| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga |
၁၀. ဒသမသင္ဃာဒိသေသသိက္ခာပဒံ
10. Dasamasaṅghādisesasikkhāpadaṃ
၇၂၇. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန ထုလ္လနန္ဒာ ဘိက္ခုနီသင္ဃေန သမနုဘဋ္ဌာ ဘိက္ခုနိယော ဧဝံ ဝဒေတိ – ‘‘သံသဋ္ဌာဝ အယ္ယေ, တုမ္ဟေ ဝိဟရထ။ မာ တုမ္ဟေ နာနာ ဝိဟရိတ္ထ။ သန္တိ သင္ဃေ အညာပိ ဘိက္ခုနိယော ဧဝာစာရာ ဧဝံသဒ္ဒာ ဧဝံသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ တာ သင္ဃော န ကိဉ္စိ အာဟ။ တုမ္ဟညေဝ 1 သင္ဃော ဥညာယ ပရိဘဝေန အက္ခန္တိယာ ဝေဘသ္သိယာ 2 ဒုဗ္ဗလ္ယာ ဧဝမာဟ – ‘ဘဂိနိယော ခော သံသဋ္ဌာ ဝိဟရန္တိ ပာပာစာရာ ပာပသဒ္ဒာ ပာပသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ ဝိဝိစ္စထာယ္ယေ။ ဝိဝေကညေဝ ဘဂိနီနံ သင္ဃော ဝဏ္ဏေတီ’’’တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ကထဉ္ဟိ နာမ အယ္ယာ ထုလ္လနန္ဒာ ဘိက္ခုနီ သင္ဃေန သမနုဘဋ္ဌာ ဘိက္ခုနိယော ဧဝံ ဝက္ခတိ – သံသဋ္ဌာဝ အယ္ယေ, တုမ္ဟေ ဝိဟရထ။ မာ တုမ္ဟေ နာနာ ဝိဟရိတ္ထ။ သန္တိ သင္ဃေ အညာပိ ဘိက္ခုနိယော။ပေ.။ ဝိဝိစ္စထာယ္ယေ။ ဝိဝေကညေဝ ဘဂိနီနံ သင္ဃော ဝဏ္ဏေတီတိ။ပေ.။ သစ္စံ ကိရ, ဘိက္ခဝေ, ထုလ္လနန္ဒာ ဘိက္ခုနီ သင္ဃေန သမနုဘဋ္ဌာ ဘိက္ခုနိယော ဧဝံ ဝဒေတိ – သံသဋ္ဌာဝ အယ္ယေ တုမ္ဟေ ဝိဟရထ။ မာ တုမ္ဟေ နာနာ ဝိဟရိတ္ထ။ သန္တိ သင္ဃေ အညာပိ ဘိက္ခုနိယော ဧဝာစာရာ ဧဝံသဒ္ဒာ ဧဝံသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ တာ သင္ဃော န ကိဉ္စိ အာဟ။ တုမ္ဟညေဝ သင္ဃော ဥညာယ ပရိဘဝေန အက္ခန္တိယာ ဝေဘသ္သိယာ ဒုဗ္ဗလ္ယာ ဧဝမာဟ – ဘဂိနိယော ခော သံသဋ္ဌာ ဝိဟရန္တိ ပာပာစာရာ ပာပသဒ္ဒာ ပာပသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ ဝိဝိစ္စထာယ္ယေ။ ဝိဝေကညေဝ ဘဂိနီနံ သင္ဃော ဝဏ္ဏေတီတိ? ‘‘သစ္စံ ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ, ထုလ္လနန္ဒာ ဘိက္ခုနီ သင္ဃေန သမနုဘဋ္ဌာ ဘိက္ခုနိယော ဧဝံ ဝက္ခတိ – သံသဋ္ဌာဝ အယ္ယေ, တုမ္ဟေ ဝိဟရထ။ မာ တုမ္ဟေ နာနာ ဝိဟရိတ္ထ။ သန္တိ သင္ဃေ အညာပိ ဘိက္ခုနိယော။ပေ.။ ဝိဝိစ္စထာယ္ယေ။ ဝိဝေကညေဝ ဘဂိနီနံ သင္ဃော ဝဏ္ဏေတီတိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
727. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunīsaṅghena samanubhaṭṭhā bhikkhuniyo evaṃ vadeti – ‘‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva 3 saṅgho uññāya paribhavena akkhantiyā vebhassiyā 4 dubbalyā evamāha – ‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’’’ti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma ayyā thullanandā bhikkhunī saṅghena samanubhaṭṭhā bhikkhuniyo evaṃ vakkhati – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetīti…pe… saccaṃ kira, bhikkhave, thullanandā bhikkhunī saṅghena samanubhaṭṭhā bhikkhuniyo evaṃ vadeti – saṃsaṭṭhāva ayye tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetīti? ‘‘Saccaṃ bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī saṅghena samanubhaṭṭhā bhikkhuniyo evaṃ vakkhati – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetīti! Netaṃ, bhikkhave, appasannānaṃ vā pasādāya…pe… evañca pana bhikkhave, bhikkhuniyo imaṃ sikkhāpadaṃ uddisantu –
၇၂၈. ‘‘ယာ ပန ဘိက္ခုနီ ဧဝံ ဝဒေယ္ယ – ‘သံသဋ္ဌာဝ အယ္ယေ, တုမ္ဟေ ဝိဟရထ။ မာ တုမ္ဟေ နာနာ ဝိဟရိတ္ထ။ သန္တိ သင္ဃေ အညာပိ ဘိက္ခုနိယော ဧဝာစာရာ ဧဝံသဒ္ဒာ ဧဝံသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ တာ သင္ဃော န ကိဉ္စိ အာဟ။ တုမ္ဟညေဝ သင္ဃော ဥညာယ ပရိဘဝေန အက္ခန္တိယာ ဝေဘသ္သိယာ ဒုဗ္ဗလ္ယာ ဧဝမာဟ – ဘဂိနိယော ခော သံသဋ္ဌာ ဝိဟရန္တိ ပာပာစာရာ ပာပသဒ္ဒာ ပာပသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ ဝိဝိစ္စထာယ္ယေ။ ဝိဝေကညေဝ ဘဂိနီနံ သင္ဃော ဝဏ္ဏေတီ’တိ။ သာ ဘိက္ခုနီ ဘိက္ခုနီဟိ ဧဝမသ္သ ဝစနီယာ – ‘မာ, အယ္ယေ, ဧဝံ အဝစ – သံသဋ္ဌာဝ အယ္ယေ, တုမ္ဟေ ဝိဟရထ။ မာ တုမ္ဟေ နာနာ ဝိဟရိတ္ထ။ သန္တိ သင္ဃေ အညာပိ ဘိက္ခုနိယော ဧဝာစာရာ ဧဝံသဒ္ဒာ ဧဝံသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ တာ သင္ဃော န ကိဉ္စိ အာဟ။ တုမ္ဟညေဝ သင္ဃော ဥညာယ ပရိဘဝေန အက္ခန္တိယာ ဝေဘသ္သိယာ ဒုဗ္ဗလ္ယာ ဧဝမာဟ – ဘဂိနိယော ခော သံသဋ္ဌာ ဝိဟရန္တိ ပာပာစာရာ ပာပသဒ္ဒာ ပာပသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ ဝိဝိစ္စထာယ္ယေ။ ဝိဝေကညေဝ ဘဂိနီနံ သင္ဃော ဝဏ္ဏေတီ’တိ။ ဧဝဉ္စ သာ ဘိက္ခုနီ ဘိက္ခုနီဟိ ဝုစ္စမာနာ တထေဝ ပဂ္ဂဏ္ဟေယ္ယ, သာ ဘိက္ခုနီ ဘိက္ခုနီဟိ ယာဝတတိယံ သမနုဘာသိတဗ္ဗာ တသ္သ ပဋိနိသ္သဂ္ဂာယ။ ယာဝတတိယဉ္စေ သမနုဘာသီယမာနာ တံ ပဋိနိသ္သဇ္ဇေယ္ယ, ဣစ္စေတံ ကုသလံ; နော စေ ပဋိနိသ္သဇ္ဇေယ္ယ, အယမ္ပိ ဘိက္ခုနီ ယာဝတတိယကံ ဓမ္မံ အာပန္နာ နိသ္သာရဏီယံ သင္ဃာဒိသေသ’’န္တိ။
728.‘‘Yāpana bhikkhunī evaṃ vadeyya – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Sā bhikkhunī bhikkhunīhi evamassa vacanīyā – ‘mā, ayye, evaṃ avaca – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsīyamānā taṃ paṭinissajjeyya, iccetaṃ kusalaṃ; no ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesa’’nti.
၇၂၉. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။
729.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ဧဝံ ဝဒေယ္ယာတိ – ‘‘သံသဋ္ဌာဝ အယ္ယေ, တုမ္ဟေ ဝိဟရထ။ မာ တုမ္ဟေ နာနာ ဝိဟရိတ္ထ။ သန္တိ သင္ဃေ အညာပိ ဘိက္ခုနိယော ဧဝာစာရာ ဧဝံသဒ္ဒာ ဧဝံသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ တာ သင္ဃော န ကိဉ္စိ အာဟ’’။
Evaṃ vadeyyāti – ‘‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha’’.
တုမ္ဟညေဝ သင္ဃော ဥညာယာတိ အဝညာယ။
Tumhaññeva saṅgho uññāyāti avaññāya.
ပရိဘဝေနာတိ ပာရိဘဗ္ယတာ။
Paribhavenāti pāribhabyatā.
အက္ခန္တိယာတိ ကောပေန။
Akkhantiyāti kopena.
ဒုဗ္ဗလ္ယာတိ အပက္ခတာ။
Dubbalyāti apakkhatā.
ဧဝမာဟ – ‘‘ဘဂိနိယော ခော သံသဋ္ဌာ ဝိဟရန္တိ ပာပာစာရာ ပာပသဒ္ဒာ ပာပသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ ဝိစိစ္စထာယ္ယေ။ ဝိဝေကညေဝ ဘဂိနီနံ သင္ဃော ဝဏ္ဏေတီ’’တိ။
Evamāha – ‘‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viciccathāyye. Vivekaññeva bhaginīnaṃ saṅgho vaṇṇetī’’ti.
သာ ဘိက္ခုနီတိ ယာ သာ ဧဝံဝာဒိနီ ဘိက္ခုနီ။
Sā bhikkhunīti yā sā evaṃvādinī bhikkhunī.
ဘိက္ခုနီဟီတိ အညာဟိ ဘိက္ခုနီဟိ။
Bhikkhunīhīti aññāhi bhikkhunīhi.
ယာ ပသ္သန္တိ ယာ သုဏန္တိ တာဟိ ဝတ္တဗ္ဗာ – ‘‘မာယ္ယေ, ဧဝံ အဝစ – ‘သံသဋ္ဌာဝ အယ္ယေ, တုမ္ဟေ ဝိဟရထ။ မာ တုမ္ဟေ နာနာ ဝိဟရိတ္ထ။ သန္တိ သင္ဃေ အညာပိ ဘိက္ခုနိယော။ပေ.။ ဝိဝိစ္စထာယ္ယေ။ ဝိဝေကညေဝ ဘဂိနီနံ သင္ဃော ဝဏ္ဏေတီ’’တိ။ ဒုတိယမ္ပိ ဝတ္တဗ္ဗာ။ တတိယမ္ပိ ဝတ္တဗ္ဗာ။ သစေ ပဋိနိသ္သဇ္ဇတိ, ဣစ္စေတံ ကုသလံ; နော စေ ပဋိနိသ္သဇ္ဇတိ, အာပတ္တိ ဒုက္ကဋသ္သ။ သုတ္ဝာ န ဝဒန္တိ, အာပတ္တိ ဒုက္ကဋသ္သ။ သာ ဘိက္ခုနီ သင္ဃမဇ္ဈမ္ပိ အာကဍ္ဎိတ္ဝာ ဝတ္တဗ္ဗာ – ‘‘မာယ္ယေ, ဧဝံ အဝစ – ‘သံသဋ္ဌာဝ အယ္ယေ, တုမ္ဟေ ဝိဟရထ။ မာ တုမ္ဟေ နာနာ ဝိဟရိတ္ထ။ သန္တိ သင္ဃေ အညာပိ ဘိက္ခုနိယော။ပေ.။ ဝိဝိစ္စထာယ္ယေ။ ဝိဝေကညေဝ ဘဂိနီနံ သင္ဃော ဝဏ္ဏေတီ’’’တိ။ ဒုတိယမ္ပိ ဝတ္တဗ္ဗာ။ တတိယမ္ပိ ဝတ္တဗ္ဗာ။ သစေ ပဋိနိသ္သဇ္ဇတိ, ဣစ္စေတံ ကုသလံ; နော စေ ပဋိနိသ္သဇ္ဇတိ, အာပတ္တိ ဒုက္ကဋသ္သ။ သာ ဘိက္ခုနီ သမနုဘာသိတဗ္ဗာ။ ဧဝဉ္စ ပန, ဘိက္ခဝေ, သမနုဘာသိတဗ္ဗာ။ ဗ္ယတ္တာယ ဘိက္ခုနိယာ ပဋိဗလာယ သင္ဃော ဉာပေတဗ္ဗော –
Yā passanti yā suṇanti tāhi vattabbā – ‘‘māyye, evaṃ avaca – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sutvā na vadanti, āpatti dukkaṭassa. Sā bhikkhunī saṅghamajjhampi ākaḍḍhitvā vattabbā – ‘‘māyye, evaṃ avaca – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetī’’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sā bhikkhunī samanubhāsitabbā. Evañca pana, bhikkhave, samanubhāsitabbā. Byattāya bhikkhuniyā paṭibalāya saṅgho ñāpetabbo –
၇၃၀. ‘‘သုဏာတု မေ, အယ္ယေ, သင္ဃော။ အယံ ဣတ္ထန္နာမာ ဘိက္ခုနီ သင္ဃေန သမနုဘဋ္ဌာ ဘိက္ခုနိယော ဧဝံ ဝဒေတိ – ‘သံသဋ္ဌာဝ အယ္ယေ, တုမ္ဟေ ဝိဟရထ။ မာ တုမ္ဟေ နာနာ ဝိဟရိတ္ထ။ သန္တိ သင္ဃေ အညာပိ ဘိက္ခုနိယော ဧဝာစာရာ ဧဝံသဒ္ဒာ ဧဝံသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ တာ သင္ဃော န ကိဉ္စိ အာဟ။ တုမ္ဟညေဝ သင္ဃော ဥညာယ ပရိဘဝေန အက္ခန္တိယာ ဝေဘသ္သိယာ ဒုဗ္ဗလ္ယာ ဧဝမာဟ – ဘဂိနိယော ခော သံသဋ္ဌာ ဝိဟရန္တိ ပာပာစာရာ ပာပသဒ္ဒာ ပာပသိလောကာ, ဘိက္ခုနိသင္ဃသ္သ ဝိဟေသိကာ အညမညိသ္သာ ဝဇ္ဇပ္ပဋိစ္ဆာဒိကာ ။ ဝိဝိစ္စထာယ္ယေ။ ဝိဝေကညေဝ ဘဂိနီနံ သင္ဃော ဝဏ္ဏေတီ’တိ။ သာ တံ ဝတ္ထုံ န ပဋိနိသ္သဇ္ဇတိ။ ယဒိ သင္ဃသ္သ ပတ္တကလ္လံ, သင္ဃော ဣတ္ထန္နာမံ ဘိက္ခုနိံ သမနုဘာသေယ္ယ တသ္သ ဝတ္ထုသ္သ ပဋိနိသ္သဂ္ဂာယ။ ဧသာ ဉတ္တိ။
730. ‘‘Suṇātu me, ayye, saṅgho. Ayaṃ itthannāmā bhikkhunī saṅghena samanubhaṭṭhā bhikkhuniyo evaṃ vadeti – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā aññamaññissā vajjappaṭicchādikā . Viviccathāyye. Vivekaññeva bhaginīnaṃ saṅgho vaṇṇetī’ti. Sā taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuniṃ samanubhāseyya tassa vatthussa paṭinissaggāya. Esā ñatti.
‘‘သုဏာတု မေ, အယ္ယေ, သင္ဃော။ အယံ ဣတ္ထန္နာမာ ဘိက္ခုနီ သင္ဃေန သမနုဘဋ္ဌာ ဘိက္ခုနိယော ဧဝံ ဝဒေတိ – ‘သံသဋ္ဌာဝ အယ္ယေ, တုမ္ဟေ ဝိဟရထ။ မာ တုမ္ဟေ နာနာ ဝိဟရိတ္ထ။ သန္တိ သင္ဃေ အညာပိ ဘိက္ခုနိယော ဧဝာစာရာ ဧဝံသဒ္ဒာ ဧဝံသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ တာ သင္ဃော န ကိဉ္စိ အာဟ။ တုမ္ဟညေဝ သင္ဃော ဥညာယ ပရိဘဝေန အက္ခန္တိယာ ဝေဘသ္သိယာ ဒုဗ္ဗလ္ယာ ဧဝမာဟ – ဘဂိနိယော ခော သံသဋ္ဌာ ဝိဟရန္တိ ပာပာစာရာ ပာပသဒ္ဒာ ပာပသိလောကာ, ဘိက္ခုနိသင္ဃသ္သ ဝိဟေသိကာ, အညမညိသ္သာ ဝဇ္ဇပ္ပဋိစ္ဆာဒိကာ။ ဝိဝိစ္စထာယ္ယေ။ ဝိဝေကညေဝ ဘဂိနီနံ သင္ဃော ဝဏ္ဏေတီ’တိ။ သာ တံ ဝတ္ထုံ န ပဋိနိသ္သဇ္ဇတိ။ သင္ဃော ဣတ္ထန္နာမံ ဘိက္ခုနိံ သမနုဘာသတိ တသ္သ ဝတ္ထုသ္သ ပဋိနိသ္သဂ္ဂာယ။ ယသ္သာ အယ္ယာယ ခမတိ ဣတ္ထန္နာမာယ ဘိက္ခုနိယာ သမနုဘာသနာ တသ္သ ဝတ္ထုသ္သ ပဋိနိသ္သဂ္ဂာယ, သာ တုဏ္ဟသ္သ; ယသ္သာ နက္ခမတိ, သာ ဘာသေယ္ယ။
‘‘Suṇātu me, ayye, saṅgho. Ayaṃ itthannāmā bhikkhunī saṅghena samanubhaṭṭhā bhikkhuniyo evaṃ vadeti – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Sā taṃ vatthuṃ na paṭinissajjati. Saṅgho itthannāmaṃ bhikkhuniṃ samanubhāsati tassa vatthussa paṭinissaggāya. Yassā ayyāya khamati itthannāmāya bhikkhuniyā samanubhāsanā tassa vatthussa paṭinissaggāya, sā tuṇhassa; yassā nakkhamati, sā bhāseyya.
‘‘ဒုတိယမ္ပိ ဧတမတ္ထံ ဝဒာမိ။ပေ.။ တတိယမ္ပိ ဧတမတ္ထံ ဝဒာမိ။ပေ.။။
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘သမနုဘဋ္ဌာ သင္ဃေန ဣတ္ထန္နာမာ ဘိက္ခုနီ တသ္သ ဝတ္ထုသ္သ ပဋိနိသ္သဂ္ဂာယ။ ခမတိ သင္ဃသ္သ, တသ္မာ တုဏ္ဟီ, ဧဝမေတံ ဓာရယာမီ’’တိ။
‘‘Samanubhaṭṭhā saṅghena itthannāmā bhikkhunī tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
ဉတ္တိယာ ဒုက္ကဋံ, ဒ္ဝီဟိ ကမ္မဝာစာဟိ ထုလ္လစ္စယာ, ကမ္မဝာစာပရိယောသာနေ အာပတ္တိ သင္ဃာဒိသေသသ္သ။ သင္ဃာဒိသေသံ အဇ္ဈာပဇ္ဇန္တိယာ ဉတ္တိယာ ဒုက္ကဋံ, ဒ္ဝီဟိ ကမ္မဝာစာဟိ ထုလ္လစ္စယာ ပဋိပ္ပသ္သမ္ဘန္တိ။
Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantiyā ñattiyā dukkaṭaṃ, dvīhi kammavācāhi thullaccayā paṭippassambhanti.
အယမ္ပီတိ ပုရိမာယော ဥပာဒာယ ဝုစ္စတိ။
Ayampīti purimāyo upādāya vuccati.
ယာဝတတိယကန္တိ ယာဝတတိယံ သမနုဘာသနာယ အာပဇ္ဇတိ, န သဟဝတ္ထုဇ္ဈာစာရာ။
Yāvatatiyakanti yāvatatiyaṃ samanubhāsanāya āpajjati, na sahavatthujjhācārā.
နိသ္သာရဏီယန္တိ သင္ဃမ္ဟာ နိသ္သာရီယတိ။
Nissāraṇīyanti saṅghamhā nissārīyati.
သင္ဃာဒိသေသောတိ သင္ဃောဝ တသ္သာ အာပတ္တိယာ မာနတ္တံ ဒေတိ, မူလာယ ပဋိကသ္သတိ, အဗ္ဘေတိ, န သမ္ဗဟုလာ န ဧကာ ဘိက္ခုနီ။ တေန ဝုစ္စတိ ‘‘သင္ဃာဒိသေသော’’တိ။ တသ္သေဝ အာပတ္တိနိကာယသ္သ နာမကမ္မံ အဓိဝစနံ, တေနပိ ဝုစ္စတိ ‘‘သင္ဃာဒိသေသော’’တိ။
Saṅghādisesoti saṅghova tassā āpattiyā mānattaṃ deti, mūlāya paṭikassati, abbheti, na sambahulā na ekā bhikkhunī. Tena vuccati ‘‘saṅghādiseso’’ti. Tasseva āpattinikāyassa nāmakammaṃ adhivacanaṃ, tenapi vuccati ‘‘saṅghādiseso’’ti.
၇၃၁. ဓမ္မကမ္မေ ဓမ္မကမ္မသညာ န ပဋိနိသ္သဇ္ဇတိ, အာပတ္တိ သင္ဃာဒိသေသသ္သ ။ ဓမ္မကမ္မေ ဝေမတိကာ န ပဋိနိသ္သဇ္ဇတိ, အာပတ္တိ သင္ဃာဒိသေသသ္သ။ ဓမ္မကမ္မေ အဓမ္မကမ္မသညာ န ပဋိနိသ္သဇ္ဇတိ, အာပတ္တိ သင္ဃာဒိသေသသ္သ။
731. Dhammakamme dhammakammasaññā na paṭinissajjati, āpatti saṅghādisesassa . Dhammakamme vematikā na paṭinissajjati, āpatti saṅghādisesassa. Dhammakamme adhammakammasaññā na paṭinissajjati, āpatti saṅghādisesassa.
အဓမ္မကမ္မေ ဓမ္မကမ္မသညာ, အာပတ္တိ ဒုက္ကဋသ္သ။ အဓမ္မကမ္မေ ဝေမတိကာ, အာပတ္တိ ဒုက္ကဋသ္သ။ အဓမ္မကမ္မေ အဓမ္မကမ္မသညာ, အာပတ္တိ ဒုက္ကဋသ္သ။
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
၇၃၂. အနာပတ္တိ အသမနုဘာသန္တိယာ, ပဋိနိသ္သဇ္ဇန္တိယာ, ဥမ္မတ္တိကာယ, အာဒိကမ္မိကာယာတိ။
732. Anāpatti asamanubhāsantiyā, paṭinissajjantiyā, ummattikāya, ādikammikāyāti.
ဒသမသင္ဃာဒိသေသသိက္ခာပဒံ နိဋ္ဌိတံ။
Dasamasaṅghādisesasikkhāpadaṃ niṭṭhitaṃ.
ဥဒ္ဒိဋ္ဌာ ခော, အယ္ယာယော, သတ္တရသ သင္ဃာဒိသေသာ ဓမ္မာ – နဝ ပဌမာပတ္တိကာ, အဋ္ဌ ယာဝတတိယကာ။ ယေသံ ဘိက္ခုနီ အညတရံ ဝာ အညတရံ ဝာ အာပဇ္ဇတိ, တာယ ဘိက္ခုနိယာ ဥဘတောသင္ဃေ ပက္ခမာနတ္တံ စရိတဗ္ဗံ။ စိဏ္ဏမာနတ္တာ ဘိက္ခုနီ ယတ္ထ သိယာ ဝီသတိဂဏော ဘိက္ခုနိသင္ဃော တတ္ထ (သာ ဘိက္ခုနီ) 7 အဗ္ဘေတဗ္ဗာ။ ဧကာယပိ စေ ဦနော ဝီသတိဂဏော ဘိက္ခုနိသင္ဃော တံ ဘိက္ခုနိံ အဗ္ဘေယ္ယ။ သာ စ ဘိက္ခုနီ အနဗ္ဘိတာ, တာ စ ဘိက္ခုနိယော ဂာရယ္ဟာ, အယံ တတ္ထ သာမီစိ။
Uddiṭṭhā kho, ayyāyo, sattarasa saṅghādisesā dhammā – nava paṭhamāpattikā, aṭṭha yāvatatiyakā. Yesaṃ bhikkhunī aññataraṃ vā aññataraṃ vā āpajjati, tāya bhikkhuniyā ubhatosaṅghe pakkhamānattaṃ caritabbaṃ. Ciṇṇamānattā bhikkhunī yattha siyā vīsatigaṇo bhikkhunisaṅgho tattha (sā bhikkhunī) 8 abbhetabbā. Ekāyapi ce ūno vīsatigaṇo bhikkhunisaṅgho taṃ bhikkhuniṃ abbheyya. Sā ca bhikkhunī anabbhitā, tā ca bhikkhuniyo gārayhā, ayaṃ tattha sāmīci.
တတ္ထာယ္ယာယော ပုစ္ဆာမိ – ‘‘ကစ္စိတ္ထ ပရိသုဒ္ဓာ’’? ဒုတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓာ’’? တတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓာ’’? ပရိသုဒ္ဓေတ္ထာယ္ယာယော, တသ္မာ တုဏ္ဟီ, ဧဝမေတံ ဓာရယာမီတိ။
Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
သတ္တရသကံ နိဋ္ဌိတံ။
Sattarasakaṃ niṭṭhitaṃ.
ဘိက္ခုနိဝိဘင္ဂေ သင္ဃာဒိသေသကဏ္ဍံ နိဋ္ဌိတံ။
Bhikkhunivibhaṅge saṅghādisesakaṇḍaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၁၀. ဒသမသင္ဃာဒိသေသသိက္ခာပဒဝဏ္ဏနာ • 10. Dasamasaṅghādisesasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၉. နဝမသင္ဃာဒိသေသသိက္ခာပဒဝဏ္ဏနာ • 9. Navamasaṅghādisesasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၆. ဆဋ္ဌသင္ဃာဒိသေသသိက္ခာပဒဝဏ္ဏနာ • 6. Chaṭṭhasaṅghādisesasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၀. ဒသမသင္ဃာဒိသေသသိက္ခာပဒံ • 10. Dasamasaṅghādisesasikkhāpadaṃ
