| Library / Tipiṭaka / තිපිටක • Tipiṭaka / ධම්‌මසඞ්‌ගණි-අට්‌ඨකථා • Dhammasaṅgaṇi-aṭṭhakathā |
ඡක්‌කාදිනිද්‌දෙසවණ්‌ණනා
Chakkādiniddesavaṇṇanā
972-4. ඡබ්‌බිධාදිසඞ්‌ගහානං තිණ්‌ණං ඔසානපදස්‌ස භෙදාභාවතො ආදිතො පට්‌ඨාය අපුච්‌ඡිත්‌වාව නිද්‌දෙසො කතො. තත්‌ථ චක්‌ඛුවිඤ්‌ඤාණෙන ජානිතුං සක්‌කාති චක්‌ඛුවිඤ්‌ඤෙය්‍යං…පෙ.… මනොවිඤ්‌ඤාණෙන ජානිතුං සක්‌කාති මනොවිඤ්‌ඤෙය්‍යං. තිවිධාය මනොධාතුයා ජානිතුං සක්‌කාති මනොධාතුවිඤ්‌ඤෙය්‍යං සබ්‌බං රූපන්‌ති එත්‌ථ යස්‌මා එකං රූපම්‌පි මනොවිඤ්‌ඤාණධාතුයා අජානිතබ්‌බං නාම නත්‌ථි, තස්‌මා ‘සබ්‌බං රූප’න්‌ති වුත්‌තං. සම්‌මාසම්‌බුද්‌ධෙන හි අභිධම්‌මං පත්‌වා නයං කාතුං යුත්‌තට්‌ඨානෙ නයො අකතො නාම නත්‌ථි. ඉදඤ්‌ච එකරූපස්‌සාපි මනොවිඤ්‌ඤාණධාතුයා අජානිතබ්‌බස්‌ස අභාවෙන නයං කාතුං යුත්‌තට්‌ඨානං නාම, තස්‌මා නයං කරොන්‌තො ‘සබ්‌බං රූප’න්‌ති ආහ.
972-4. Chabbidhādisaṅgahānaṃ tiṇṇaṃ osānapadassa bhedābhāvato ādito paṭṭhāya apucchitvāva niddeso kato. Tattha cakkhuviññāṇena jānituṃ sakkāti cakkhuviññeyyaṃ…pe… manoviññāṇena jānituṃ sakkāti manoviññeyyaṃ. Tividhāya manodhātuyā jānituṃ sakkāti manodhātuviññeyyaṃ sabbaṃ rūpanti ettha yasmā ekaṃ rūpampi manoviññāṇadhātuyā ajānitabbaṃ nāma natthi, tasmā ‘sabbaṃ rūpa’nti vuttaṃ. Sammāsambuddhena hi abhidhammaṃ patvā nayaṃ kātuṃ yuttaṭṭhāne nayo akato nāma natthi. Idañca ekarūpassāpi manoviññāṇadhātuyā ajānitabbassa abhāvena nayaṃ kātuṃ yuttaṭṭhānaṃ nāma, tasmā nayaṃ karonto ‘sabbaṃ rūpa’nti āha.
974. සුඛසම්‌ඵස්‌සොති සුඛවෙදනාපටිලාභපච්‌චයො. දුක්‌ඛසම්‌ඵස්‌සොති දුක්‌ඛවෙදනාපටිලාභපච්‌චයො. ඉධාපි ඵොට්‌ඨබ්‌බාරම්‌මණස්‌ස සුඛදුක්‌ඛස්‌ස සබ්‌භාවතො අයං නයො දින්‌නො.
974. Sukhasamphassoti sukhavedanāpaṭilābhapaccayo. Dukkhasamphassoti dukkhavedanāpaṭilābhapaccayo. Idhāpi phoṭṭhabbārammaṇassa sukhadukkhassa sabbhāvato ayaṃ nayo dinno.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / ධම්‌මසඞ්‌ගණීපාළි • Dhammasaṅgaṇīpāḷi / රූපවිභත්‌ති • Rūpavibhatti
