| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၃. ဒုက္ခနိဗ္ဗာနသပ္ပာယသုတ္တံ
3. Dukkhanibbānasappāyasuttaṃ
၁၄၈. ‘‘နိဗ္ဗာနသပ္ပာယံ ဝော, ဘိက္ခဝေ, ပဋိပဒံ ဒေသေသ္သာမိ။ တံ သုဏာထ။ပေ.။ ကတမာ စ သာ, ဘိက္ခဝေ, နိဗ္ဗာနသပ္ပာယာ ပဋိပဒာ? ဣဓ, ဘိက္ခဝေ, စက္ခုံ ဒုက္ခန္တိ ပသ္သတိ, ရူပာ ဒုက္ခာတိ ပသ္သတိ, စက္ခုဝိညာဏံ ဒုက္ခန္တိ ပသ္သတိ, စက္ခုသမ္ဖသ္သော ဒုက္ခောတိ ပသ္သတိ, ယမ္ပိဒံ စက္ခုသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ တမ္ပိ ဒုက္ခန္တိ ပသ္သတိ။ပေ.။ ဇိဝ္ဟာ ဒုက္ခာတိ ပသ္သတိ။ပေ.။ မနော ဒုက္ခောတိ ပသ္သတိ, ဓမ္မာ ဒုက္ခာတိ ပသ္သတိ, မနောဝိညာဏံ ဒုက္ခန္တိ ပသ္သတိ, မနောသမ္ဖသ္သော ဒုက္ခောတိ ပသ္သတိ, ယမ္ပိဒံ မနောသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ တမ္ပိ ဒုက္ခန္တိ ပသ္သတိ။ အယံ ခော သာ, ဘိက္ခဝေ, နိဗ္ဗာနသပ္ပာယာ ပဋိပဒာ’’တိ။ တတိယံ။
148. ‘‘Nibbānasappāyaṃ vo, bhikkhave, paṭipadaṃ desessāmi. Taṃ suṇātha…pe… katamā ca sā, bhikkhave, nibbānasappāyā paṭipadā? Idha, bhikkhave, cakkhuṃ dukkhanti passati, rūpā dukkhāti passati, cakkhuviññāṇaṃ dukkhanti passati, cakkhusamphasso dukkhoti passati, yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi dukkhanti passati…pe… jivhā dukkhāti passati…pe… mano dukkhoti passati, dhammā dukkhāti passati, manoviññāṇaṃ dukkhanti passati, manosamphasso dukkhoti passati, yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi dukkhanti passati. Ayaṃ kho sā, bhikkhave, nibbānasappāyā paṭipadā’’ti. Tatiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂-၅. အနိစ္စနိဗ္ဗာနသပ္ပာယသုတ္တာဒိဝဏ္ဏနာ • 2-5. Aniccanibbānasappāyasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂-၅. အနိစ္စနိဗ္ဗာနသပ္ပာယသုတ္တာဒိဝဏ္ဏနာ • 2-5. Aniccanibbānasappāyasuttādivaṇṇanā
