Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၆. အနုရုဒ္ဓသုတ္တံ
6. Anuruddhasuttaṃ
၂၂၆. ဧကံ သမယံ အာယသ္မာ အနုရုဒ္ဓော ကောသလေသု ဝိဟရတိ အညတရသ္မိံ ဝနသဏ္ဍေ။ အထ ခော အညတရာ တာဝတိံသကာယိကာ ဒေဝတာ ဇာလိနီ နာမ အာယသ္မတော အနုရုဒ္ဓသ္သ ပုရာဏဒုတိယိကာ ယေနာယသ္မာ အနုရုဒ္ဓော တေနုပသင္ကမိ; ဥပသင္ကမိတ္ဝာ အာယသ္မန္တံ အနုရုဒ္ဓံ ဂာထာယ အဇ္ဈဘာသိ –
226. Ekaṃ samayaṃ āyasmā anuruddho kosalesu viharati aññatarasmiṃ vanasaṇḍe. Atha kho aññatarā tāvatiṃsakāyikā devatā jālinī nāma āyasmato anuruddhassa purāṇadutiyikā yenāyasmā anuruddho tenupasaṅkami; upasaṅkamitvā āyasmantaṃ anuruddhaṃ gāthāya ajjhabhāsi –
‘‘တတ္ထ စိတ္တံ ပဏိဓေဟိ၊ ယတ္ထ တေ ဝုသိတံ ပုရေ။
‘‘Tattha cittaṃ paṇidhehi, yattha te vusitaṃ pure;
တာဝတိံသေသု ဒေဝေသု၊ သဗ္ဗကာမသမိဒ္ဓိသု။
Tāvatiṃsesu devesu, sabbakāmasamiddhisu;
ပုရက္ခတော ပရိဝုတော၊ ဒေဝကညာဟိ သောဘသီ’’တိ။
Purakkhato parivuto, devakaññāhi sobhasī’’ti.
‘‘ဒုဂ္ဂတာ ဒေဝကညာယော၊ သက္ကာယသ္မိံ ပတိဋ္ဌိတာ။
‘‘Duggatā devakaññāyo, sakkāyasmiṃ patiṭṭhitā;
တေ စာပိ ဒုဂ္ဂတာ သတ္တာ၊ ဒေဝကညာဟိ ပတ္ထိတာ’’တိ။
Te cāpi duggatā sattā, devakaññāhi patthitā’’ti.
‘‘န တေ သုခံ ပဇာနန္တိ၊ ယေ န ပသ္သန္တိ နန္ဒနံ။
‘‘Na te sukhaṃ pajānanti, ye na passanti nandanaṃ;
အာဝာသံ နရဒေဝာနံ၊ တိဒသာနံ ယသသ္သိန’’န္တိ။
Āvāsaṃ naradevānaṃ, tidasānaṃ yasassina’’nti.
‘‘န တ္ဝံ ဗာလေ ဝိဇာနာသိ၊ ယထာ အရဟတံ ဝစော။
‘‘Na tvaṃ bāle vijānāsi, yathā arahataṃ vaco;
အနိစ္စာ သဗ္ဗသင္ခာရာ၊ ဥပ္ပာဒဝယဓမ္မိနော။
Aniccā sabbasaṅkhārā, uppādavayadhammino;
ဥပ္ပဇ္ဇိတ္ဝာ နိရုဇ္ဈန္တိ၊ တေသံ ဝူပသမော သုခော။
Uppajjitvā nirujjhanti, tesaṃ vūpasamo sukho.
‘‘နတ္ထိ ဒာနိ ပုနာဝာသော၊ ဒေဝကာယသ္မိ ဇာလိနိ။
‘‘Natthi dāni punāvāso, devakāyasmi jālini;
ဝိက္ခီဏော ဇာတိသံသာရော၊ နတ္ထိ ဒာနိ ပုနဗ္ဘဝော’’တိ။
Vikkhīṇo jātisaṃsāro, natthi dāni punabbhavo’’ti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၆. အနုရုဒ္ဓသုတ္တဝဏ္ဏနာ • 6. Anuruddhasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၆. အနုရုဒ္ဓသုတ္တဝဏ္ဏနာ • 6. Anuruddhasuttavaṇṇanā