| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
7. දුක්‌කරසුත්‌තවණ්‌ණනා
7. Dukkarasuttavaṇṇanā
17. සත්‌තමෙ දුත්‌තිතික්‌ඛන්‌ති දුක්‌ඛමං දුඅධිවාසියං. අබ්‍යත්‌තෙනාති බාලෙන. සාමඤ්‌ඤන්‌ති සමණධම්‌මො. ඉමිනා දෙවතා ඉදං දස්‌සෙති – යං පණ්‌ඩිතා කුලපුත්‌තා දසපි වස්‌සානි වීසතිපි සට්‌ඨිපි වස්‌සානි දන්‌තෙ අභිදන්‌තමාධාය ජිව්‌හාය තාලුං ආහච්‌චපි චෙතසා චිත්‌තං අභිනිග්‌ගණ්‌හිත්‌වාපි එකාසනං එකභත්‌තං පටිසෙවමානා ආපාණකොටිකං බ්‍රහ්‌මචරියං චරන්‌තා සාමඤ්‌ඤං කරොන්‌ති. තං භගවා බාලො අබ්‍යත්‌තො කාතුං න සක්‌කොතීති. බහූ හි තත්‌ථ සම්‌බාධාති තස්‌මිං සාමඤ්‌ඤසඞ්‌ඛාතෙ අරියමග්‌ගෙ බහූ සම්‌බාධා මග්‌ගාධිගමාය පටිපන්‌නස්‌ස පුබ්‌බභාගෙ බහූ පරිස්‌සයාති දස්‌සෙති.
17. Sattame duttitikkhanti dukkhamaṃ duadhivāsiyaṃ. Abyattenāti bālena. Sāmaññanti samaṇadhammo. Iminā devatā idaṃ dasseti – yaṃ paṇḍitā kulaputtā dasapi vassāni vīsatipi saṭṭhipi vassāni dante abhidantamādhāya jivhāya tāluṃ āhaccapi cetasā cittaṃ abhiniggaṇhitvāpi ekāsanaṃ ekabhattaṃ paṭisevamānā āpāṇakoṭikaṃ brahmacariyaṃ carantā sāmaññaṃ karonti. Taṃ bhagavā bālo abyatto kātuṃ na sakkotīti. Bahū hi tattha sambādhāti tasmiṃ sāmaññasaṅkhāte ariyamagge bahū sambādhā maggādhigamāya paṭipannassa pubbabhāge bahū parissayāti dasseti.
චිත්‌තඤ්‌චෙ න නිවාරයෙති යදි අයොනිසො උප්‌පන්‌නං චිත්‌තං න නිවාරෙය්‍ය, කති අහානි සාමඤ්‌ඤං චරෙය්‍ය? එකදිවසම්‌පි න චරෙය්‍ය. චිත්‌තවසිකො හි සමණධම්‌මං කාතුං න සක්‌කොති. පදෙ පදෙති ආරම්‌මණෙ ආරම්‌මණෙ. ආරම්‌මණඤ්‌හි ඉධ පදන්‌ති අධිප්‌පෙතං. යස්‌මිං යස්‌මිං හි ආරම්‌මණෙ කිලෙසො උප්‌පජ්‌ජති, තත්‌ථ තත්‌ථ බාලො විසීදති නාම. ඉරියාපථපදම්‌පි වට්‌ටති. ගමනාදීසු හි යත්‌ථ යත්‌ථ කිලෙසො උප්‌පජ්‌ජති, තත්‌ථ තත්‌ථෙව විසීදති නාම. සඞ්‌කප්‌පානන්‌ති කාමසඞ්‌කප්‌පාදීනං.
Cittañce na nivārayeti yadi ayoniso uppannaṃ cittaṃ na nivāreyya, kati ahāni sāmaññaṃ careyya? Ekadivasampi na careyya. Cittavasiko hi samaṇadhammaṃ kātuṃ na sakkoti. Pade padeti ārammaṇe ārammaṇe. Ārammaṇañhi idha padanti adhippetaṃ. Yasmiṃ yasmiṃ hi ārammaṇe kileso uppajjati, tattha tattha bālo visīdati nāma. Iriyāpathapadampi vaṭṭati. Gamanādīsu hi yattha yattha kileso uppajjati, tattha tattheva visīdati nāma. Saṅkappānanti kāmasaṅkappādīnaṃ.
කුම්‌මො වාති කච්‌ඡපො විය. අඞ්‌ගානීති ගීවපඤ්‌චමානි අඞ්‌ගානි. සමොදහන්‌ති සමොදහන්‌තො, සමොදහිත්‌වා වා. මනොවිතක්‌කෙති මනම්‌හි උප්‌පන්‌නවිතක්‌කෙ. එත්‌තාවතා ඉදං දස්‌සෙති – යථා කුම්‌මො සොණ්‌ඩිපඤ්‌චමානි අඞ්‌ගානි සකෙ කපාලෙ සමොදහන්‌තො සිඞ්‌ගාලස්‌ස ඔතාරං න දෙති, සමොදහිත්‌වා චස්‌ස අප්‌පසය්‌හතං ආපජ්‌ජති, එවමෙවං භික්‌ඛු මනම්‌හි උප්‌පන්‌නවිතක්‌කෙ සකෙ ආරම්‌මණකපාලෙ සමොදහං මාරස්‌ස ඔතාරං න දෙති, සමොදහිත්‌වා චස්‌ස අප්‌පසය්‌හතං ආපජ්‌ජතීති. අනිස්‌සිතොති තණ්‌හාදිට්‌ඨිනිස්‌සයෙහි අනිස්‌සිතො හුත්‌වා. අහෙඨයානොති අවිහිංසමානො. පරිනිබ්‌බුතොති කිලෙසනිබ්‌බානෙන පරිනිබ්‌බුතො. නූපවදෙය්‍ය කඤ්‌චීති යංකිඤ්‌චි පුග්‌ගලං ආචාරවිපත්‌තිආදීසු යාය කායචි මඞ්‌කුං කාතුකාමො හුත්‌වා න වදෙය්‍ය, ‘‘කාලෙන වක්‌ඛාමි නො අකාලෙනා’’තිආදයො පන පඤ්‌ච ධම්‌මෙ අජ්‌ඣත්‌තං උපට්‌ඨපෙත්‌වා උල්‌ලුම්‌පනසභාවසණ්‌ඨිතෙන චිත්‌තෙන කාරුඤ්‌ඤතං පටිච්‌ච වදෙය්‍යාති.
Kummo vāti kacchapo viya. Aṅgānīti gīvapañcamāni aṅgāni. Samodahanti samodahanto, samodahitvā vā. Manovitakketi manamhi uppannavitakke. Ettāvatā idaṃ dasseti – yathā kummo soṇḍipañcamāni aṅgāni sake kapāle samodahanto siṅgālassa otāraṃ na deti, samodahitvā cassa appasayhataṃ āpajjati, evamevaṃ bhikkhu manamhi uppannavitakke sake ārammaṇakapāle samodahaṃ mārassa otāraṃ na deti, samodahitvā cassa appasayhataṃ āpajjatīti. Anissitoti taṇhādiṭṭhinissayehi anissito hutvā. Aheṭhayānoti avihiṃsamāno. Parinibbutoti kilesanibbānena parinibbuto. Nūpavadeyya kañcīti yaṃkiñci puggalaṃ ācāravipattiādīsu yāya kāyaci maṅkuṃ kātukāmo hutvā na vadeyya, ‘‘kālena vakkhāmi no akālenā’’tiādayo pana pañca dhamme ajjhattaṃ upaṭṭhapetvā ullumpanasabhāvasaṇṭhitena cittena kāruññataṃ paṭicca vadeyyāti.
දුක්‌කරසුත්‌තවණ්‌ණනා නිට්‌ඨිතා.
Dukkarasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. දුක්‌කරසුත්‌තං • 7. Dukkarasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. දුක්‌කරසුත්‌තවණ්‌ණනා • 7. Dukkarasuttavaṇṇanā
