| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
7. රාහුලසංයුත්‌තං
7. Rāhulasaṃyuttaṃ
1. පඨමවග්‌ගො
1. Paṭhamavaggo
1-8. චක්‌ඛුසුත්‌තාදිවණ්‌ණනා
1-8. Cakkhusuttādivaṇṇanā
188-195. රාහුලසංයුත්‌තස්‌ස පඨමෙ එකොති චතූසු ඉරියාපථෙසු එකවිහාරී. වූපකට්‌ඨොති විවෙකට්‌ඨො නිස්‌සද්‌දො. අප්‌පමත්‌තොති සතියා අවිප්‌පවසන්‌තො. ආතාපීති වීරියසම්‌පන්‌නො. පහිතත්‌තො විහරෙය්‍යන්‌ති විසෙසාධිගමත්‌ථාය පෙසිතත්‌තො හුත්‌වා විහරෙය්‍යං. අනිච්‌චන්‌ති හුත්‌වා අභාවාකාරෙන අනිච්‌චං. අථ වා උප්‌පාදවයවන්‌තතාය තාවකාලිකතාය විපරිණාමකොටියා නිච්‌චපටික්‌ඛෙපතොති ඉමෙහිපි කාරණෙහි අනිච්‌චං. දුක්‌ඛන්‌ති චතූහි කාරණෙහි දුක්‌ඛං දුක්‌ඛමනට්‌ඨෙන දුක්‌ඛවත්‌ථුකට්‌ඨෙන සතතසම්‌පීළනට්‌ඨෙන සුඛපටික්‌ඛෙපෙනාති. කල්‌ලන්‌ති යුත්‌තං. එතං මමාති තණ්‌හාගාහො. එසොහමස්‌මීති මානගාහො. එසො මෙ අත්‌තාති දිට්‌ඨිගාහො. තණ්‌හාගාහො චෙත්‌ථ අට්‌ඨසතතණ්‌හාවිචරිතවසෙන, මානගාහො නවවිධමානවසෙන, දිට්‌ඨිගාහො ද්‌වාසට්‌ඨිදිට්‌ඨිවසෙන වෙදිතබ්‌බො. නිබ්‌බින්‌දං විරජ්‌ජතීති එත්‌ථ විරාගවසෙන චත්‌තාරො මග්‌ගා කථිතා, විරාගා විමුච්‌චතීති එත්‌ථ විමුත්‌තිවසෙන චත්‌තාරි සාමඤ්‌ඤඵලානි.
188-195. Rāhulasaṃyuttassa paṭhame ekoti catūsu iriyāpathesu ekavihārī. Vūpakaṭṭhoti vivekaṭṭho nissaddo. Appamattoti satiyā avippavasanto. Ātāpīti vīriyasampanno. Pahitatto vihareyyanti visesādhigamatthāya pesitatto hutvā vihareyyaṃ. Aniccanti hutvā abhāvākārena aniccaṃ. Atha vā uppādavayavantatāya tāvakālikatāya vipariṇāmakoṭiyā niccapaṭikkhepatoti imehipi kāraṇehi aniccaṃ. Dukkhanti catūhi kāraṇehi dukkhaṃ dukkhamanaṭṭhena dukkhavatthukaṭṭhena satatasampīḷanaṭṭhena sukhapaṭikkhepenāti. Kallanti yuttaṃ. Etaṃ mamāti taṇhāgāho. Esohamasmīti mānagāho. Eso me attāti diṭṭhigāho. Taṇhāgāho cettha aṭṭhasatataṇhāvicaritavasena, mānagāho navavidhamānavasena, diṭṭhigāho dvāsaṭṭhidiṭṭhivasena veditabbo. Nibbindaṃ virajjatīti ettha virāgavasena cattāro maggā kathitā, virāgā vimuccatīti ettha vimuttivasena cattāri sāmaññaphalāni.
එත්‌ථ ච පඤ්‌චසු ද්‌වාරෙසු පසාදාව ගහිතා, මනොති ඉමිනා තෙභූමකං සම්‌මසනචාරචිත්‌තං. දුතියෙ පඤ්‌චසු ද්‌වාරෙසු ආරම්‌මණමෙව. තතියෙ පඤ්‌චසු ද්‌වාරෙසු පසාදවත්‌ථුකචිත්‌තමෙව, මනොවිඤ්‌ඤාණෙන තෙභූමකං සම්‌මසනචාරචිත්‌තං ගහිතං. එවං සබ්‌බත්‌ථ නයො නෙතබ්‌බො. ඡට්‌ඨෙ තෙභූමකධම්‌මා. අට්‌ඨමෙ පන තණ්‌හාති තස්‌මිං තස්‌මිං ද්‌වාරෙ ජවනප්‌පත්‌තාව ලබ්‌භති. පඨමාදීනි.
Ettha ca pañcasu dvāresu pasādāva gahitā, manoti iminā tebhūmakaṃ sammasanacāracittaṃ. Dutiye pañcasu dvāresu ārammaṇameva. Tatiye pañcasu dvāresu pasādavatthukacittameva, manoviññāṇena tebhūmakaṃ sammasanacāracittaṃ gahitaṃ. Evaṃ sabbattha nayo netabbo. Chaṭṭhe tebhūmakadhammā. Aṭṭhame pana taṇhāti tasmiṃ tasmiṃ dvāre javanappattāva labbhati. Paṭhamādīni.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya
1. චක්‌ඛුසුත්‌තං • 1. Cakkhusuttaṃ
2. රූපසුත්‌තං • 2. Rūpasuttaṃ
3. විඤ්‌ඤාණසුත්‌තං • 3. Viññāṇasuttaṃ
4. සම්‌ඵස්‌සසුත්‌තං • 4. Samphassasuttaṃ
5. වෙදනාසුත්‌තං • 5. Vedanāsuttaṃ
6. සඤ්‌ඤාසුත්‌තං • 6. Saññāsuttaṃ
7. සඤ්‌චෙතනාසුත්‌තං • 7. Sañcetanāsuttaṃ
8. තණ්‌හාසුත්‌තං • 8. Taṇhāsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1-8. චක්‌ඛුසුත්‌තාදිවණ්‌ණනා • 1-8. Cakkhusuttādivaṇṇanā
