာ တုမ္ဟေ, ဘိက္ခဝေ, တေသံ အညတိတ္ထိယာနံ ပရိဗ္ဗာဇကာနံ ဧဝံ ဗ္ယာကရေယ္ယာထ – ‘အနုပာဒာပရိနိဗ္ဗာနတ္ထံ ခော, အာဝုသော, ဘဂဝတိ ဗ္ရဟ္မစရိယံ ဝုသ္သတီ’တိ။ သစေ ပန ဝော, ဘိက္ခဝေ, အညတိတ္ထိယာ ပရိဗ္ဗာဇကာ ဧဝံ ပုစ္ဆေယ္ယုံ – ‘အတ္ထိ ပနာဝုသော, မဂ္ဂော, အတ္ထိ ပဋိပဒာ အနုပာဒာပရိနိဗ္ဗာနာယာ’တိ, ဧဝံ ပုဋ္ဌာ တုမ္ဟေ, ဘိက္ခဝေ, တေသံ အညတိတ္ထိယာနံ ပရိဗ္ဗာဇကာနံ ဧဝံ ဗ္ယာကရေယ္ယာထ – ‘အတ္ထိ ခော, အာဝုသော, မဂ္ဂော, အတ္ထိ ပဋိပဒာ အနုပာဒာပရိနိဗ္ဗာနာယာ’တိ ။ ကတမော စ, ဘိက္ခဝေ, မဂ္ဂော, ကတမာ စ ပဋိပဒာ အနုပာဒာပရိနိဗ္ဗာနာယ? အယမေဝ အရိယော အဋ္ဌင္ဂိကော မဂ္ဂော, သေယ္ယထိဒံ – သမ္မာဒိဋ္ဌိ။ပေ.။ သမ္မာသမာဓိ။ အယံ, ဘိက္ခဝေ, မဂ္ဂော, အယံ ပဋိပဒာ အနုပာဒာပရိနိဗ္ဗာနာယာတိ။ ဧဝံ ပုဋ္ဌာ တုမ္ဟေ, ဘိက္ခဝေ, တေသံ အညတိတ္ထိယာနံ ပရိဗ္ဗာဇကာနံ ဧဝံ ဗ္ယာကရေယ္ယာထာ’’တိ။ အဋ္ဌမံ။
48. Sāvatthinidānaṃ. ‘‘Sace vo, bhikkhave, aññatitthiyā paribbājakā evaṃ puccheyyuṃ – ‘kimatthiyaṃ, āvuso, samaṇe gotame brahmacariyaṃ vussatī’ti, evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyātha – ‘anupādāparinibbānatthaṃ kho, āvuso, bhagavati brahmacariyaṃ vussatī’ti. Sace pana vo, bhikkhave, aññatitthiyā paribbājakā evaṃ puccheyyuṃ – ‘atthi panāvuso, maggo, atthi paṭipadā anupādāparinibbānāyā’ti, evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyātha – ‘atthi kho, āvuso, maggo, atthi paṭipadā anupādāparinibbānāyā’ti . Katamo ca, bhikkhave, maggo, katamā ca paṭipadā anupādāparinibbānāya? Ayameva ariyo aṭṭhaṅgiko maggo, seyyathidaṃ – sammādiṭṭhi…pe… sammāsamādhi. Ayaṃ, bhikkhave, maggo, ayaṃ paṭipadā anupādāparinibbānāyāti. Evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyāthā’’ti. Aṭṭhamaṃ.
အညတိတ္ထိယပေယ္ယာလဝဂ္ဂော ပဉ္စမော။
Aññatitthiyapeyyālavaggo pañcamo.
တသ္သုဒ္ဒာနံ –
Tassuddānaṃ –
ဝိရာဂသံယောဇနံ အနုသယံ၊ အဒ္ဓာနံ အာသဝာ ခယာ။
Virāgasaṃyojanaṃ anusayaṃ, addhānaṃ āsavā khayā;
ဝိဇ္ဇာဝိမုတ္တိဉာဏဉ္စ၊ အနုပာဒာယ အဋ္ဌမီ။
Vijjāvimuttiñāṇañca, anupādāya aṭṭhamī.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. အညတိတ္ထိယပေယ္ယာလဝဂ္ဂဝဏ္ဏနာ • 5. Aññatitthiyapeyyālavaggavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. အညတိတ္ထိယပေယ္ယာလဝဂ္ဂဝဏ္ဏနာ • 5. Aññatitthiyapeyyālavaggavaṇṇanā