| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
7. චන්‌දඞ්‌ගපඤ්‌හො
7. Candaṅgapañho
7. ‘‘භන්‌තෙ නාගසෙන, ‘චන්‌දස්‌ස පඤ්‌ච අඞ්‌ගානි ගහෙතබ්‌බානී’ති යං වදෙසි, කතමානි තානි පඤ්‌ච අඞ්‌ගානි ගහෙතබ්‌බානී’’ති? ‘‘යථා, මහාරාජ, චන්‌දො සුක්‌කපක්‌ඛෙ උදයන්‌තො උත්‌තරුත්‌තරිං වඩ්‌ඪති, එවමෙව ඛො, මහාරාජ, යොගිනා යොගාවචරෙන ආචාරසීලගුණවත්‌තප්‌පටිපත්‌තියා ආගමාධිගමෙ පටිසල්‌ලානෙ සතිපට්‌ඨානෙ ඉන්‌ද්‍රියෙසු ගුත්‌තද්‌වාරතාය භොජනෙ මත්‌තඤ්‌ඤුතාය ජාගරියානුයොගෙ උත්‌තරුත්‌තරිං වඩ්‌ඪිතබ්‌බං. ඉදං, මහාරාජ, චන්‌දස්‌ස පඨමං අඞ්‌ගං ගහෙතබ්‌බං.
7. ‘‘Bhante nāgasena, ‘candassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, cando sukkapakkhe udayanto uttaruttariṃ vaḍḍhati, evameva kho, mahārāja, yoginā yogāvacarena ācārasīlaguṇavattappaṭipattiyā āgamādhigame paṭisallāne satipaṭṭhāne indriyesu guttadvāratāya bhojane mattaññutāya jāgariyānuyoge uttaruttariṃ vaḍḍhitabbaṃ. Idaṃ, mahārāja, candassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, චන්‌දො උළාරාධිපති, එවමෙව ඛො, මහාරාජ, යොගිනා යොගාවචරෙන උළාරෙන ඡන්‌දාධිපතිනා භවිතබ්‌බං. ඉදං, මහාරාජ, චන්‌දස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, cando uḷārādhipati, evameva kho, mahārāja, yoginā yogāvacarena uḷārena chandādhipatinā bhavitabbaṃ. Idaṃ, mahārāja, candassa dutiyaṃ aṅgaṃ gahetabbaṃ.
‘‘පුන චපරං, මහාරාජ, චන්‌දො නිසාය චරති, එවමෙව ඛො, මහාරාජ, යොගිනා යොගාවචරෙන පවිවිත්‌තෙන භවිතබ්‌බං. ඉදං, මහාරාජ, චන්‌දස්‌ස තතියං අඞ්‌ගං ගහෙතබ්‌බං.
‘‘Puna caparaṃ, mahārāja, cando nisāya carati, evameva kho, mahārāja, yoginā yogāvacarena pavivittena bhavitabbaṃ. Idaṃ, mahārāja, candassa tatiyaṃ aṅgaṃ gahetabbaṃ.
‘‘පුන චපරං, මහාරාජ, චන්‌දො විමානකෙතු, එවමෙව ඛො, මහාරාජ, යොගිනා යොගාවචරෙන සීලකෙතුනා භවිතබ්‌බං. ඉදං, මහාරාජ, චන්‌දස්‌ස චතුත්‌ථං අඞ්‌ගං ගහෙතබ්‌බං.
‘‘Puna caparaṃ, mahārāja, cando vimānaketu, evameva kho, mahārāja, yoginā yogāvacarena sīlaketunā bhavitabbaṃ. Idaṃ, mahārāja, candassa catutthaṃ aṅgaṃ gahetabbaṃ.
‘‘පුන චපරං, මහාරාජ, චන්‌දො ආයාචිතපත්‌ථිතො උදෙති, එවමෙව ඛො, මහාරාජ, යොගිනා යොගාවචරෙන ආයාචිතපත්‌ථිතෙන කුලානි උපසඞ්‌කමිතබ්‌බානි. ඉදං, මහාරාජ, චන්‌දස්‌ස පඤ්‌චමං අඞ්‌ගං ගහෙතබ්‌බං. භාසිතම්‌පෙතං, මහාරාජ, භගවතා දෙවාතිදෙවෙන සංයුත්‌තනිකායවරෙ ‘චන්‌දූපමා, භික්‌ඛවෙ, කුලානි උපසඞ්‌කමථ, අපකස්‌සෙව කායං අපකස්‌ස චිත්‌තං නිච්‌චනවකා කුලෙසු අප්‌පගබ්‌භා’’’ති 1.
‘‘Puna caparaṃ, mahārāja, cando āyācitapatthito udeti, evameva kho, mahārāja, yoginā yogāvacarena āyācitapatthitena kulāni upasaṅkamitabbāni. Idaṃ, mahārāja, candassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare ‘candūpamā, bhikkhave, kulāni upasaṅkamatha, apakasseva kāyaṃ apakassa cittaṃ niccanavakā kulesu appagabbhā’’’ti 2.
චන්‌දඞ්‌ගපඤ්‌හො සත්‌තමො.
Candaṅgapañho sattamo.
Footnotes:
