| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
7. චෙතියපාටිහාරියපඤ්‌හො
7. Cetiyapāṭihāriyapañho
7. ‘‘භන්‌තෙ නාගසෙන, සබ්‌බෙසං පරිනිබ්‌බුතානං චෙතියෙ පාටිහීරං හොති, උදාහු එකච්‌චානං යෙව හොතී’’ති? ‘‘එකච්‌චානං, මහාරාජ, හොති, එකච්‌චානං න හොතී’’ති. ‘‘කතමෙසං, භන්‌තෙ, හොති, කතමෙසං න හොතී’’ති? ‘‘තිණ්‌ණන්‌නං, මහාරාජ, අඤ්‌ඤතරස්‌ස අධිට්‌ඨානා පරිනිබ්‌බුතස්‌ස චෙතියෙ පාටිහීරං හොති. කතමෙසං තිණ්‌ණන්‌නං? ඉධ, මහාරාජ, අරහා දෙවමනුස්‌සානං අනුකම්‌පාය තිට්‌ඨන්‌තොව අධිට්‌ඨාති ‘එවංනාම චෙතියෙ පාටිහීරං හොතූ’ති, තස්‌ස අධිට්‌ඨානවසෙන චෙතියෙ පාටිහීරං හොති, එවං අරහතො අධිට්‌ඨානවසෙන පරිනිබ්‌බුතස්‌ස චෙතියෙ පාටිහීරං හොති.
7. ‘‘Bhante nāgasena, sabbesaṃ parinibbutānaṃ cetiye pāṭihīraṃ hoti, udāhu ekaccānaṃ yeva hotī’’ti? ‘‘Ekaccānaṃ, mahārāja, hoti, ekaccānaṃ na hotī’’ti. ‘‘Katamesaṃ, bhante, hoti, katamesaṃ na hotī’’ti? ‘‘Tiṇṇannaṃ, mahārāja, aññatarassa adhiṭṭhānā parinibbutassa cetiye pāṭihīraṃ hoti. Katamesaṃ tiṇṇannaṃ? Idha, mahārāja, arahā devamanussānaṃ anukampāya tiṭṭhantova adhiṭṭhāti ‘evaṃnāma cetiye pāṭihīraṃ hotū’ti, tassa adhiṭṭhānavasena cetiye pāṭihīraṃ hoti, evaṃ arahato adhiṭṭhānavasena parinibbutassa cetiye pāṭihīraṃ hoti.
‘‘පුන චපරං, මහාරාජ, දෙවතා මනුස්‌සානං අනුකම්‌පාය පරිනිබ්‌බුතස්‌ස චෙතියෙ පාටිහීරං දස්‌සෙන්‌ති ‘ඉමිනා පාටිහීරෙන සද්‌ධම්‌මො නිච්‌චසම්‌පග්‌ගහිතො භවිස්‌සති, මනුස්‌සා ච පසන්‌නා කුසලෙන අභිවඩ්‌ඪිස්‌සන්‌තී’ති, එවං දෙවතානං අධිට්‌ඨානවසෙන පරිනිබ්‌බුතස්‌ස චෙතියෙ පාටිහීරං හොති.
‘‘Puna caparaṃ, mahārāja, devatā manussānaṃ anukampāya parinibbutassa cetiye pāṭihīraṃ dassenti ‘iminā pāṭihīrena saddhammo niccasampaggahito bhavissati, manussā ca pasannā kusalena abhivaḍḍhissantī’ti, evaṃ devatānaṃ adhiṭṭhānavasena parinibbutassa cetiye pāṭihīraṃ hoti.
‘‘පුන චපරං, මහාරාජ, ඉත්‌ථී වා පුරිසො වා සද්‌ධො පසන්‌නො පණ්‌ඩිතො බ්‍යත්‌තො මෙධාවී බුද්‌ධිසම්‌පන්‌නො යොනිසො චින්‌තයිත්‌වා ගන්‌ධං වා මාලං වා දුස්‌සං වා අඤ්‌ඤතරං වා කිඤ්‌චි අධිට්‌ඨහිත්‌වා චෙතියෙ උක්‌ඛිපති ‘එවංනාම හොතූ’ති, තස්‌සපි අධිට්‌ඨානවසෙන පරිනිබ්‌බුතස්‌ස චෙතියෙ පාටිහීරං හොති, එවං මනුස්‌සානං අධිට්‌ඨානවසෙන පරිනිබ්‌බුතස්‌ස චෙතියෙ පාටිහීරං හොති.
‘‘Puna caparaṃ, mahārāja, itthī vā puriso vā saddho pasanno paṇḍito byatto medhāvī buddhisampanno yoniso cintayitvā gandhaṃ vā mālaṃ vā dussaṃ vā aññataraṃ vā kiñci adhiṭṭhahitvā cetiye ukkhipati ‘evaṃnāma hotū’ti, tassapi adhiṭṭhānavasena parinibbutassa cetiye pāṭihīraṃ hoti, evaṃ manussānaṃ adhiṭṭhānavasena parinibbutassa cetiye pāṭihīraṃ hoti.
‘‘ඉමෙසං ඛො, මහාරාජ, තිණ්‌ණන්‌නං අඤ්‌ඤතරස්‌ස අධිට්‌ඨානවසෙන පරිනිබ්‌බුතස්‌ස චෙතියෙ පාටිහීරං හොති.
‘‘Imesaṃ kho, mahārāja, tiṇṇannaṃ aññatarassa adhiṭṭhānavasena parinibbutassa cetiye pāṭihīraṃ hoti.
‘‘යදි, මහාරාජ, තෙසං අධිට්‌ඨානං න හොති, ඛීණාසවස්‌සපි ඡළභිඤ්‌ඤස්‌ස චෙතොවසිප්‌පත්‌තස්‌ස චෙතියෙ පාටිහීරං න හොති, අසතිපි , මහාරාජ, පාටිහීරෙ චරිතං දිස්‌වා සුපරිසුද්‌ධං ඔකප්‌පෙතබ්‌බං නිට්‌ඨං ගන්‌තබ්‌බං සද්‌දහිතබ්‌බං ‘සුපරිනිබ්‌බුතො අයං බුද්‌ධපුත්‌තො’’’ති. ‘‘සාධු, භන්‌තෙ නාගසෙන, එවමෙතං තථා සම්‌පටිච්‌ඡාමී’’ති.
‘‘Yadi, mahārāja, tesaṃ adhiṭṭhānaṃ na hoti, khīṇāsavassapi chaḷabhiññassa cetovasippattassa cetiye pāṭihīraṃ na hoti, asatipi , mahārāja, pāṭihīre caritaṃ disvā suparisuddhaṃ okappetabbaṃ niṭṭhaṃ gantabbaṃ saddahitabbaṃ ‘suparinibbuto ayaṃ buddhaputto’’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
චෙතියපාටිහාරියපඤ්‌හො සත්‌තමො.
Cetiyapāṭihāriyapañho sattamo.
