| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
7. අත්‌ථසන්‌දස්‌සකත්‌ථෙරඅපදානවණ්‌ණනා
7. Atthasandassakattheraapadānavaṇṇanā
විසාලමාළෙ ආසීනොතිආදිකං ආයස්‌මතො අත්‌ථසන්‌දස්‌සකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො අනෙකෙසු අත්‌තභාවෙසු කතපුඤ්‌ඤූපචයො පදුමුත්‌තරස්‌ස භගවතො කාලෙ බ්‍රාහ්‌මණකුලෙ නිබ්‌බත්‌තො වුද්‌ධිමන්‌වාය සකසිප්‌පෙසු නිප්‌ඵත්‌තිං පත්‌තො තත්‌ථ සාරං අපස්‌සන්‌තො ගෙහං පහාය හිමවන්‌තං ගන්‌ත්‌වා රමණීයෙ ඨානෙ පණ්‌ණසාලං කත්‌වා පටිවසති, තදා සත්‌තානුකම්‌පාය හිමවන්‌තමාගතං පදුමුත්‌තරභගවන්‌තං දිස්‌වා පසන්‌නමානසො පඤ්‌චඞ්‌ගසමන්‌නාගතො වන්‌දිත්‌වා ථුතිවචනෙහි ථොමෙසි. සො තෙන පුඤ්‌ඤෙන යාවතායුකං කත්‌වා කාලඞ්‌කත්‌වා බ්‍රහ්‌මලොකූපගො අහොසි. සො අපරභාගෙ ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො විඤ්‌ඤුතං පත්‌තො සත්‌ථු ධම්‌මදෙසනං සුත්‌වා පටිලද්‌ධසද්‌ධො පබ්‌බජිත්‌වා අරහත්‌තං පාපුණි.
Visālamāḷe āsīnotiādikaṃ āyasmato atthasandassakattherassa apadānaṃ. Ayampi purimabuddhesu katādhikāro anekesu attabhāvesu katapuññūpacayo padumuttarassa bhagavato kāle brāhmaṇakule nibbatto vuddhimanvāya sakasippesu nipphattiṃ patto tattha sāraṃ apassanto gehaṃ pahāya himavantaṃ gantvā ramaṇīye ṭhāne paṇṇasālaṃ katvā paṭivasati, tadā sattānukampāya himavantamāgataṃ padumuttarabhagavantaṃ disvā pasannamānaso pañcaṅgasamannāgato vanditvā thutivacanehi thomesi. So tena puññena yāvatāyukaṃ katvā kālaṅkatvā brahmalokūpago ahosi. So aparabhāge imasmiṃ buddhuppāde kulagehe nibbatto viññutaṃ patto satthu dhammadesanaṃ sutvā paṭiladdhasaddho pabbajitvā arahattaṃ pāpuṇi.
47. සො අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො විසාලමාළෙ ආසීනොතිආදිමාහ. තත්‌ථ විසාලමාළෙති විසාලං පත්‌ථටං විත්‌ථිණ්‌ණං මහන්‌තං මාළං විසාලමාළං, තස්‌මිං විසාලමාළෙ ආසීනො නිසින්‌නො අහං ලොකනායකං අද්‌දසන්‌ති සම්‌බන්‌ධො. තෙසං සුවිඤ්‌ඤෙය්‍යමෙවාති.
47. So attano pubbakammaṃ saritvā somanassajāto pubbacaritāpadānaṃ pakāsento visālamāḷe āsīnotiādimāha. Tattha visālamāḷeti visālaṃ patthaṭaṃ vitthiṇṇaṃ mahantaṃ māḷaṃ visālamāḷaṃ, tasmiṃ visālamāḷe āsīno nisinno ahaṃ lokanāyakaṃ addasanti sambandho. Tesaṃ suviññeyyamevāti.
අත්‌ථසන්‌දස්‌සකත්‌ථෙරඅපදානවණ්‌ණනා සමත්‌තා.
Atthasandassakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 7. අත්‌ථසන්‌දස්‌සකත්‌ථෙරඅපදානං • 7. Atthasandassakattheraapadānaṃ
