| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂. အနာထပိဏ္ဍိကဝဂ္ဂော
2. Anāthapiṇḍikavaggo
၁. စန္ဒိမသသုတ္တဝဏ္ဏနာ
1. Candimasasuttavaṇṇanā
၉၂. ပဗ္ဗတတဋာ သန္ဒမာနော တထာရူပော နဒီနိဝတ္တနပဒေသောပိ သမ္ဗာဓဋ္ဌာနတာယ ကစ္ဆော ဝိယာတိ အာဟ ‘‘ပဗ္ဗတကစ္ဆေပီ’’တိ။ ပဋိပက္ခဒူရီဘာဝေန သေဋ္ဌဋ္ဌေန စ ဧကော ဥဒေတီတိ ဧကောဒိ, ဧကဂ္ဂတာ။ တသ္မိံ ယောဂတော ဧကဂ္ဂစိတ္တာ ဣဓ ဧကောဒီ။ ပဋိပက္ခတော အတ္တာနံ နိပယန္တိ ဝိသောဓေန္တီတိ နိပကာ, ပညဝန္တော။ တေနာဟ ‘‘ဧကဂ္ဂစိတ္တာ စေဝာ’’တိအာဒိ။ ကာယာဒိဘေဒံ အာရမ္မဏံ သာတိသယာယ သတိယာ သရန္တီတိ သတာ။ တေနာဟ ‘‘သတိမန္တော’’တိ။ သောတ္ထိံ ဂမိသ္သန္တီတိ ယထာဝုတ္တပဒေသေ မဂာ သောတ္ထိမနုပဒ္ဒဝေန ဝတ္တိသ္သန္တိ, ဧဝံ ဈာနလာဘိနော သောတ္ထိံ ကိလေသေဟိ အနုပဒ္ဒုတာ ဝတ္တိသ္သန္တိ။ အယံ ကိရ ဒေဝပုတ္တော ဗ္ရဟ္မလောကေ နိဗ္ဗာနသညီ, တသ္မာ ဧဝမာဟ။ ဘဂဝာ ‘‘အယံ ဒေဝပုတ္တော အနိဗ္ဗာနဂာမီ သမာနော နိဗ္ဗာနဂာမိသညီ, ဟန္ဒသ္သ နိဗ္ဗာနဂာမိနော ဒသ္သေမီ’’တိ ဒုတိယံ ဂာထမာဟ။ စတုန္နံ ဩဃာနံ, သံသာရမဟောဃသ္သေဝ ဝာ ပရတီရဘာဝတော ပရတီရန္တိ နိဗ္ဗာနံ။ အမ္ဗုနိ ဇာတော အမ္ဗုဇော, မစ္ဆော။ သုတ္တဇာလံ ဆိန္ဒိတ္ဝာ မစ္ဆာ ဝိယ ကိလေသဇာလံ ဘိန္ဒိတ္ဝာ ဂမိသ္သန္တီတိ။
92. Pabbatataṭā sandamāno tathārūpo nadīnivattanapadesopi sambādhaṭṭhānatāya kaccho viyāti āha ‘‘pabbatakacchepī’’ti. Paṭipakkhadūrībhāvena seṭṭhaṭṭhena ca eko udetīti ekodi, ekaggatā. Tasmiṃ yogato ekaggacittā idha ekodī. Paṭipakkhato attānaṃ nipayanti visodhentīti nipakā, paññavanto. Tenāha ‘‘ekaggacittā cevā’’tiādi. Kāyādibhedaṃ ārammaṇaṃ sātisayāya satiyā sarantīti satā. Tenāha ‘‘satimanto’’ti. Sotthiṃ gamissantīti yathāvuttapadese magā sotthimanupaddavena vattissanti, evaṃ jhānalābhino sotthiṃ kilesehi anupaddutā vattissanti. Ayaṃ kira devaputto brahmaloke nibbānasaññī, tasmā evamāha. Bhagavā ‘‘ayaṃ devaputto anibbānagāmī samāno nibbānagāmisaññī, handassa nibbānagāmino dassemī’’ti dutiyaṃ gāthamāha. Catunnaṃ oghānaṃ, saṃsāramahoghasseva vā paratīrabhāvato paratīranti nibbānaṃ. Ambuni jāto ambujo, maccho. Suttajālaṃ chinditvā macchā viya kilesajālaṃ bhinditvā gamissantīti.
စန္ဒိမသသုတ္တဝဏ္ဏနာ နိဋ္ဌိတာ။
Candimasasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. စန္ဒိမသသုတ္တံ • 1. Candimasasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. စန္ဒိမသသုတ္တဝဏ္ဏနာ • 1. Candimasasuttavaṇṇanā
