| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
10. බුද්‌ධනිදස්‌සනපඤ්‌හො
10. Buddhanidassanapañho
10. රාජා ආහ ‘‘භන්‌තෙ නාගසෙන, බුද්‌ධො අත්‌ථී’’ති? ‘‘ආම, මහාරාජ, භගවා අත්‌ථී’’ති. ‘‘සක්‌කා පන, භන්‌තෙ නාගසෙන, බුද්‌ධො නිදස්‌සෙතුං ඉධවා ඉධවා’’ති? ‘‘පරිනිබ්‌බුතො, මහාරාජ, භගවා අනුපාදිසෙසාය නිබ්‌බානධාතුයා, න සක්‌කා භගවා නිදස්‌සෙතුං ‘ඉධ වා ඉධ වා’’’ති.
10. Rājā āha ‘‘bhante nāgasena, buddho atthī’’ti? ‘‘Āma, mahārāja, bhagavā atthī’’ti. ‘‘Sakkā pana, bhante nāgasena, buddho nidassetuṃ idhavā idhavā’’ti? ‘‘Parinibbuto, mahārāja, bhagavā anupādisesāya nibbānadhātuyā, na sakkā bhagavā nidassetuṃ ‘idha vā idha vā’’’ti.
‘‘ඔපම්‌මං කරොහී’’ති. ‘‘තං කිං මඤ්‌ඤසි, මහාරාජ, මහතො අග්‌ගික්‌ඛන්‌ධස්‌ස ජලමානස්‌ස යා අච්‌චි අත්‌ථඞ්‌ගතා, සක්‌කා සා අච්‌චි දස්‌සෙතුං ‘ඉධ වා ඉධ වා’’’ති? ‘‘න හි, භන්‌තෙ, නිරුද්‌ධා සා අච්‌චි අප්‌පඤ්‌ඤත්‌තිං ගතා’’ති. ‘‘එවමෙව ඛො, මහාරාජ, භගවා අනුපාදිසෙසාය නිබ්‌බානධාතුයා පරිනිබ්‌බුතො අත්‌ථඞ්‌ගතො, න සක්‌කා භගවා නිදස්‌සෙතුං ‘ඉධ වා ඉධ වා’ ති, ධම්‌මකායෙන පන ඛො, මහාරාජ, සක්‌කා භගවා නිදස්‌සෙතුං. ධම්‌මො හි, මහාරාජ, භගවතා දෙසිතො’’ති.
‘‘Opammaṃ karohī’’ti. ‘‘Taṃ kiṃ maññasi, mahārāja, mahato aggikkhandhassa jalamānassa yā acci atthaṅgatā, sakkā sā acci dassetuṃ ‘idha vā idha vā’’’ti? ‘‘Na hi, bhante, niruddhā sā acci appaññattiṃ gatā’’ti. ‘‘Evameva kho, mahārāja, bhagavā anupādisesāya nibbānadhātuyā parinibbuto atthaṅgato, na sakkā bhagavā nidassetuṃ ‘idha vā idha vā’ ti, dhammakāyena pana kho, mahārāja, sakkā bhagavā nidassetuṃ. Dhammo hi, mahārāja, bhagavatā desito’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
බුද්‌ධනිදස්‌සනපඤ්‌හො දසමො.
Buddhanidassanapañho dasamo.
බුද්‌ධවග්‌ගො පඤ්‌චමො.
Buddhavaggo pañcamo.
ඉමස්‌මිං වග්‌ගෙ දස පඤ්‌හා.
Imasmiṃ vagge dasa pañhā.
