| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
5. බුද්‌ධවග්‌ගො
5. Buddhavaggo
1. බුද්‌ධස්‌ස අත්‌ථිනත්‌ථිභාවපඤ්‌හො
1. Buddhassa atthinatthibhāvapañho
1. රාජා ආහ ‘‘භන්‌තෙ නාගසෙන, බුද්‌ධො තයා දිට්‌ඨො’’ති? ‘‘න හි, මහාරාජා’’ති. ‘‘අථ තෙ ආචරියෙහි බුද්‌ධො දිට්‌ඨො’’ති? ‘‘න හි, මහාරාජා’’ති. ‘‘තෙන හි, භන්‌තෙ නාගසෙන, නත්‌ථි බුද්‌ධො’’ති. ‘‘කිං පන, මහාරාජ, හිමවති ඌහා නදී තයා දිට්‌ඨා’’ති? ‘‘න හි, භන්‌තෙ’’ති. ‘‘අථ තෙ පිතරා ඌහා නදී දිට්‌ඨා’’ති? ‘‘න හි, භන්‌තෙ’’ති. ‘‘තෙන හි, මහාරාජ, නත්‌ථි ඌහා නදී’’ති. ‘‘අත්‌ථි, භන්‌තෙ, කිඤ්‌චාපි මයා ඌහා නදී න දිට්‌ඨා, පිතරාපි මෙ ඌහා නදී න දිට්‌ඨා, අපි ච අත්‌ථි ඌහා නදී’’ති. ‘‘එවමෙව ඛො, මහාරාජ, කිඤ්‌චාපි මයා භගවා න දිට්‌ඨො, ආචරියෙහිපි මෙ භගවා න දිට්‌ඨො, අපි ච අත්‌ථි භගවා’’ති.
1. Rājā āha ‘‘bhante nāgasena, buddho tayā diṭṭho’’ti? ‘‘Na hi, mahārājā’’ti. ‘‘Atha te ācariyehi buddho diṭṭho’’ti? ‘‘Na hi, mahārājā’’ti. ‘‘Tena hi, bhante nāgasena, natthi buddho’’ti. ‘‘Kiṃ pana, mahārāja, himavati ūhā nadī tayā diṭṭhā’’ti? ‘‘Na hi, bhante’’ti. ‘‘Atha te pitarā ūhā nadī diṭṭhā’’ti? ‘‘Na hi, bhante’’ti. ‘‘Tena hi, mahārāja, natthi ūhā nadī’’ti. ‘‘Atthi, bhante, kiñcāpi mayā ūhā nadī na diṭṭhā, pitarāpi me ūhā nadī na diṭṭhā, api ca atthi ūhā nadī’’ti. ‘‘Evameva kho, mahārāja, kiñcāpi mayā bhagavā na diṭṭho, ācariyehipi me bhagavā na diṭṭho, api ca atthi bhagavā’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
බුද්‌ධස්‌ස අත්‌ථිනත්‌ථිභාවපඤ්‌හො පඨමො.
Buddhassa atthinatthibhāvapañho paṭhamo.
