| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
2. චොරිවුට්‌ඨාපිකාසික්‌ඛාපදවණ්‌ණනා
2. Corivuṭṭhāpikāsikkhāpadavaṇṇanā
මල්‌ලගණභටිපුත්‌තගණාදිකන්‌තිආදීසු (සාරත්‌ථ. ටී. පාචිත්‌තිය 3.683) මල්‌ලගණො නාම නාරායනභත්‌තිකො තත්‌ථ තත්‌ථ පානීයට්‌ඨපනපොක්‌ඛරණිඛණනාදිපුඤ්‌ඤකම්‌මකාරකො ගණො. භටිපුත්‌තගණො නාම කුමාරභත්‌තිකගණො. ධම්‌මගණොති සාසනභත්‌තිකො අනෙකප්‌පකාරපුඤ්‌ඤකම්‌මකාරකො ගණො. ගන්‌ධිකසෙණීති අනෙකප්‌පකාරසුගන්‌ධිවිකතිකාරකො ගණො. දුස්‌සිකසෙණීති දුස්‌සවාණිජසමූහො, පෙසකාරගණොති අත්‌ථො.
Mallagaṇabhaṭiputtagaṇādikantiādīsu (sārattha. ṭī. pācittiya 3.683) mallagaṇo nāma nārāyanabhattiko tattha tattha pānīyaṭṭhapanapokkharaṇikhaṇanādipuññakammakārako gaṇo. Bhaṭiputtagaṇo nāma kumārabhattikagaṇo. Dhammagaṇoti sāsanabhattiko anekappakārapuññakammakārako gaṇo. Gandhikaseṇīti anekappakārasugandhivikatikārako gaṇo. Dussikaseṇīti dussavāṇijasamūho, pesakāragaṇoti attho.
වුට්‌ඨාපෙන්‌තියාති උපසම්‌පාදෙන්‌තියා. කෙනචි කරණීයෙන පක්‌කන්‌තාසු භික්‌ඛුනීසු අගන්‌ත්‌වා ඛණ්‌ඩසීමං යථානිසින්‌නට්‌ඨානෙයෙව අත්‌තනො නිස්‌සිතකපරිසාය සද්‌ධිං වුට්‌ඨාපෙන්‌තියා වාචාචිත්‌තතො සමුට්‌ඨාති (පාචි. අට්‌ඨ. 683), අඤ්‌ඤං සීමං වා නදිං වා ගන්‌ත්‌වා වුට්‌ඨාපෙන්‌තියා කායවාචාචිත්‌තතො සමුට්‌ඨාතීති ආහ ‘‘චොරිවුට්‌ඨාපනසමුට්‌ඨාන’’න්‌ති. අනාපුච්‌ඡා වුට්‌ඨාපනවසෙන කිරියාකිරියං. පඤ්‌ඤත්‌තිං අජානන්‌තා අරියාපි වුට්‌ඨාපෙන්‌තීති වා කම්‌මවාචාපරියොසානෙ ආපත්‌තික්‌ඛණෙ විපාකාබ්‍යාකතසමඞ්‌ගිතාවසෙන වා තිචිත්‌තං.
Vuṭṭhāpentiyāti upasampādentiyā. Kenaci karaṇīyena pakkantāsu bhikkhunīsu agantvā khaṇḍasīmaṃ yathānisinnaṭṭhāneyeva attano nissitakaparisāya saddhiṃ vuṭṭhāpentiyā vācācittato samuṭṭhāti (pāci. aṭṭha. 683), aññaṃ sīmaṃ vā nadiṃ vā gantvā vuṭṭhāpentiyā kāyavācācittato samuṭṭhātīti āha ‘‘corivuṭṭhāpanasamuṭṭhāna’’nti. Anāpucchā vuṭṭhāpanavasena kiriyākiriyaṃ. Paññattiṃ ajānantā ariyāpi vuṭṭhāpentīti vā kammavācāpariyosāne āpattikkhaṇe vipākābyākatasamaṅgitāvasena vā ticittaṃ.
චොරිවුට්‌ඨාපිකාසික්‌ඛාපදවණ්‌ණනා නිට්‌ඨිතා.
Corivuṭṭhāpikāsikkhāpadavaṇṇanā niṭṭhitā.
