| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
5. භීතාසුත්‌තවණ්‌ණනා
5. Bhītāsuttavaṇṇanā
75. පඤ්‌චමෙ කිංසූධ භීතාති කිං භීතා? මග්‌ගො චනෙකායතනප්‌පවුත්‌තොති අට්‌ඨතිංසාරම්‌මණවසෙන අනෙකෙහි කාරණෙහි කථිතො. එවං සන්‌තෙ කිස්‌ස භීතා හුත්‌වා අයං ජනතා ද්‌වාසට්‌ඨි දිට්‌ඨියො අග්‌ගහෙසීති වදති. භූරිපඤ්‌ඤාති බහුපඤ්‌ඤ උස්‌සන්‌නපඤ්‌ඤ. පරලොකං න භායෙති ඉමස්‌මා ලොකා පරං ලොකං ගච්‌ඡන්‌තො න භායෙය්‍ය. පණිධායාති ඨපෙත්‌වා. බහ්‌වන්‌නපානං ඝරමාවසන්‌තොති අනාථපිණ්‌ඩිකාදයො විය බහ්‌වන්‌නපානෙ ඝරෙ වසන්‌තො. සංවිභාගීති අච්‌ඡරාය ගහිතම්‌පි නඛෙන ඵාලෙත්‌වා පරස්‌ස දත්‌වාව භුඤ්‌ජනසීලො. වදඤ්‌ඤූති වුත්‌තත්‌ථමෙව.
75. Pañcame kiṃsūdha bhītāti kiṃ bhītā? Maggo canekāyatanappavuttoti aṭṭhatiṃsārammaṇavasena anekehi kāraṇehi kathito. Evaṃ sante kissa bhītā hutvā ayaṃ janatā dvāsaṭṭhi diṭṭhiyo aggahesīti vadati. Bhūripaññāti bahupañña ussannapañña. Paralokaṃ na bhāyeti imasmā lokā paraṃ lokaṃ gacchanto na bhāyeyya. Paṇidhāyāti ṭhapetvā. Bahvannapānaṃ gharamāvasantoti anāthapiṇḍikādayo viya bahvannapāne ghare vasanto. Saṃvibhāgīti accharāya gahitampi nakhena phāletvā parassa datvāva bhuñjanasīlo. Vadaññūti vuttatthameva.
ඉදානි ගාථාය අඞ්‌ගානි උද්‌ධරිත්‌වා දස්‌සෙතබ්‌බානි – ‘‘වාච’’න්‌ති හි ඉමිනා චත්‌තාරි වචීසුචරිතානි ගහිතානි, ‘‘මනෙනා’’තිපදෙන තීණි මනොසුචරිතානි, ‘‘කායෙනා’’ති පදෙන තීණි කායසුචරිතානි. ඉති ඉමෙ දස කුසලකම්‌මපථා පුබ්‌බසුද්‌ධිඅඞ්‌ගං නාම. බහ්‌වන්‌නපානං ඝරමාවසන්‌තොති ඉමිනා යඤ්‌ඤඋපක්‌ඛරො ගහිතො. සද්‌ධොති එකමඞ්‌ගං, මුදූති එකං, සංවිභාගීති එකං, වදඤ්‌ඤූති එකං. ඉති ඉමානි චත්‌තාරි අඞ්‌ගානි සන්‌ධාය ‘‘එතෙසු ධම්‌මෙසු ඨිතො චතූසූ’’ති ආහ.
Idāni gāthāya aṅgāni uddharitvā dassetabbāni – ‘‘vāca’’nti hi iminā cattāri vacīsucaritāni gahitāni, ‘‘manenā’’tipadena tīṇi manosucaritāni, ‘‘kāyenā’’ti padena tīṇi kāyasucaritāni. Iti ime dasa kusalakammapathā pubbasuddhiaṅgaṃ nāma. Bahvannapānaṃ gharamāvasantoti iminā yaññaupakkharo gahito. Saddhoti ekamaṅgaṃ, mudūti ekaṃ, saṃvibhāgīti ekaṃ, vadaññūti ekaṃ. Iti imāni cattāri aṅgāni sandhāya ‘‘etesu dhammesu ṭhito catūsū’’ti āha.
අපරොපි පරියායො – වාචන්‌තිආදීනි තීණි අඞ්‌ගානි, බහ්‌වන්‌නපානන්‌ති ඉමිනා යඤ්‌ඤඋපක්‌ඛරොව ගහිතො, සද්‌ධො මුදූ සංවිභාගී වදඤ්‌ඤූති එකං අඞ්‌ගං. අපරො දුකනයො නාම හොති. ‘‘වාචං මනඤ්‌චා’’ති ඉදමෙකං අඞ්‌ගං, ‘‘කායෙන පාපානි අකුබ්‌බමානො, බහ්‌වන්‌නපානං ඝරමාවසන්‌තො’’ති එකං, ‘‘සද්‌ධො මුදූ’’ති එකං, ‘‘සංවිභාගී වදඤ්‌ඤූ’’ති එකං. එතෙසු චතූසු ධම්‌මෙසු ඨිතො ධම්‌මෙ ඨිතො නාම හොති. සො ඉතො පරලොකං ගච්‌ඡන්‌තො න භායති. පඤ්‌චමං.
Aparopi pariyāyo – vācantiādīni tīṇi aṅgāni, bahvannapānanti iminā yaññaupakkharova gahito, saddho mudū saṃvibhāgī vadaññūti ekaṃ aṅgaṃ. Aparo dukanayo nāma hoti. ‘‘Vācaṃ manañcā’’ti idamekaṃ aṅgaṃ, ‘‘kāyena pāpāni akubbamāno, bahvannapānaṃ gharamāvasanto’’ti ekaṃ, ‘‘saddho mudū’’ti ekaṃ, ‘‘saṃvibhāgī vadaññū’’ti ekaṃ. Etesu catūsu dhammesu ṭhito dhamme ṭhito nāma hoti. So ito paralokaṃ gacchanto na bhāyati. Pañcamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 5. භීතාසුත්‌තං • 5. Bhītāsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. භීතාසුත්‌තවණ්‌ණනා • 5. Bhītāsuttavaṇṇanā
