Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya

    ๙. อสฺสปรสฺสสุตฺตํ

    9. Assaparassasuttaṃ

    ๑๔๒. ‘‘ตโย จ, ภิกฺขเว, อสฺสปรเสฺส 1 เทเสสฺสามิ ตโย จ ปุริสปรเสฺส 2ฯ ตํ สุณาถ, สาธุกํ มนสิ กโรถ; ภาสิสฺสามี’’ติฯ ‘‘เอวํ, ภเนฺต’’ติ โข เต ภิกฺขู ภควโต ปจฺจโสฺสสุํฯ ภควา เอตทโวจ –

    142. ‘‘Tayo ca, bhikkhave, assaparasse 3 desessāmi tayo ca purisaparasse 4. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –

    ‘‘กตเม จ, ภิกฺขเว, ตโย อสฺสปรสฺสา? อิธ, ภิกฺขเว, เอกโจฺจ อสฺสปรโสฺส ชวสมฺปโนฺน โหติ; น วณฺณสมฺปโนฺน น อาโรหปริณาหสมฺปโนฺนฯ อิธ ปน, ภิกฺขเว, เอกโจฺจ อสฺสปรโสฺส ชวสมฺปโนฺน โหติ วณฺณสมฺปโนฺน จ; น อาโรหปริณาหสมฺปโนฺนฯ อิธ ปน, ภิกฺขเว, เอกโจฺจ อสฺสปรโสฺส ชวสมฺปโนฺน จ โหติ วณฺณสมฺปโนฺน จ อาโรหปริณาหสมฺปโนฺน จฯ อิเม โข, ภิกฺขเว, ตโย อสฺสปรสฺสาฯ

    ‘‘Katame ca, bhikkhave, tayo assaparassā? Idha, bhikkhave, ekacco assaparasso javasampanno hoti; na vaṇṇasampanno na ārohapariṇāhasampanno. Idha pana, bhikkhave, ekacco assaparasso javasampanno hoti vaṇṇasampanno ca; na ārohapariṇāhasampanno. Idha pana, bhikkhave, ekacco assaparasso javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo assaparassā.

    ‘‘กตเม จ, ภิกฺขเว, ตโย ปุริสปรสฺสา? อิธ, ภิกฺขเว, เอกโจฺจ ปุริสปรโสฺส ชวสมฺปโนฺน โหติ; น วณฺณสมฺปโนฺน น อาโรหปริณาหสมฺปโนฺนฯ อิธ ปน, ภิกฺขเว, เอกโจฺจ ปุริสปรโสฺส ชวสมฺปโนฺน จ โหติ วณฺณสมฺปโนฺน จ; น อาโรหปริณาหสมฺปโนฺนฯ อิธ ปน, ภิกฺขเว , เอกโจฺจ ปุริสปรโสฺส ชวสมฺปโนฺน จ โหติ วณฺณสมฺปโนฺน จ อาโรหปริณาหสมฺปโนฺน จฯ

    ‘‘Katame ca, bhikkhave, tayo purisaparassā? Idha, bhikkhave, ekacco purisaparasso javasampanno hoti; na vaṇṇasampanno na ārohapariṇāhasampanno. Idha pana, bhikkhave, ekacco purisaparasso javasampanno ca hoti vaṇṇasampanno ca; na ārohapariṇāhasampanno. Idha pana, bhikkhave , ekacco purisaparasso javasampanno ca hoti vaṇṇasampanno ca ārohapariṇāhasampanno ca.

    ‘‘กถญฺจ , ภิกฺขเว, ปุริสปรโสฺส ชวสมฺปโนฺน โหติ; น วณฺณสมฺปโนฺน, น อาโรหปริณาหสมฺปโนฺน? อิธ, ภิกฺขเว, ภิกฺขุ ปญฺจนฺนํ โอรมฺภาคิยานํ สํโยชนานํ ปริกฺขยา โอปปาติโก โหติ ตตฺถ ปรินิพฺพายี อนาวตฺติธโมฺม ตสฺมา โลกาฯ อิทมสฺส ชวสฺมิํ วทามิฯ อภิธเมฺม โข ปน อภิวินิเย ปญฺหํ ปุโฎฺฐ สํสาเทติ, โน วิสฺสเชฺชติฯ อิทมสฺส น วณฺณสฺมิํ วทามิฯ น โข ปน ลาภี โหติ จีวรปิณฺฑปาตเสนาสนคิลานปฺปจฺจยเภสชฺชปริกฺขารานํ ฯ อิทมสฺส น อาโรหปริณาหสฺมิํ วทามิฯ เอวํ โข, ภิกฺขเว, ปุริสปรโสฺส ชวสมฺปโนฺน โหติ; น วณฺณสมฺปโนฺน, น อาโรหปริณาหสมฺปโนฺนฯ

    ‘‘Kathañca , bhikkhave, purisaparasso javasampanno hoti; na vaṇṇasampanno, na ārohapariṇāhasampanno? Idha, bhikkhave, bhikkhu pañcannaṃ orambhāgiyānaṃ saṃyojanānaṃ parikkhayā opapātiko hoti tattha parinibbāyī anāvattidhammo tasmā lokā. Idamassa javasmiṃ vadāmi. Abhidhamme kho pana abhiviniye pañhaṃ puṭṭho saṃsādeti, no vissajjeti. Idamassa na vaṇṇasmiṃ vadāmi. Na kho pana lābhī hoti cīvarapiṇḍapātasenāsanagilānappaccayabhesajjaparikkhārānaṃ . Idamassa na ārohapariṇāhasmiṃ vadāmi. Evaṃ kho, bhikkhave, purisaparasso javasampanno hoti; na vaṇṇasampanno, na ārohapariṇāhasampanno.

    ‘‘กถญฺจ, ภิกฺขเว, ปุริสปรโสฺส ชวสมฺปโนฺน จ โหติ วณฺณสมฺปโนฺน จ, น อาโรหปริณาหสมฺปโนฺน? อิธ, ภิกฺขเว, ภิกฺขุ ปญฺจนฺนํ โอรมฺภาคิยานํ สํโยชนานํ ปริกฺขยา โอปปาติโก โหติ ตตฺถ ปรินิพฺพายี อนาวตฺติธโมฺม ตสฺมา โลกาฯ อิทมสฺส ชวสฺมิํ วทามิฯ อภิธเมฺม โข ปน อภิวินเย ปญฺหํ ปุโฎฺฐ วิสฺสเชฺชติ, โน สํสาเทติฯ อิทมสฺส วณฺณสฺมิํ วทามิฯ น โข ปน ลาภี โหติ จีวรปิณฺฑปาตเสนาสนคิลานปฺปจฺจยเภสชฺชปริกฺขารานํฯ อิทมสฺส น อาโรหปริณาหสฺมิํ วทามิฯ เอวํ โข, ภิกฺขเว, ปุริสปรโสฺส ชวสมฺปโนฺน จ โหติ; วณฺณสมฺปโนฺน จ, น อาโรหปริณาหสมฺปโนฺนฯ

    ‘‘Kathañca, bhikkhave, purisaparasso javasampanno ca hoti vaṇṇasampanno ca, na ārohapariṇāhasampanno? Idha, bhikkhave, bhikkhu pañcannaṃ orambhāgiyānaṃ saṃyojanānaṃ parikkhayā opapātiko hoti tattha parinibbāyī anāvattidhammo tasmā lokā. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti, no saṃsādeti. Idamassa vaṇṇasmiṃ vadāmi. Na kho pana lābhī hoti cīvarapiṇḍapātasenāsanagilānappaccayabhesajjaparikkhārānaṃ. Idamassa na ārohapariṇāhasmiṃ vadāmi. Evaṃ kho, bhikkhave, purisaparasso javasampanno ca hoti; vaṇṇasampanno ca, na ārohapariṇāhasampanno.

    ‘‘กถญฺจ , ภิกฺขเว, ปุริสปรโสฺส ชวสมฺปโนฺน จ โหติ วณฺณสมฺปโนฺน จ อาโรหปริณาหสมฺปโนฺน จ? อิธ, ภิกฺขเว , ภิกฺขุ ปญฺจนฺนํ โอรมฺภาคิยานํ สํโยชนานํ ปริกฺขยา โอปปาติโก โหติ ตตฺถ ปรินิพฺพายี อนาวตฺติธโมฺม ตสฺมา โลกาฯ อิทมสฺส ชวสฺมิํ วทามิฯ อภิธเมฺม โข ปน อภิวินเย ปญฺหํ ปุโฎฺฐ วิสฺสเชฺชติ, โน สํสาเทติฯ อิทมสฺส วณฺณสฺมิํ วทามิฯ ลาภี โข ปน โหติ จีวรปิณฺฑปาตเสนาสนคิลานปฺปจฺจยเภสชฺชปริกฺขารานํฯ อิทมสฺส อาโรหปริณาหสฺมิํ วทามิฯ เอวํ โข, ภิกฺขเว, ปุริสปรโสฺส ชวสมฺปโนฺน จ โหติ วณฺณสมฺปโนฺน จ อาโรหปริณาหสมฺปโนฺน จฯ อิเม โข, ภิกฺขเว, ตโย ปุริสปรสฺสา’’ติฯ นวมํฯ

    ‘‘Kathañca , bhikkhave, purisaparasso javasampanno ca hoti vaṇṇasampanno ca ārohapariṇāhasampanno ca? Idha, bhikkhave , bhikkhu pañcannaṃ orambhāgiyānaṃ saṃyojanānaṃ parikkhayā opapātiko hoti tattha parinibbāyī anāvattidhammo tasmā lokā. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti, no saṃsādeti. Idamassa vaṇṇasmiṃ vadāmi. Lābhī kho pana hoti cīvarapiṇḍapātasenāsanagilānappaccayabhesajjaparikkhārānaṃ. Idamassa ārohapariṇāhasmiṃ vadāmi. Evaṃ kho, bhikkhave, purisaparasso javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo purisaparassā’’ti. Navamaṃ.




    Next: ๑๐. อสฺสาชานียสุตฺตํ • 10. Assājānīyasuttaṃ




    Footnotes:
    1. อสฺสสทเสฺส (สี สฺยา. กํ. ปี.)
    2. ปุริสสทเสฺส (สี. สฺยา. กํ. ปี.)
    3. assasadasse (sī syā. kaṃ. pī.)
    4. purisasadasse (sī. syā. kaṃ. pī.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๙. อสฺสปรสฺสสุตฺตวณฺณนา • 9. Assaparassasuttavaṇṇanā

    ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๕-๑๐. เกสกมฺพลสุตฺตาทิวณฺณนา • 5-10. Kesakambalasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact