Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
။ နမော တသ္သ ဘဂဝတော အရဟတော သမ္မာသမ္ဗုဒ္ဓသ္သ။
Namo tassa bhagavato arahato sammāsambuddhassa
သံယုတ္တနိကာယော
Saṃyuttanikāyo
မဟာဝဂ္ဂော
Mahāvaggo
၁. မဂ္ဂသံယုတ္တံ
1. Maggasaṃyuttaṃ
၁. အဝိဇ္ဇာဝဂ္ဂော
1. Avijjāvaggo
၁. အဝိဇ္ဇာသုတ္တံ
1. Avijjāsuttaṃ
၁. ဧဝံ မေ သုတံ – ဧကံ သမယံ ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တတ္ရ ခော ဘဂဝာ ဘိက္ခူ အာမန္တေသိ – ‘‘ဘိက္ခဝော’’တိ။ ‘‘ဘဒန္တေ’’တိ တေ ဘိက္ခူ ဘဂဝတော ပစ္စသ္သောသုံ။ ဘဂဝာ ဧတဒဝောစ –
1. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘အဝိဇ္ဇာ, ဘိက္ခဝေ, ပုဗ္ဗင္ဂမာ အကုသလာနံ ဓမ္မာနံ သမာပတ္တိယာ, အန္ဝဒေဝ 1 အဟိရိကံ အနောတ္တပ္ပံ ။ အဝိဇ္ဇာဂတသ္သ, ဘိက္ခဝေ, အဝိဒ္ဒသုနော မိစ္ဆာဒိဋ္ဌိ ပဟောတိ; မိစ္ဆာဒိဋ္ဌိသ္သ မိစ္ဆာသင္ကပ္ပော ပဟောတိ; မိစ္ဆာသင္ကပ္ပသ္သ မိစ္ဆာဝာစာ ပဟောတိ; မိစ္ဆာဝာစသ္သ မိစ္ဆာကမ္မန္တော ပဟောတိ; မိစ္ဆာကမ္မန္တသ္သ မိစ္ဆာအာဇီဝော ပဟောတိ; မိစ္ဆာအာဇီဝသ္သ မိစ္ဆာဝာယာမော ပဟောတိ; မိစ္ဆာဝာယာမသ္သ မိစ္ဆာသတိ ပဟောတိ; မိစ္ဆာသတိသ္သ မိစ္ဆာသမာဓိ ပဟောတိ။
‘‘Avijjā, bhikkhave, pubbaṅgamā akusalānaṃ dhammānaṃ samāpattiyā, anvadeva 2 ahirikaṃ anottappaṃ . Avijjāgatassa, bhikkhave, aviddasuno micchādiṭṭhi pahoti; micchādiṭṭhissa micchāsaṅkappo pahoti; micchāsaṅkappassa micchāvācā pahoti; micchāvācassa micchākammanto pahoti; micchākammantassa micchāājīvo pahoti; micchāājīvassa micchāvāyāmo pahoti; micchāvāyāmassa micchāsati pahoti; micchāsatissa micchāsamādhi pahoti.
‘‘ဝိဇ္ဇာ စ ခော, ဘိက္ခဝေ, ပုဗ္ဗင္ဂမာ ကုသလာနံ ဓမ္မာနံ သမာပတ္တိယာ, အန္ဝဒေဝ ဟိရောတ္တပ္ပံ။ ဝိဇ္ဇာဂတသ္သ, ဘိက္ခဝေ , ဝိဒ္ဒသုနော သမ္မာဒိဋ္ဌိ ပဟောတိ; သမ္မာဒိဋ္ဌိသ္သ သမ္မာသင္ကပ္ပော ပဟောတိ; သမ္မာသင္ကပ္ပသ္သ သမ္မာဝာစာ ပဟောတိ; သမ္မာဝာစသ္သ သမ္မာကမ္မန္တော ပဟောတိ; သမ္မာကမ္မန္တသ္သ သမ္မာအာဇီဝော ပဟောတိ; သမ္မာအာဇီဝသ္သ သမ္မာဝာယာမော ပဟောတိ; သမ္မာဝာယာမသ္သ သမ္မာသတိ ပဟောတိ; သမ္မာသတိသ္သ သမ္မာသမာဓိ ပဟောတီ’’တိ။ ပဌမံ။
‘‘Vijjā ca kho, bhikkhave, pubbaṅgamā kusalānaṃ dhammānaṃ samāpattiyā, anvadeva hirottappaṃ. Vijjāgatassa, bhikkhave , viddasuno sammādiṭṭhi pahoti; sammādiṭṭhissa sammāsaṅkappo pahoti; sammāsaṅkappassa sammāvācā pahoti; sammāvācassa sammākammanto pahoti; sammākammantassa sammāājīvo pahoti; sammāājīvassa sammāvāyāmo pahoti; sammāvāyāmassa sammāsati pahoti; sammāsatissa sammāsamādhi pahotī’’ti. Paṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁-၂. အဝိဇ္ဇာသုတ္တာဒိဝဏ္ဏနာ • 1-2. Avijjāsuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁-၂. အဝိဇ္ဇာသုတ္တာဒိဝဏ္ဏနာ • 1-2. Avijjāsuttādivaṇṇanā