| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၃. အသ္သာဇာနီယသုတ္တံ
3. Assājānīyasuttaṃ
၂၀၃. ‘‘ပဉ္စဟိ , ဘိက္ခဝေ, အင္ဂေဟိ သမန္နာဂတော ရညော ဘဒ္ရော 1 အသ္သာဇာနီယော ရာဇာရဟော ဟောတိ ရာဇဘောဂ္ဂော, ရညော အင္ဂန္တ္ဝေဝ သင္ခံ ဂစ္ဆတိ။
203. ‘‘Pañcahi , bhikkhave, aṅgehi samannāgato rañño bhadro 2 assājānīyo rājāraho hoti rājabhoggo, rañño aṅgantveva saṅkhaṃ gacchati.
‘‘ကတမေဟိ ပဉ္စဟိ? အဇ္ဇဝေန, ဇဝေန, မဒ္ဒဝေန, ခန္တိယာ, သောရစ္စေန – ဣမေဟိ ခော, ဘိက္ခဝေ, ပဉ္စဟိ အင္ဂေဟိ သမန္နာဂတော ရညော ဘဒ္ရော အသ္သာဇာနီယော ရာဇာရဟော ဟောတိ ရာဇဘောဂ္ဂော, ရညော အင္ဂန္တ္ဝေဝ သင္ခံ ဂစ္ဆတိ။ ‘‘ဧဝမေဝံ ခော, ဘိက္ခဝေ, ပဉ္စဟိ ဓမ္မေဟိ သမန္နာဂတော ဘိက္ခု အာဟုနေယ္ယော ဟောတိ ပာဟုနေယ္ယော ဒက္ခိဏေယ္ယော အဉ္ဇလိကရဏီယော အနုတ္တရံ ပုညက္ခေတ္တံ လောကသ္သ။
‘‘Katamehi pañcahi? Ajjavena, javena, maddavena, khantiyā, soraccena – imehi kho, bhikkhave, pañcahi aṅgehi samannāgato rañño bhadro assājānīyo rājāraho hoti rājabhoggo, rañño aṅgantveva saṅkhaṃ gacchati. ‘‘Evamevaṃ kho, bhikkhave, pañcahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa.
‘‘ကတမေဟိ ပဉ္စဟိ? အဇ္ဇဝေန, ဇဝေန, မဒ္ဒဝေန, ခန္တိယာ, သောရစ္စေန – ဣမေဟိ ခော, ဘိက္ခဝေ, ပဉ္စဟိ ဓမ္မေဟိ သမန္နာဂတော ဘိက္ခု အာဟုနေယ္ယော ဟောတိ ပာဟုနေယ္ယော ဒက္ခိဏေယ္ယော အဉ္ဇလိကရဏီယော အနုတ္တရံ ပုညက္ခေတ္တံ လောကသ္သာ’’တိ။ တတိယံ။
‘‘Katamehi pañcahi? Ajjavena, javena, maddavena, khantiyā, soraccena – imehi kho, bhikkhave, pañcahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassā’’ti. Tatiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃. အသ္သာဇာနီယသုတ္တဝဏ္ဏနာ • 3. Assājānīyasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၄. ကိမိလသုတ္တာဒိဝဏ္ဏနာ • 1-4. Kimilasuttādivaṇṇanā
