Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ဗ္ရာဟ္မဏသုတ္တံ
2. Brāhmaṇasuttaṃ
၁၀၀၈. သာဝတ္ထိနိဒာနံ ။ ‘‘ဗ္ရာဟ္မဏာ, ဘိက္ခဝေ, ဥဒယဂာမိနိံ နာမ ပဋိပဒံ ပညပေန္တိ။ တေ သာဝကံ ဧဝံ သမာဒပေန္တိ – ‘ဧဟိ တ္ဝံ, အမ္ဘော ပုရိသ, ကာလသ္သေဝ ဥဋ္ဌာယ ပာစီနမုခော ယာဟိ။ သော တ္ဝံ မာ သောဗ္ဘံ ပရိဝဇ္ဇေဟိ, မာ ပပာတံ, မာ ခာဏုံ, မာ ကဏ္ဍကဌာနံ 1, မာ စန္ဒနိယံ, မာ ဩဠိဂလ္လံ။ ယတ္ထ 2 ပပတေယ္ယာသိ တတ္ထေဝ မရဏံ အာဂမေယ္ယာသိ။ ဧဝံ တ္ဝံ, အမ္ဘော ပုရိသ, ကာယသ္သ ဘေဒာ ပရံ မရဏာ သုဂတိံ သဂ္ဂံ လောကံ ဥပပဇ္ဇိသ္သသီ’’’တိ။
1008. Sāvatthinidānaṃ . ‘‘Brāhmaṇā, bhikkhave, udayagāminiṃ nāma paṭipadaṃ paññapenti. Te sāvakaṃ evaṃ samādapenti – ‘ehi tvaṃ, ambho purisa, kālasseva uṭṭhāya pācīnamukho yāhi. So tvaṃ mā sobbhaṃ parivajjehi, mā papātaṃ, mā khāṇuṃ, mā kaṇḍakaṭhānaṃ 3, mā candaniyaṃ, mā oḷigallaṃ. Yattha 4 papateyyāsi tattheva maraṇaṃ āgameyyāsi. Evaṃ tvaṃ, ambho purisa, kāyassa bhedā paraṃ maraṇā sugatiṃ saggaṃ lokaṃ upapajjissasī’’’ti.
‘‘တံ ခော ပနေတံ, ဘိက္ခဝေ, ဗ္ရာဟ္မဏာနံ ဗာလဂမနမေတံ 5 မူဠ္ဟဂမနမေတံ န နိဗ္ဗိဒာယ န ဝိရာဂာယ န နိရောဓာယ န ဥပသမာယ န အဘိညာယ န သမ္ဗောဓာယ န နိဗ္ဗာနာယ သံဝတ္တတိ။ အဟဉ္စ ခော, ဘိက္ခဝေ, အရိယသ္သ ဝိနယေ ဥဒယဂာမိနိံ ပဋိပဒံ ပညပေမိ; ယာ ဧကန္တနိဗ္ဗိဒာယ ဝိရာဂာယ နိရောဓာယ ဥပသမာယ အဘိညာယ သမ္ဗောဓာယ နိဗ္ဗာနာယ သံဝတ္တတိ။
‘‘Taṃ kho panetaṃ, bhikkhave, brāhmaṇānaṃ bālagamanametaṃ 6 mūḷhagamanametaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati. Ahañca kho, bhikkhave, ariyassa vinaye udayagāminiṃ paṭipadaṃ paññapemi; yā ekantanibbidāya virāgāya nirodhāya upasamāya abhiññāya sambodhāya nibbānāya saṃvattati.
‘‘ကတမာ စ သာ, ဘိက္ခဝေ, ဥဒယဂာမိနီ ပဋိပဒာ; ယာ ဧကန္တနိဗ္ဗိဒာယ။ပေ.။ နိဗ္ဗာနာယ သံဝတ္တတိ? ဣဓ , ဘိက္ခဝေ, အရိယသာဝကော ဗုဒ္ဓေ အဝေစ္စပ္ပသာဒေန သမန္နာဂတော ဟောတိ – ဣတိပိ သော ဘဂဝာ အရဟံ သမ္မာသမ္ဗုဒ္ဓော။ပေ.။ သတ္ထာ ဒေဝမနုသ္သာနံ ဗုဒ္ဓော ဘဂဝာတိ; ဓမ္မေ။ပေ.။ သင္ဃေ။ပေ.။ အရိယကန္တေဟိ သီလေဟိ သမန္နာဂတော ဟောတိ အခဏ္ဍေဟိ။ပေ.။ သမာဓိသံဝတ္တနိကေဟိ။ အယံ ခော သာ, ဘိက္ခဝေ, ဥဒယဂာမိနီ ပဋိပဒာ ဧကန္တနိဗ္ဗိဒာယ။ပေ.။ နိဗ္ဗာနာယ သံဝတ္တတီ’’တိ။ ဒုတိယံ။
‘‘Katamā ca sā, bhikkhave, udayagāminī paṭipadā; yā ekantanibbidāya…pe… nibbānāya saṃvattati? Idha , bhikkhave, ariyasāvako buddhe aveccappasādena samannāgato hoti – itipi so bhagavā arahaṃ sammāsambuddho…pe… satthā devamanussānaṃ buddho bhagavāti; dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Ayaṃ kho sā, bhikkhave, udayagāminī paṭipadā ekantanibbidāya…pe… nibbānāya saṃvattatī’’ti. Dutiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂-၃. ဗ္ရာဟ္မဏသုတ္တာဒိဝဏ္ဏနာ • 2-3. Brāhmaṇasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂-၃. ဗ္ရာဟ္မဏသုတ္တာဒိဝဏ္ဏနာ • 2-3. Brāhmaṇasuttādivaṇṇanā