| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
13. අත්‌තවාදපටිසංයුත්‌තදිට්‌ඨිනිද්‌දෙසො
13. Attavādapaṭisaṃyuttadiṭṭhiniddeso
146. අත්‌තවාදපටිසංයුත්‌තාය දිට්‌ඨියා කතමෙහි වීසතියා ආකාරෙහි අභිනිවෙසො හොති? ඉධ අස්‌සුතවා පුථුජ්‌ජනො අරියානං අදස්‌සාවී අරියධම්‌මස්‌ස අකොවිදො අරියධම්‌මෙ අවිනීතො සප්‌පුරිසානං අදස්‌සාවී සප්‌පුරිසධම්‌මස්‌ස අකොවිදො සප්‌පුරිසධම්‌මෙ අවිනීතො රූපං අත්‌තතො සමනුපස්‌සති රූපවන්‌තං වා අත්‌තානං අත්‌තනි වා රූපං රූපස්‌මිං වා අත්‌තානං…පෙ.… වෙදනං… සඤ්‌ඤං… සඞ්‌ඛාරෙ… විඤ්‌ඤාණං අත්‌තතො සමනුපස්‌සති විඤ්‌ඤාණවන්‌තං වා අත්‌තානං අත්‌තනි වා විඤ්‌ඤාණං විඤ්‌ඤාණස්‌මිං වා අත්‌තානං…පෙ.….
146. Attavādapaṭisaṃyuttāya diṭṭhiyā katamehi vīsatiyā ākārehi abhiniveso hoti? Idha assutavā puthujjano ariyānaṃ adassāvī ariyadhammassa akovido ariyadhamme avinīto sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati rūpavantaṃ vā attānaṃ attani vā rūpaṃ rūpasmiṃ vā attānaṃ…pe… vedanaṃ… saññaṃ… saṅkhāre… viññāṇaṃ attato samanupassati viññāṇavantaṃ vā attānaṃ attani vā viññāṇaṃ viññāṇasmiṃ vā attānaṃ…pe….
කථං රූපං අත්‌තතො සමනුපස්‌සති? ඉධෙකච්‌චො පථවීකසිණං…පෙ.… ඔදාතකසිණං අත්‌තතො සමනුපස්‌සති. ‘‘යං ඔදාතකසිණං, සො අහං; යො අහං, තං ඔදාතකසිණ’’න්‌ති – ඔදාතකසිණඤ්‌ච අත්‌තඤ්‌ච අද්‌වයං සමනුපස්‌සති. සෙය්‍යථාපි තෙලප්‌පදීපස්‌ස ඣායතො ‘‘යා අච්‌චි, සො වණ්‌ණො; යො වණ්‌ණො, සා අච්‌චී’’ති – අච්‌චිඤ්‌ච වණ්‌ණඤ්‌ච අද්‌වයං සමනුපස්‌සති. එවමෙවං ඉධෙකච්‌චො ඔදාතකසිණං අත්‌තතො සමනුපස්‌සති…පෙ.… අයං පඨමා රූපවත්‌ථුකා අත්‌තවාදපටිසංයුත්‌තා දිට්‌ඨි. අත්‌තවාදපටිසංයුත්‌තා දිට්‌ඨි මිච්‌ඡාදිට්‌ඨි…පෙ.… ඉමානි සඤ්‌ඤොජනානි, න ච දිට්‌ඨියො. එවං රූපං අත්‌තතො සමනුපස්‌සති…පෙ.… අත්‌තවාදපටිසංයුත්‌තාය දිට්‌ඨියා ඉමෙහි වීසතියා ආකාරෙහි අභිනිවෙසො හොති.
Kathaṃ rūpaṃ attato samanupassati? Idhekacco pathavīkasiṇaṃ…pe… odātakasiṇaṃ attato samanupassati. ‘‘Yaṃ odātakasiṇaṃ, so ahaṃ; yo ahaṃ, taṃ odātakasiṇa’’nti – odātakasiṇañca attañca advayaṃ samanupassati. Seyyathāpi telappadīpassa jhāyato ‘‘yā acci, so vaṇṇo; yo vaṇṇo, sā accī’’ti – acciñca vaṇṇañca advayaṃ samanupassati. Evamevaṃ idhekacco odātakasiṇaṃ attato samanupassati…pe… ayaṃ paṭhamā rūpavatthukā attavādapaṭisaṃyuttā diṭṭhi. Attavādapaṭisaṃyuttā diṭṭhi micchādiṭṭhi…pe… imāni saññojanāni, na ca diṭṭhiyo. Evaṃ rūpaṃ attato samanupassati…pe… attavādapaṭisaṃyuttāya diṭṭhiyā imehi vīsatiyā ākārehi abhiniveso hoti.
අත්‌තවාදපටිසංයුත්‌තදිට්‌ඨිනිද්‌දෙසො තෙරසමො.
Attavādapaṭisaṃyuttadiṭṭhiniddeso terasamo.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā / 13. අත්‌තවාදපටිසංයුත්‌තදිට්‌ඨිනිද්‌දෙසවණ්‌ණනා • 13. Attavādapaṭisaṃyuttadiṭṭhiniddesavaṇṇanā
