| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
8. දක්‌ඛිණසුත්‌තවණ්‌ණනා
8. Dakkhiṇasuttavaṇṇanā
78. අට්‌ඨමෙ දානසඞ්‌ඛාතාය දක්‌ඛිණායාති දෙය්‍යධම්‌මසඞ්‌ඛාතාය දක්‌ඛිණාය. විසුද්‌ධි නාම මහාජුතිකතා. සා පන මහප්‌ඵලතාය වෙදිතබ්‌බාති ආහ ‘‘මහප්‌ඵලභාවෙනා’’ති. විසුජ්‌ඣතීති න කිලිස්‌සති, අමලිනා මහාජුතිකා මහාවිප්‌ඵාරා හොතීති අත්‌ථො. සුචිධම්‌මොති රාගාදිඅසුචිවිධමනෙන සුචිසභාවො. ලාමකධම්‌මොති හීනසභාවො පාපකිරියාය. අකුසලධම්‌මා හි එකන්‌තනිහීනා. ජූජකො සීලවා කල්‍යාණධම්‌මො න හොති, තස්‌ස මහාබොධිසත්‌තස්‌ස අත්‌තනො පුත්‌තදානං දානපාරමියා මත්‌ථකං ගණ්‌හන්‌තං මහාපථවිකම්‌පනසමත්‌ථං ජාතං. ස්‌වායං දායකගුණොති ආහ ‘‘වෙස්‌සන්‌තරමහාරාජා කථෙතබ්‌බො’’තිආදි. උද්‌ධරතීති බහුලං පාපකම්‌මවසෙන ලද්‌ධබ්‌බවිනිපාතතො උද්‌ධරති, තස්‌මා නත්‌ථි මය්‌හං කිඤ්‌චි චිත්‌තස්‌ස අඤ්‌ඤත්‌ථත්‌තන්‌ති අධිප්‌පායො.
78. Aṭṭhame dānasaṅkhātāya dakkhiṇāyāti deyyadhammasaṅkhātāya dakkhiṇāya. Visuddhi nāma mahājutikatā. Sā pana mahapphalatāya veditabbāti āha ‘‘mahapphalabhāvenā’’ti. Visujjhatīti na kilissati, amalinā mahājutikā mahāvipphārā hotīti attho. Sucidhammoti rāgādiasucividhamanena sucisabhāvo. Lāmakadhammoti hīnasabhāvo pāpakiriyāya. Akusaladhammā hi ekantanihīnā. Jūjako sīlavā kalyāṇadhammo na hoti, tassa mahābodhisattassa attano puttadānaṃ dānapāramiyā matthakaṃ gaṇhantaṃ mahāpathavikampanasamatthaṃ jātaṃ. Svāyaṃ dāyakaguṇoti āha ‘‘vessantaramahārājā kathetabbo’’tiādi. Uddharatīti bahulaṃ pāpakammavasena laddhabbavinipātato uddharati, tasmā natthi mayhaṃ kiñci cittassa aññatthattanti adhippāyo.
පෙතදක්‌ඛිණන්‌ති පෙතෙ උද්‌දිස්‌ස දාතබ්‌බදක්‌ඛිණං. පාපිතකාලෙයෙවාති ‘‘ඉදං දානං අසුකස්‌ස පෙතස්‌ස හොතූ’’ති තංඋද්‌දිසනවසෙන පත්‌තියා පාපිතකාලෙයෙව. අස්‌සාති පෙතස්‌ස. පාපුණීති ඵලසම්‌පත්‌තිලභාපනවසෙන පාපුණි. අයඤ්‌හි පෙතෙ උද්‌දිස්‌ස දානෙ ධම්‌මතා. තදා කොසලරඤ්‌ඤො පරිච්‌චාගවසෙන අතිවිය දානජ්‌ඣාසයතං බුද්‌ධප්‌පමුඛස්‌ස ච සඞ්‌ඝස්‌ස උක්‌කංසගතගුණවිසිට්‌ඨතං සන්‌ධායාහ ‘‘අසදිසදානං කථෙතබ්‌බ’’න්‌ති.
Petadakkhiṇanti pete uddissa dātabbadakkhiṇaṃ. Pāpitakāleyevāti ‘‘idaṃ dānaṃ asukassa petassa hotū’’ti taṃuddisanavasena pattiyā pāpitakāleyeva. Assāti petassa. Pāpuṇīti phalasampattilabhāpanavasena pāpuṇi. Ayañhi pete uddissa dāne dhammatā. Tadā kosalarañño pariccāgavasena ativiya dānajjhāsayataṃ buddhappamukhassa ca saṅghassa ukkaṃsagataguṇavisiṭṭhataṃ sandhāyāha ‘‘asadisadānaṃ kathetabba’’nti.
දක්‌ඛිණසුත්‌තවණ්‌ණනා නිට්‌ඨිතා.
Dakkhiṇasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 8. දක්‌ඛිණසුත්‌තං • 8. Dakkhiṇasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 8. දක්‌ඛිණසුත්‌තවණ්‌ණනා • 8. Dakkhiṇasuttavaṇṇanā
