| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
2. දුතියඅස්‌සුතවාසුත්‌තවණ්‌ණනා
2. Dutiyaassutavāsuttavaṇṇanā
62. පච්‌චයභාවෙන සුඛවෙදනාය හිතන්‌ති සුඛවෙදනියං. තෙනාහ ‘‘සුඛවෙදනාය පච්‌චය’’න්‌ති. පච්‌චයභාවො ච උපනිස්‌සයකොටියා, න සහජාතකොටියා. තෙනාහ ‘‘නනු චා’’තිආදි. ජවනවෙදනායාති ජවනචිත්‌තසහගතාය වෙදනාය. තං සන්‌ධායාති තං උපනිස්‌සයපච්‌චයතං සන්‌ධාය. එතන්‌ති එතං ‘‘සුඛවෙදනාය පච්‌චය’’න්‌ති වචනං වුත්‌තං. එසෙව නයොති ඉමිනා ‘‘නනු ච සොතසම්‌ඵස්‌සො සුඛවෙදනාය පච්‌චයො න හොතී’’ති එවමාදිං අතිදිසති. සො සම්‌ඵස්‌සො ජාති උප්‌පත්‌තිට්‌ඨානං එතස්‌සාති තජ්‌ජාතිකං, වෙදයිතං. තං පන යස්‌මා තස්‌ස ඵස්‌සස්‌ස අනුච්‌ඡවිකමෙව හොති, තස්‌මා තස්‌සාරුප්‌පං තස්‌ස ඵස්‌සස්‌ස අනුරූපන්‌ති ච අත්‌ථො වුත්‌තො. වුත්‌තනයෙනාති ‘‘සුඛවෙදනාය පච්‌චයො’’තිආදිනා වුත්‌තවිධිඅනුසාරෙන. අධරාරණියං උත්‌තරාරණියා මන්‌තනවසෙන ඝට්‌ටනං ඉව සඞ්‌ඝට්‌ටනං ඵස්‌සෙන යුගග්‌ගාහො, තස්‌ස පන ඝට්‌ටනස්‌ස නිරන්‌තරප්‌පවත්‌තියා පිණ්‌ඩිතභාවො ඉධ සමොධානං, න කෙසඤ්‌චි ද්‌වින්‌නං තිණ්‌ණං වා සහාවට්‌ඨානන්‌ති වුත්‌තං ‘‘සඞ්‌ඝට්‌ටනසම්‌පිණ්‌ඩනෙනාති අත්‌ථො’’ති. අග්‌ගිචුණ්‌ණොති විප්‌ඵුලිඞ්‌ගං. වත්‌ථූති චක්‌ඛාදිවත්‌ථු විසයසඞ්‌ඝට්‌ටනතො. ලබ්‌භමානොව ධම්‌මො සඞ්‌ඝට්‌ටනං විය ගය්‌හතීති වුත්‌තං ‘‘සඞ්‌ඝට්‌ටනං විය ඵස්‌සො’’ති. උස්‌මාධාතු විය වෙදනා දුක්‌ඛසභාවත්‌තා.
62. Paccayabhāvena sukhavedanāya hitanti sukhavedaniyaṃ. Tenāha ‘‘sukhavedanāya paccaya’’nti. Paccayabhāvo ca upanissayakoṭiyā, na sahajātakoṭiyā. Tenāha ‘‘nanu cā’’tiādi. Javanavedanāyāti javanacittasahagatāya vedanāya. Taṃ sandhāyāti taṃ upanissayapaccayataṃ sandhāya. Etanti etaṃ ‘‘sukhavedanāya paccaya’’nti vacanaṃ vuttaṃ. Eseva nayoti iminā ‘‘nanu ca sotasamphasso sukhavedanāya paccayo na hotī’’ti evamādiṃ atidisati. So samphasso jāti uppattiṭṭhānaṃ etassāti tajjātikaṃ, vedayitaṃ. Taṃ pana yasmā tassa phassassa anucchavikameva hoti, tasmā tassāruppaṃ tassa phassassa anurūpanti ca attho vutto. Vuttanayenāti ‘‘sukhavedanāya paccayo’’tiādinā vuttavidhianusārena. Adharāraṇiyaṃ uttarāraṇiyā mantanavasena ghaṭṭanaṃ iva saṅghaṭṭanaṃ phassena yugaggāho, tassa pana ghaṭṭanassa nirantarappavattiyā piṇḍitabhāvo idha samodhānaṃ, na kesañci dvinnaṃ tiṇṇaṃ vā sahāvaṭṭhānanti vuttaṃ ‘‘saṅghaṭṭanasampiṇḍanenāti attho’’ti. Aggicuṇṇoti vipphuliṅgaṃ. Vatthūti cakkhādivatthu visayasaṅghaṭṭanato. Labbhamānova dhammo saṅghaṭṭanaṃ viya gayhatīti vuttaṃ ‘‘saṅghaṭṭanaṃ viya phasso’’ti. Usmādhātu viya vedanā dukkhasabhāvattā.
දුතියඅස්‌සුතවාසුත්‌තවණ්‌ණනා නිට්‌ඨිතා.
Dutiyaassutavāsuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 2. දුතියඅස්‌සුතවාසුත්‌තං • 2. Dutiyaassutavāsuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. දුතියඅස්‌සුතවාසුත්‌තවණ්‌ණනා • 2. Dutiyaassutavāsuttavaṇṇanā
