| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
7. ආතාපීසුත්‌තං
7. Ātāpīsuttaṃ
34. වුත්‌තඤ්‌හෙතං භගවතා, වුත්‌තමරහතාති මෙ සුතං –
34. Vuttañhetaṃ bhagavatā, vuttamarahatāti me sutaṃ –
‘‘අනාතාපී, භික්‌ඛවෙ, භික්‌ඛු අනොත්‌තාපී 1 අභබ්‌බො සම්‌බොධාය, අභබ්‌බො නිබ්‌බානාය, අභබ්‌බො අනුත්‌තරස්‌ස යොගක්‌ඛෙමස්‌ස අධිගමාය. ආතාපී ච ඛො, භික්‌ඛවෙ, භික්‌ඛු ඔත්‌තාපී 2 භබ්‌බො සම්‌බොධාය, භබ්‌බො නිබ්‌බානාය, භබ්‌බො අනුත්‌තරස්‌ස යොගක්‌ඛෙමස්‌ස අධිගමායා’’ති. එතමත්‌ථං භගවා අවොච . තත්‌ථෙතං ඉති වුච්‌චති –
‘‘Anātāpī, bhikkhave, bhikkhu anottāpī 3 abhabbo sambodhāya, abhabbo nibbānāya, abhabbo anuttarassa yogakkhemassa adhigamāya. Ātāpī ca kho, bhikkhave, bhikkhu ottāpī 4 bhabbo sambodhāya, bhabbo nibbānāya, bhabbo anuttarassa yogakkhemassa adhigamāyā’’ti. Etamatthaṃ bhagavā avoca . Tatthetaṃ iti vuccati –
‘‘අනාතාපී අනොත්‌තාපී, කුසීතො හීනවීරියො;
‘‘Anātāpī anottāpī, kusīto hīnavīriyo;
යො ථීනමිද්‌ධබහුලො, අහිරීකො අනාදරො;
Yo thīnamiddhabahulo, ahirīko anādaro;
අභබ්‌බො තාදිසො භික්‌ඛු, ඵුට්‌ඨුං සම්‌බොධිමුත්‌තමං.
Abhabbo tādiso bhikkhu, phuṭṭhuṃ sambodhimuttamaṃ.
‘‘යො ච සතිමා නිපකො ඣායී, ආතාපී ඔත්‌තාපී ච අප්‌පමත්‌තො;
‘‘Yo ca satimā nipako jhāyī, ātāpī ottāpī ca appamatto;
සංයොජනං ජාතිජරාය ඡෙත්‌වා, ඉධෙව සම්‌බොධිමනුත්‌තරං ඵුසෙ’’ති.
Saṃyojanaṃ jātijarāya chetvā, idheva sambodhimanuttaraṃ phuse’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. සත්‌තමං.
Ayampi attho vutto bhagavatā, iti me sutanti. Sattamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 7. ආතාපීසුත්‌තවණ්‌ණනා • 7. Ātāpīsuttavaṇṇanā
