| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၈. ဒုတိယဆိဂ္ဂဠယုဂသုတ္တံ
8. Dutiyachiggaḷayugasuttaṃ
၁၁၁၈. ‘‘သေယ္ယထာပိ , ဘိက္ခဝေ, အယံ မဟာပထဝီ ဧကောဒကာ အသ္သ။ တတ္ရ ပုရိသော ဧကစ္ဆိဂ္ဂဠံ ယုဂံ ပက္ခိပေယ္ယ။ တမေနံ ပုရတ္ထိမော ဝာတော ပစ္ဆိမေန သံဟရေယ္ယ, ပစ္ဆိမော ဝာတော ပုရတ္ထိမေန သံဟရေယ္ယ, ဥတ္တရော ဝာတော ဒက္ခိဏေန သံဟရေယ္ယ, ဒက္ခိဏော ဝာတော ဥတ္တရေန သံဟရေယ္ယ။ တတ္ရသ္သ ကာဏော ကစ္ဆပော။ သော ဝသ္သသတသ္သ ဝသ္သသတသ္သ အစ္စယေန သကိံ သကိံ ဥမ္မုဇ္ဇေယ္ယ။ တံ ကိံ မညထ, ဘိက္ခဝေ, အပိ နု ခော ကာဏော ကစ္ဆပော ဝသ္သသတသ္သ ဝသ္သသတသ္သ အစ္စယေန သကိံ သကိံ ဥမ္မုဇ္ဇန္တော အမုသ္မိံ ဧကစ္ဆိဂ္ဂဠေ ယုဂေ ဂီဝံ ပဝေသေယ္ယာ’’တိ? ‘‘အဓိစ္စမိဒံ, ဘန္တေ, ယံ သော ကာဏော ကစ္ဆပော ဝသ္သသတသ္သ ဝသ္သသတသ္သ အစ္စယေန သကိံ သကိံ ဥမ္မုဇ္ဇန္တော အမုသ္မိံ ဧကစ္ဆိဂ္ဂဠေ ယုဂေ ဂီဝံ ပဝေသေယ္ယာ’’တိ။
1118. ‘‘Seyyathāpi , bhikkhave, ayaṃ mahāpathavī ekodakā assa. Tatra puriso ekacchiggaḷaṃ yugaṃ pakkhipeyya. Tamenaṃ puratthimo vāto pacchimena saṃhareyya, pacchimo vāto puratthimena saṃhareyya, uttaro vāto dakkhiṇena saṃhareyya, dakkhiṇo vāto uttarena saṃhareyya. Tatrassa kāṇo kacchapo. So vassasatassa vassasatassa accayena sakiṃ sakiṃ ummujjeyya. Taṃ kiṃ maññatha, bhikkhave, api nu kho kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti? ‘‘Adhiccamidaṃ, bhante, yaṃ so kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti.
‘‘ဧဝံ အဓိစ္စမိဒံ, ဘိက္ခဝေ, ယံ မနုသ္သတ္တံ လဘတိ။ ဧဝံ အဓိစ္စမိဒံ, ဘိက္ခဝေ, ယံ တထာဂတော လောကေ ဥပ္ပဇ္ဇတိ အရဟံ သမ္မာသမ္ဗုဒ္ဓော။ ဧဝံ အဓိစ္စမိဒံ, ဘိက္ခဝေ, ယံ တထာဂတပ္ပဝေဒိတော ဓမ္မဝိနယော လောကေ ဒိဗ္ဗတိ။ တသ္သိဒံ 1, ဘိက္ခဝေ, မနုသ္သတ္တံ လဒ္ဓံ, တထာဂတော လောကေ ဥပ္ပန္နော အရဟံ သမ္မာသမ္ဗုဒ္ဓော, တထာဂတပ္ပဝေဒိတော စ ဓမ္မဝိနယော လောကေ ဒိဗ္ဗတိ။
‘‘Evaṃ adhiccamidaṃ, bhikkhave, yaṃ manussattaṃ labhati. Evaṃ adhiccamidaṃ, bhikkhave, yaṃ tathāgato loke uppajjati arahaṃ sammāsambuddho. Evaṃ adhiccamidaṃ, bhikkhave, yaṃ tathāgatappavedito dhammavinayo loke dibbati. Tassidaṃ 2, bhikkhave, manussattaṃ laddhaṃ, tathāgato loke uppanno arahaṃ sammāsambuddho, tathāgatappavedito ca dhammavinayo loke dibbati.
‘‘တသ္မာတိဟ, ဘိက္ခဝေ, ‘ဣဒံ ဒုက္ခ’န္တိ ယောဂော ကရဏီယော။ပေ.။ ‘အယံ ဒုက္ခနိရောဓဂာမိနီ ပဋိပဒာ’တိ ယောဂော ကရဏီယော’’တိ။ အဋ္ဌမံ။
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. ဒုတိယဆိဂ္ဂဠယုဂသုတ္တဝဏ္ဏနာ • 8. Dutiyachiggaḷayugasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၈. ဒုတိယဆိဂ္ဂဠယုဂသုတ္တဝဏ္ဏနာ • 8. Dutiyachiggaḷayugasuttavaṇṇanā
