| Library / Tipiṭaka / තිපිටක • Tipiṭaka / මජ්‌ඣිමනිකාය (අට්‌ඨකථා) • Majjhimanikāya (aṭṭhakathā) |
9. බහුවෙදනීයසුත්‌තවණ්‌ණනා
9. Bahuvedanīyasuttavaṇṇanā
88. එවං මෙ සුතන්‌ති බහුවෙදනීයසුත්‌තං. තත්‌ථ පඤ්‌චකඞ්‌ගො ථපතීති පඤ්‌චකඞ්‌ගොති තස්‌ස නාමං. වාසිඵරසුනිඛාදනදණ්‌ඩමුග්‌ගරකාළසුත්‌තනාළිසඞ්‌ඛාතෙහි වා අඞ්‌ගෙහි සමන්‌නාගතත්‌තා සො පඤ්‌චඞ්‌ගොති පඤ්‌ඤාතො. ථපතීති වඩ්‌ඪකීජෙට්‌ඨකො. උදායීති පණ්‌ඩිතඋදායිත්‌ථෙරො.
88.Evaṃme sutanti bahuvedanīyasuttaṃ. Tattha pañcakaṅgo thapatīti pañcakaṅgoti tassa nāmaṃ. Vāsipharasunikhādanadaṇḍamuggarakāḷasuttanāḷisaṅkhātehi vā aṅgehi samannāgatattā so pañcaṅgoti paññāto. Thapatīti vaḍḍhakījeṭṭhako. Udāyīti paṇḍitaudāyitthero.
89. පරියායන්‌ති කාරණං. ද්‌වෙපානන්‌දාති ද්‌වෙපි, ආනන්‌ද. පරියායෙනාති කාරණෙන. එත්‌ථ ච කායිකචෙතසිකවසෙන ද්‌වෙ වෙදිතබ්‌බා. සුඛාදිවසෙන තිස්‌සො, ඉන්‌ද්‍රියවසෙන සුඛින්‌ද්‍රියාදිකා පඤ්‌ච, ද්‌වාරවසෙන චක්‌ඛුසම්‌ඵස්‌සජාදිකා ඡ, උපවිචාරවසෙන ‘‘චක්‌ඛුනා රූපං දිස්‌වා සොමනස්‌සට්‌ඨානියං රූපං උපවිචරතී’’තිආදිකා අට්‌ඨාරස, ඡ ගෙහස්‌සිතානි සොමනස්‌සානි, ඡ නෙක්‌ඛම්‌මසිතානි සොමනස්‌සානි, ඡ ගෙහස්‌සිතානි දොමනස්‌සානි, ඡ නෙක්‌ඛම්‌මසිතානි දොමනස්‌සානි, ඡ ගෙහස්‌සිතා උපෙක්‌ඛා, ඡ නෙක්‌ඛම්‌මසිතාති එවං ඡත්‌තිංස, තා අතීතෙ ඡත්‌තිංස, අනාගතෙ ඡත්‌තිංස, පච්‌චුප්‌පන්‌නෙ ඡත්‌තිංසාති එවං අට්‌ඨවෙදනාසතං වෙදිතබ්‌බං.
89.Pariyāyanti kāraṇaṃ. Dvepānandāti dvepi, ānanda. Pariyāyenāti kāraṇena. Ettha ca kāyikacetasikavasena dve veditabbā. Sukhādivasena tisso, indriyavasena sukhindriyādikā pañca, dvāravasena cakkhusamphassajādikā cha, upavicāravasena ‘‘cakkhunā rūpaṃ disvā somanassaṭṭhāniyaṃ rūpaṃ upavicaratī’’tiādikā aṭṭhārasa, cha gehassitāni somanassāni, cha nekkhammasitāni somanassāni, cha gehassitāni domanassāni, cha nekkhammasitāni domanassāni, cha gehassitā upekkhā, cha nekkhammasitāti evaṃ chattiṃsa, tā atīte chattiṃsa, anāgate chattiṃsa, paccuppanne chattiṃsāti evaṃ aṭṭhavedanāsataṃ veditabbaṃ.
90. පඤ්‌ච ඛො ඉමෙ, ආනන්‌ද, කාමගුණාති අයං පාටිඑක්‌කො අනුසන්‌ධි. න කෙවලම්‌පි ද්‌වෙ ආදිං කත්‌වා වෙදනා භගවතා පඤ්‌ඤත්‌තා, පරියායෙන එකාපි වෙදනා කථිතා. තං දස්‌සෙන්‌තො පඤ්‌චකඞ්‌ගස්‌ස ථපතිනො වාදං උපත්‌ථම්‌භෙතුං ඉමං දෙසනං ආරභි.
90.Pañca kho ime, ānanda, kāmaguṇāti ayaṃ pāṭiekko anusandhi. Na kevalampi dve ādiṃ katvā vedanā bhagavatā paññattā, pariyāyena ekāpi vedanā kathitā. Taṃ dassento pañcakaṅgassa thapatino vādaṃ upatthambhetuṃ imaṃ desanaṃ ārabhi.
අභික්‌කන්‌තතරන්‌ති සුන්‌දරතරං. පණීතතරන්‌ති අතප්‌පකතරං. එත්‌ථ ච චතුත්‌ථජ්‌ඣානතො පට්‌ඨාය අදුක්‌ඛමසුඛා වෙදනා, සාපි සන්‌තට්‌ඨෙන පණීතට්‌ඨෙන ච සුඛන්‌ති වුත්‌තා. ඡ ගෙහස්‌සිතානි සුඛන්‌ති වුත්‌තානි. නිරොධො අවෙදයිතසුඛවසෙන සුඛං නාම ජාතො. පඤ්‌චකාමගුණවසෙන හි අට්‌ඨසමාපත්‌තිවසෙන ච උප්‌පන්‌නං වෙදයිතසුඛං නාම. නිරොධො අවෙදයිතසුඛං නාම. ඉති වෙදයිතසුඛං වා හොතු අවෙදයිතසුඛං වා, තං නිද්‌දුක්‌ඛභාවසඞ්‌ඛාතෙන සුඛට්‌ඨෙන එකන්‌තසුඛමෙව ජාතං.
Abhikkantataranti sundarataraṃ. Paṇītataranti atappakataraṃ. Ettha ca catutthajjhānato paṭṭhāya adukkhamasukhā vedanā, sāpi santaṭṭhena paṇītaṭṭhena ca sukhanti vuttā. Cha gehassitāni sukhanti vuttāni. Nirodho avedayitasukhavasena sukhaṃ nāma jāto. Pañcakāmaguṇavasena hi aṭṭhasamāpattivasena ca uppannaṃ vedayitasukhaṃ nāma. Nirodho avedayitasukhaṃ nāma. Iti vedayitasukhaṃ vā hotu avedayitasukhaṃ vā, taṃ niddukkhabhāvasaṅkhātena sukhaṭṭhena ekantasukhameva jātaṃ.
91. යත්‌ථ යත්‌ථාති යස්‌මිං යස්‌මිං ඨානෙ. සුඛං උපලබ්‌භතීති වෙදයිතසුඛං වා අවෙදයිතසුඛං වා උපලබ්‌භති. තං තං තථාගතො සුඛස්‌මිං පඤ්‌ඤපෙතීති තං සබ්‌බං තථාගතො නිද්‌දුක්‌ඛභාවං සුඛස්‌මිංයෙව පඤ්‌ඤපෙතීති. ඉධ භගවා නිරොධසමාපත්‌තිං සීසං කත්‌වා නෙය්‍යපුග්‌ගලවසෙන අරහත්‌තනිකූටෙනෙව දෙසනං නිට්‌ඨාපෙසීති.
91.Yatthayatthāti yasmiṃ yasmiṃ ṭhāne. Sukhaṃ upalabbhatīti vedayitasukhaṃ vā avedayitasukhaṃ vā upalabbhati. Taṃ taṃ tathāgato sukhasmiṃ paññapetīti taṃ sabbaṃ tathāgato niddukkhabhāvaṃ sukhasmiṃyeva paññapetīti. Idha bhagavā nirodhasamāpattiṃ sīsaṃ katvā neyyapuggalavasena arahattanikūṭeneva desanaṃ niṭṭhāpesīti.
පපඤ්‌චසූදනියා මජ්‌ඣිමනිකායට්‌ඨකථාය
Papañcasūdaniyā majjhimanikāyaṭṭhakathāya
බහුවෙදනීයසුත්‌තවණ්‌ණනා නිට්‌ඨිතා.
Bahuvedanīyasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / මජ්‌ඣිමනිකාය • Majjhimanikāya / 9. බහුවෙදනීයසුත්‌තං • 9. Bahuvedanīyasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / මජ්‌ඣිමනිකාය (ටීකා) • Majjhimanikāya (ṭīkā) / 9. බහුවෙදනියසුත්‌තවණ්‌ණනා • 9. Bahuvedaniyasuttavaṇṇanā
