| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
9. බිළාලිදායකත්‌ථෙරඅපදානවණ්‌ණනා
9. Biḷālidāyakattheraapadānavaṇṇanā
හිමවන්‌තස්‌සාවිදූරෙතිආදිකං ආයස්‌මතො බිළාලිදායකත්‌ථෙරස්‌ස අපදානං. අයම්‌පි පුරිමජිනවරෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො පදුමුත්‌තරස්‌ස භගවතො කාලෙ කුලගෙහෙ නිබ්‌බත්‌තො විඤ්‌ඤුතං පත්‌තො ඝරාවාසං වසන්‌තො තත්‌ථාදීනවං දිස්‌වා ඝරාවාසං පහාය තාපසපබ්‌බජ්‌ජං පබ්‌බජිත්‌වා හිමවන්‌තෙ වසන්‌තො අතීව අප්‌පිච්‌ඡසන්‌තුට්‌ඨො ආලුවාදීහි යාපෙන්‌තො වසති. තදා පදුමුත්‌තරො භගවා තස්‌ස අනුකම්‌පාය තං හිමවන්‌තං අගමාසි . තං දිස්‌වා පසන්‌නො වන්‌දිත්‌වා බිළාලියො ගහෙත්‌වා පත්‌තෙ ඔකිරි. තං තථාගතො තස්‌සානුකම්‌පාය සොමනස්‌සුප්‌පාදයන්‌තො පරිභුඤ්‌ජි. සො තෙන කම්‌මෙන තතො චුතො දෙවමනුස්‌සෙසු උභයසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තිත්‌වා වුද්‌ධිමන්‌වාය සත්‌ථරි පසන්‌නො සාසනෙ පබ්‌බජිත්‌වා නචිරස්‌සෙව අරහා අහොසි.
Himavantassāvidūretiādikaṃ āyasmato biḷālidāyakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle kulagehe nibbatto viññutaṃ patto gharāvāsaṃ vasanto tatthādīnavaṃ disvā gharāvāsaṃ pahāya tāpasapabbajjaṃ pabbajitvā himavante vasanto atīva appicchasantuṭṭho āluvādīhi yāpento vasati. Tadā padumuttaro bhagavā tassa anukampāya taṃ himavantaṃ agamāsi . Taṃ disvā pasanno vanditvā biḷāliyo gahetvā patte okiri. Taṃ tathāgato tassānukampāya somanassuppādayanto paribhuñji. So tena kammena tato cuto devamanussesu ubhayasampattiyo anubhavitvā imasmiṃ buddhuppāde kulagehe nibbattitvā vuddhimanvāya satthari pasanno sāsane pabbajitvā nacirasseva arahā ahosi.
53. සො අපරභාගෙ අත්‌තනො කුසලකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො හිමවන්‌තස්‌සාවිදූරෙතිආදිමාහ. තං සබ්‌බං හෙට්‌ඨා වුත්‌තනයත්‌තා උත්‌තානත්‌ථමෙව. ආලුවකරම්‌භාදයො තෙසං තෙසං කන්‌දජාතීනං නාමානෙවාති.
53. So aparabhāge attano kusalakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Taṃ sabbaṃ heṭṭhā vuttanayattā uttānatthameva. Āluvakarambhādayo tesaṃ tesaṃ kandajātīnaṃ nāmānevāti.
බිළාලිදායකත්‌ථෙරඅපදානවණ්‌ණනා සමත්‌තා.
Biḷālidāyakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 9. බිළාලිදායකත්‌ථෙරඅපදානං • 9. Biḷālidāyakattheraapadānaṃ
