Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi

    (२६) ६. अट्ठमकस्सइन्द्रियकथा

    (26) 6. Aṭṭhamakassaindriyakathā

    ३७१. अट्ठमकस्स पुग्गलस्स नत्थि सद्धिन्द्रियन्ति? आमन्ता। अट्ठमकस्स पुग्गलस्स नत्थि सद्धाति? न हेवं वत्तब्बे। अट्ठमकस्स पुग्गलस्स नत्थि वीरियिन्द्रियं…पे॰… नत्थि सतिन्द्रियं…पे॰… नत्थि समाधिन्द्रियं…पे॰… नत्थि पञ्‍ञिन्द्रियन्ति? आमन्ता। अट्ठमकस्स पुग्गलस्स नत्थि पञ्‍ञाति? न हेवं वत्तब्बे…पे॰…।

    371. Aṭṭhamakassa puggalassa natthi saddhindriyanti? Āmantā. Aṭṭhamakassa puggalassa natthi saddhāti? Na hevaṃ vattabbe. Aṭṭhamakassa puggalassa natthi vīriyindriyaṃ…pe… natthi satindriyaṃ…pe… natthi samādhindriyaṃ…pe… natthi paññindriyanti? Āmantā. Aṭṭhamakassa puggalassa natthi paññāti? Na hevaṃ vattabbe…pe….

    अट्ठमकस्स पुग्गलस्स अत्थि सद्धाति? आमन्ता। अट्ठमकस्स पुग्गलस्स अत्थि सद्धिन्द्रियन्ति? न हेवं वत्तब्बे…पे॰… अट्ठमकस्स पुग्गलस्स अत्थि वीरियं…पे॰… अत्थि सति… अत्थि समाधि… अत्थि पञ्‍ञाति? आमन्ता। अट्ठमकस्स पुग्गलस्स अत्थि पञ्‍ञिन्द्रियन्ति? न हेवं वत्तब्बे…पे॰…।

    Aṭṭhamakassa puggalassa atthi saddhāti? Āmantā. Aṭṭhamakassa puggalassa atthi saddhindriyanti? Na hevaṃ vattabbe…pe… aṭṭhamakassa puggalassa atthi vīriyaṃ…pe… atthi sati… atthi samādhi… atthi paññāti? Āmantā. Aṭṭhamakassa puggalassa atthi paññindriyanti? Na hevaṃ vattabbe…pe….

    अट्ठमकस्स पुग्गलस्स अत्थि मनो, अत्थि मनिन्द्रियन्ति? आमन्ता। अट्ठमकस्स पुग्गलस्स अत्थि सद्धा, अत्थि सद्धिन्द्रियन्ति? न हेवं वत्तब्बे…पे॰… अट्ठमकस्स पुग्गलस्स अत्थि मनो, अत्थि मनिन्द्रियन्ति? आमन्ता। अट्ठमकस्स पुग्गलस्स अत्थि पञ्‍ञा, अत्थि पञ्‍ञिन्द्रियन्ति? न हेवं वत्तब्बे…पे॰…।

    Aṭṭhamakassa puggalassa atthi mano, atthi manindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… aṭṭhamakassa puggalassa atthi mano, atthi manindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….

    अट्ठमकस्स पुग्गलस्स अत्थि सोमनस्सं, अत्थि सोमनस्सिन्द्रियं, अत्थि जीवितं, अत्थि जीवितिन्द्रियन्ति? आमन्ता। अट्ठमकस्स पुग्गलस्स अत्थि सद्धा, अत्थि सद्धिन्द्रियन्ति? न हेवं वत्तब्बे…पे॰… अट्ठमकस्स पुग्गलस्स अत्थि जीवितं, अत्थि जीवितिन्द्रियन्ति? आमन्ता। अट्ठमकस्स पुग्गलस्स…पे॰… अत्थि पञ्‍ञा, अत्थि पञ्‍ञिन्द्रियन्ति? न हेवं वत्तब्बे…पे॰…।

    Aṭṭhamakassa puggalassa atthi somanassaṃ, atthi somanassindriyaṃ, atthi jīvitaṃ, atthi jīvitindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… aṭṭhamakassa puggalassa atthi jīvitaṃ, atthi jīvitindriyanti? Āmantā. Aṭṭhamakassa puggalassa…pe… atthi paññā, atthi paññindriyanti? Na hevaṃ vattabbe…pe….

    अट्ठमकस्स पुग्गलस्स अत्थि सद्धा, नत्थि सद्धिन्द्रियन्ति? आमन्ता। अट्ठमकस्स पुग्गलस्स अत्थि मनो, नत्थि मनिन्द्रियन्ति? न हेवं वत्तब्बे…पे॰…।

    Aṭṭhamakassa puggalassa atthi saddhā, natthi saddhindriyanti? Āmantā. Aṭṭhamakassa puggalassa atthi mano, natthi manindriyanti? Na hevaṃ vattabbe…pe….

    अट्ठमकस्स पुग्गलस्स अत्थि सद्धा, नत्थि सद्धिन्द्रियन्ति? आमन्ता। अट्ठमकस्स पुग्गलस्स अत्थि सोमनस्सं, नत्थि सोमनस्सिन्द्रियन्ति…पे॰… अत्थि जीवितं, नत्थि जीवितिन्द्रियन्ति? न हेवं वत्तब्बे…पे॰… अट्ठमकस्स पुग्गलस्स अत्थि पञ्‍ञा, नत्थि पञ्‍ञिन्द्रियन्ति? आमन्ता। अट्ठमकस्स पुग्गलस्स अत्थि मनो, नत्थि मनिन्द्रियन्ति? अत्थि सोमनस्सं, नत्थि सोमनस्सिन्द्रियन्ति? अत्थि जीवितं, नत्थि जीवितिन्द्रियन्ति? न हेवं वत्तब्बे…पे॰…।

    Aṭṭhamakassa puggalassa atthi saddhā, natthi saddhindriyanti? Āmantā. Aṭṭhamakassa puggalassa atthi somanassaṃ, natthi somanassindriyanti…pe… atthi jīvitaṃ, natthi jīvitindriyanti? Na hevaṃ vattabbe…pe… aṭṭhamakassa puggalassa atthi paññā, natthi paññindriyanti? Āmantā. Aṭṭhamakassa puggalassa atthi mano, natthi manindriyanti? Atthi somanassaṃ, natthi somanassindriyanti? Atthi jīvitaṃ, natthi jīvitindriyanti? Na hevaṃ vattabbe…pe….

    अट्ठमकस्स पुग्गलस्स नत्थि सद्धिन्द्रियन्ति? आमन्ता। अट्ठमको पुग्गलो अस्सद्धोति? न हेवं वत्तब्बे…पे॰… अट्ठमकस्स पुग्गलस्स नत्थि वीरियिन्द्रियन्ति? आमन्ता। अट्ठमको पुग्गलो कुसीतो हीनवीरियोति? न हेवं वत्तब्बे…पे॰… अट्ठमकस्स पुग्गलस्स नत्थि सतिन्द्रियन्ति? आमन्ता। अट्ठमको पुग्गलो मुट्ठस्सति असम्पजानोति? न हेवं वत्तब्बे…पे॰… अट्ठमकस्स पुग्गलस्स नत्थि समाधिन्द्रियन्ति? आमन्ता। अट्ठमको पुग्गलो असमाहितो विब्भन्तचित्तोति? न हेवं वत्तब्बे…पे॰… अट्ठमकस्स पुग्गलस्स नत्थि पञ्‍ञिन्द्रियन्ति? आमन्ता। अट्ठमको पुग्गलो दुप्पञ्‍ञो एलमूगोति? न हेवं वत्तब्बे…पे॰…।

    Aṭṭhamakassa puggalassa natthi saddhindriyanti? Āmantā. Aṭṭhamako puggalo assaddhoti? Na hevaṃ vattabbe…pe… aṭṭhamakassa puggalassa natthi vīriyindriyanti? Āmantā. Aṭṭhamako puggalo kusīto hīnavīriyoti? Na hevaṃ vattabbe…pe… aṭṭhamakassa puggalassa natthi satindriyanti? Āmantā. Aṭṭhamako puggalo muṭṭhassati asampajānoti? Na hevaṃ vattabbe…pe… aṭṭhamakassa puggalassa natthi samādhindriyanti? Āmantā. Aṭṭhamako puggalo asamāhito vibbhantacittoti? Na hevaṃ vattabbe…pe… aṭṭhamakassa puggalassa natthi paññindriyanti? Āmantā. Aṭṭhamako puggalo duppañño elamūgoti? Na hevaṃ vattabbe…pe….

    अट्ठमकस्स पुग्गलस्स अत्थि सद्धा, सा च सद्धा निय्यानिकाति? आमन्ता। हञ्‍चि अट्ठमकस्स पुग्गलस्स अत्थि सद्धा, सा च सद्धा निय्यानिका, नो च वत रे वत्तब्बे – ‘‘अट्ठमकस्स पुग्गलस्स नत्थि सद्धिन्द्रिय’’न्ति। अट्ठमकस्स पुग्गलस्स अत्थि वीरियं, तञ्‍च वीरियं निय्यानिकं; अत्थि सति, सा च सति निय्यानिका; अत्थि समाधि, सो च समाधि निय्यानिको; अत्थि पञ्‍ञा, सा च पञ्‍ञा निय्यानिकाति? आमन्ता । हञ्‍चि अट्ठमकस्स पुग्गलस्स अत्थि पञ्‍ञा, सा च पञ्‍ञा निय्यानिका, नो च वत रे वत्तब्बे – ‘‘अट्ठमकस्स पुग्गलस्स नत्थि पञ्‍ञिन्द्रिय’’न्ति।

    Aṭṭhamakassa puggalassa atthi saddhā, sā ca saddhā niyyānikāti? Āmantā. Hañci aṭṭhamakassa puggalassa atthi saddhā, sā ca saddhā niyyānikā, no ca vata re vattabbe – ‘‘aṭṭhamakassa puggalassa natthi saddhindriya’’nti. Aṭṭhamakassa puggalassa atthi vīriyaṃ, tañca vīriyaṃ niyyānikaṃ; atthi sati, sā ca sati niyyānikā; atthi samādhi, so ca samādhi niyyāniko; atthi paññā, sā ca paññā niyyānikāti? Āmantā . Hañci aṭṭhamakassa puggalassa atthi paññā, sā ca paññā niyyānikā, no ca vata re vattabbe – ‘‘aṭṭhamakassa puggalassa natthi paññindriya’’nti.

    ३७२. सकदागामिफलसच्छिकिरियाय पटिपन्‍नस्स पुग्गलस्स अत्थि सद्धा, अत्थि सद्धिन्द्रियन्ति? आमन्ता। अट्ठमकस्स पुग्गलस्स अत्थि सद्धा, अत्थि सद्धिन्द्रियन्ति? न हेवं वत्तब्बे…पे॰… सकदागामिफलसच्छिकिरियाय पटिपन्‍नस्स पुग्गलस्स अत्थि पञ्‍ञा, अत्थि पञ्‍ञिन्द्रियन्ति? आमन्ता। अट्ठमकस्स पुग्गलस्स अत्थि पञ्‍ञा, अत्थि पञ्‍ञिन्द्रियन्ति? न हेवं वत्तब्बे…पे॰…।

    372. Sakadāgāmiphalasacchikiriyāya paṭipannassa puggalassa atthi saddhā, atthi saddhindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… sakadāgāmiphalasacchikiriyāya paṭipannassa puggalassa atthi paññā, atthi paññindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….

    अनागामिफलसच्छिकिरियाय पटिपन्‍नस्स पुग्गलस्स… अरहत्तसच्छिकिरियाय पटिपन्‍नस्स पुग्गलस्स अत्थि सद्धा, अत्थि सद्धिन्द्रियं…पे॰… अत्थि पञ्‍ञा, अत्थि पञ्‍ञिन्द्रियन्ति? आमन्ता। अट्ठमकस्स पुग्गलस्स अत्थि पञ्‍ञा, अत्थि पञ्‍ञिन्द्रियन्ति? न हेवं वत्तब्बे…पे॰…।

    Anāgāmiphalasacchikiriyāya paṭipannassa puggalassa… arahattasacchikiriyāya paṭipannassa puggalassa atthi saddhā, atthi saddhindriyaṃ…pe… atthi paññā, atthi paññindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….

    अट्ठमकस्स पुग्गलस्स अत्थि सद्धा, नत्थि सद्धिन्द्रियन्ति? आमन्ता। सकदागामिफलसच्छिकिरियाय पटिपन्‍नस्स पुग्गलस्स अत्थि सद्धा, नत्थि सद्धिन्द्रियन्ति? न हेवं वत्तब्बे…पे॰… अट्ठमकस्स पुग्गलस्स अत्थि पञ्‍ञा, नत्थि पञ्‍ञिन्द्रियन्ति? आमन्ता। सकदागामिफलसच्छिकिरियाय पटिपन्‍नस्स पुग्गलस्स अत्थि पञ्‍ञा, नत्थि पञ्‍ञिन्द्रियन्ति? न हेवं वत्तब्बे…पे॰…।

    Aṭṭhamakassa puggalassa atthi saddhā, natthi saddhindriyanti? Āmantā. Sakadāgāmiphalasacchikiriyāya paṭipannassa puggalassa atthi saddhā, natthi saddhindriyanti? Na hevaṃ vattabbe…pe… aṭṭhamakassa puggalassa atthi paññā, natthi paññindriyanti? Āmantā. Sakadāgāmiphalasacchikiriyāya paṭipannassa puggalassa atthi paññā, natthi paññindriyanti? Na hevaṃ vattabbe…pe….

    अट्ठमकस्स पुग्गलस्स अत्थि सद्धा, नत्थि सद्धिन्द्रियन्ति…पे॰… अत्थि पञ्‍ञा, नत्थि पञ्‍ञिन्द्रियन्ति? आमन्ता । अनागामिफलसच्छिकिरियाय पटिपन्‍नस्स पुग्गलस्स… अरहत्तसच्छिकिरियाय पटिपन्‍नस्स पुग्गलस्स अत्थि पञ्‍ञा, नत्थि पञ्‍ञिन्द्रियन्ति? न हेवं वत्तब्बे…पे॰…।

    Aṭṭhamakassa puggalassa atthi saddhā, natthi saddhindriyanti…pe… atthi paññā, natthi paññindriyanti? Āmantā . Anāgāmiphalasacchikiriyāya paṭipannassa puggalassa… arahattasacchikiriyāya paṭipannassa puggalassa atthi paññā, natthi paññindriyanti? Na hevaṃ vattabbe…pe….

    अट्ठमकस्स पुग्गलस्स नत्थि पञ्‍चिन्द्रियानीति? आमन्ता। ननु वुत्तं भगवता – ‘‘पञ्‍चिमानि, भिक्खवे, इन्द्रियानि! कतमानि पञ्‍च? सद्धिन्द्रियं, वीरियिन्द्रियं, सतिन्द्रियं, समाधिन्द्रियं, पञ्‍ञिन्द्रियं – इमानि खो, भिक्खवे, पञ्‍चिन्द्रियानि। इमेसं खो, भिक्खवे, पञ्‍चन्‍नं इन्द्रियानं समत्ता परिपूरत्ता अरहा होति। ततो मुदुतरेहि अरहत्तसच्छिकिरियाय पटिपन्‍नो होति, ततो मुदुतरेहि अनागामी होति, ततो मुदुतरेहि अनागामिफलसच्छिकिरियाय पटिपन्‍नो होति, ततो मुदुतरेहि सकदागामी होति, ततो मुदुतरेहि सकदागामिफलसच्छिकिरियाय पटिपन्‍नो होति, ततो मुदुतरेहि सोतापन्‍नो होति, ततो मुदुतरेहि सोतापत्तिफलसच्छिकिरियाय पटिपन्‍नो होति। यस्स खो, भिक्खवे, इमानि पञ्‍चिन्द्रियानि सब्बेन सब्बं सब्बथा सब्बं नत्थि, तमहं ‘बाहिरो पुथुज्‍जनपक्खे ठितो’ति वदामी’’ति 1। अत्थेव सुत्तन्तोति? आमन्ता। अट्ठमको पुग्गलो बाहिरो पुथुज्‍जनपक्खे ठितोति? न हेवं वत्तब्बे…पे॰… तेन हि अट्ठमकस्स पुग्गलस्स अत्थि पञ्‍चिन्द्रियानीति।

    Aṭṭhamakassa puggalassa natthi pañcindriyānīti? Āmantā. Nanu vuttaṃ bhagavatā – ‘‘pañcimāni, bhikkhave, indriyāni! Katamāni pañca? Saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ – imāni kho, bhikkhave, pañcindriyāni. Imesaṃ kho, bhikkhave, pañcannaṃ indriyānaṃ samattā paripūrattā arahā hoti. Tato mudutarehi arahattasacchikiriyāya paṭipanno hoti, tato mudutarehi anāgāmī hoti, tato mudutarehi anāgāmiphalasacchikiriyāya paṭipanno hoti, tato mudutarehi sakadāgāmī hoti, tato mudutarehi sakadāgāmiphalasacchikiriyāya paṭipanno hoti, tato mudutarehi sotāpanno hoti, tato mudutarehi sotāpattiphalasacchikiriyāya paṭipanno hoti. Yassa kho, bhikkhave, imāni pañcindriyāni sabbena sabbaṃ sabbathā sabbaṃ natthi, tamahaṃ ‘bāhiro puthujjanapakkhe ṭhito’ti vadāmī’’ti 2. Attheva suttantoti? Āmantā. Aṭṭhamako puggalo bāhiro puthujjanapakkhe ṭhitoti? Na hevaṃ vattabbe…pe… tena hi aṭṭhamakassa puggalassa atthi pañcindriyānīti.

    अट्ठमकस्स इन्द्रियकथा निट्ठिता।

    Aṭṭhamakassa indriyakathā niṭṭhitā.

    ३. ततियवग्गो

    3. Tatiyavaggo




    Next: (२७) ७. दिब्बचक्खुकथा • (27) 7. Dibbacakkhukathā




    Footnotes:
    1. सं॰ नि॰ ५.४८८
    2. saṃ. ni. 5.488



    Related texts:



    अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ६. अट्ठमकस्स इन्द्रियकथावण्णना • 6. Aṭṭhamakassa indriyakathāvaṇṇanā

    टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / ६. अट्ठमकस्स इन्द्रियकथावण्णना • 6. Aṭṭhamakassa indriyakathāvaṇṇanā

    टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ६. अट्ठमकस्स इन्द्रियकथावण्णना • 6. Aṭṭhamakassa indriyakathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact