| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
ධම්‌මදස්‌සී බුද්‌ධො
Dhammadassī buddho
තස්‌ස අපරභාගෙ ධම්‌මදස්‌සී නාම සත්‌ථා උදපාදි. තස්‌සාපි තයො සාවකසන්‌නිපාතා. පඨමෙ කොටිසතං භික්‌ඛූ අහෙසුං, දුතියෙ නවුතිකොටියො, තතියෙ අසීතිකොටියො. තදා බොධිසත්‌තො සක්‌කො දෙවරාජා හුත්‌වා දිබ්‌බගන්‌ධපුප්‌ඵෙහි ච දිබ්‌බතූරියෙහි ච පූජං අකාසි, සොපි නං සත්‌ථා ‘‘අනාගතෙ බුද්‌ධො භවිස්‌සතී’’ති බ්‍යාකාසි. තස්‌ස භගවතො සරණං නාම නගරං අහොසි, පිතා සරණො නාම රාජා, මාතා සුනන්‌දා නාම දෙවී, පදුමො ච ඵුස්‌සදෙවො ච ද්‌වෙ අග්‌ගසාවකා, සුනෙත්‌තො නාමුපට්‌ඨාකො, ඛෙමා ච සබ්‌බනාමා ච ද්‌වෙ අග්‌ගසාවිකා, රත්‌තඞ්‌කුරරුක්‌ඛො බොධි, ‘‘බිම්‌බිජාලො’’තිපි වුච්‌චති, සරීරං පනස්‌ස අසීතිහත්‌ථුබ්‌බෙධං අහොසි, වස්‌සසතසහස්‌සං ආයූති.
Tassa aparabhāge dhammadassī nāma satthā udapādi. Tassāpi tayo sāvakasannipātā. Paṭhame koṭisataṃ bhikkhū ahesuṃ, dutiye navutikoṭiyo, tatiye asītikoṭiyo. Tadā bodhisatto sakko devarājā hutvā dibbagandhapupphehi ca dibbatūriyehi ca pūjaṃ akāsi, sopi naṃ satthā ‘‘anāgate buddho bhavissatī’’ti byākāsi. Tassa bhagavato saraṇaṃ nāma nagaraṃ ahosi, pitā saraṇo nāma rājā, mātā sunandā nāma devī, padumo ca phussadevo ca dve aggasāvakā, sunetto nāmupaṭṭhāko, khemā ca sabbanāmā ca dve aggasāvikā, rattaṅkurarukkho bodhi, ‘‘bimbijālo’’tipi vuccati, sarīraṃ panassa asītihatthubbedhaṃ ahosi, vassasatasahassaṃ āyūti.
‘‘තත්‌ථෙව මණ්‌ඩකප්‌පම්‌හි, ධම්‌මදස්‌සී මහායසො;
‘‘Tattheva maṇḍakappamhi, dhammadassī mahāyaso;
තමන්‌ධකාරං විධමිත්‌වා, අතිරොචති සදෙවකෙ’’ති. (බු. වං. 17.1);
Tamandhakāraṃ vidhamitvā, atirocati sadevake’’ti. (bu. vaṃ. 17.1);
