| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၀. ဒုတိယပာပဏိကသုတ္တံ
10. Dutiyapāpaṇikasuttaṃ
၂၀. ‘‘တီဟိ , ဘိက္ခဝေ, အင္ဂေဟိ သမန္နာဂတော ပာပဏိကော နစိရသ္သေဝ မဟတ္တံ ဝေပုလ္လတ္တံ 1 ပာပုဏာတိ ဘောဂေသု။ ကတမေဟိ တီဟိ? ဣဓ, ဘိက္ခဝေ, ပာပဏိကော စက္ခုမာ စ ဟောတိ ဝိဓုရော စ နိသ္သယသမ္ပန္နော စ။ ကထဉ္စ, ဘိက္ခဝေ, ပာပဏိကော စက္ခုမာ ဟောတိ? ဣဓ, ဘိက္ခဝေ, ပာပဏိကော ပဏိယံ ဇာနာတိ – ‘ဣဒံ ပဏိယံ ဧဝံ ကီတံ, ဧဝံ ဝိက္ကယမာနံ 2, ဧတ္တကံ မူလံ ဘဝိသ္သတိ, ဧတ္တကော ဥဒယော’တိ 3။ ဧဝံ ခော, ဘိက္ခဝေ, ပာပဏိကော စက္ခုမာ ဟောတိ။
20. ‘‘Tīhi , bhikkhave, aṅgehi samannāgato pāpaṇiko nacirasseva mahattaṃ vepullattaṃ 4 pāpuṇāti bhogesu. Katamehi tīhi? Idha, bhikkhave, pāpaṇiko cakkhumā ca hoti vidhuro ca nissayasampanno ca. Kathañca, bhikkhave, pāpaṇiko cakkhumā hoti? Idha, bhikkhave, pāpaṇiko paṇiyaṃ jānāti – ‘idaṃ paṇiyaṃ evaṃ kītaṃ, evaṃ vikkayamānaṃ 5, ettakaṃ mūlaṃ bhavissati, ettako udayo’ti 6. Evaṃ kho, bhikkhave, pāpaṇiko cakkhumā hoti.
‘‘ကထဉ္စ, ဘိက္ခဝေ, ပာပဏိကော ဝိဓုရော ဟောတိ? ဣဓ, ဘိက္ခဝေ, ပာပဏိကော ကုသလော ဟောတိ ပဏိယံ ကေတုဉ္စ ဝိက္ကေတုဉ္စ။ ဧဝံ ခော, ဘိက္ခဝေ, ပာပဏိကော ဝိဓုရော ဟောတိ။
‘‘Kathañca, bhikkhave, pāpaṇiko vidhuro hoti? Idha, bhikkhave, pāpaṇiko kusalo hoti paṇiyaṃ ketuñca vikketuñca. Evaṃ kho, bhikkhave, pāpaṇiko vidhuro hoti.
‘‘ကထဉ္စ, ဘိက္ခဝေ, ပာပဏိကော နိသ္သယသမ္ပန္နော ဟောတိ? ဣဓ ဘိက္ခဝေ , ပာပဏိကံ ယေ တေ ဂဟပတီ ဝာ ဂဟပတိပုတ္တာ ဝာ အဍ္ဎာ မဟဒ္ဓနာ မဟာဘောဂာ တေ ဧဝံ ဇာနန္တိ – ‘အယံ ခော ဘဝံ ပာပဏိကော စက္ခုမာ ဝိဓုရော စ ပဋိဗလော ပုတ္တဒာရဉ္စ ပောသေတုံ, အမ္ဟာကဉ္စ ကာလေန ကာလံ အနုပ္ပဒာတု’န္တိ။ တေ နံ ဘောဂေဟိ နိပတန္တိ – ‘ဣတော, သမ္မ ပာပဏိက, ဘောဂေ ကရိတ္ဝာ 7 ပုတ္တဒာရဉ္စ ပောသေဟိ, အမ္ဟာကဉ္စ ကာလေန ကာလံ အနုပ္ပဒေဟီ’တိ။ ဧဝံ ခော, ဘိက္ခဝေ, ပာပဏိကော နိသ္သယသမ္ပန္နော ဟောတိ။ ဣမေဟိ ခော, ဘိက္ခဝေ, တီဟိ အင္ဂေဟိ သမန္နာဂတော ပာပဏိကော နစိရသ္သေဝ မဟတ္တံ ဝေပုလ္လတ္တံ ပာပုဏာတိ ဘောဂေသု။
‘‘Kathañca, bhikkhave, pāpaṇiko nissayasampanno hoti? Idha bhikkhave , pāpaṇikaṃ ye te gahapatī vā gahapatiputtā vā aḍḍhā mahaddhanā mahābhogā te evaṃ jānanti – ‘ayaṃ kho bhavaṃ pāpaṇiko cakkhumā vidhuro ca paṭibalo puttadārañca posetuṃ, amhākañca kālena kālaṃ anuppadātu’nti. Te naṃ bhogehi nipatanti – ‘ito, samma pāpaṇika, bhoge karitvā 8 puttadārañca posehi, amhākañca kālena kālaṃ anuppadehī’ti. Evaṃ kho, bhikkhave, pāpaṇiko nissayasampanno hoti. Imehi kho, bhikkhave, tīhi aṅgehi samannāgato pāpaṇiko nacirasseva mahattaṃ vepullattaṃ pāpuṇāti bhogesu.
‘‘ဧဝမေဝံ ခော, ဘိက္ခဝေ, တီဟိ ဓမ္မေဟိ သမန္နာဂတော ဘိက္ခု နစိရသ္သေဝ မဟတ္တံ ဝေပုလ္လတ္တံ ပာပုဏာတိ ကုသလေသု ဓမ္မေသု။ ကတမေဟိ တီဟိ? ဣဓ, ဘိက္ခဝေ, ဘိက္ခု စက္ခုမာ စ ဟောတိ ဝိဓုရော စ နိသ္သယသမ္ပန္နော စ။ ကထဉ္စ, ဘိက္ခဝေ, ဘိက္ခု စက္ခုမာ ဟောတိ? ဣဓ, ဘိက္ခဝေ, ဘိက္ခု ‘ဣဒံ ဒုက္ခ’န္တိ ယထာဘူတံ ပဇာနာတိ, ‘အယံ ဒုက္ခသမုဒယော’တိ ယထာဘူတံ ပဇာနာတိ, ‘အယံ ဒုက္ခနိရောဓော’တိ ယထာဘူတံ ပဇာနာတိ, ‘အယံ ဒုက္ခနိရောဓဂာမိနီ ပဋိပဒာ’တိ ယထာဘူတံ ပဇာနာတိ။ ဧဝံ ခော, ဘိက္ခဝေ, ဘိက္ခု စက္ခုမာ ဟောတိ။
‘‘Evamevaṃ kho, bhikkhave, tīhi dhammehi samannāgato bhikkhu nacirasseva mahattaṃ vepullattaṃ pāpuṇāti kusalesu dhammesu. Katamehi tīhi? Idha, bhikkhave, bhikkhu cakkhumā ca hoti vidhuro ca nissayasampanno ca. Kathañca, bhikkhave, bhikkhu cakkhumā hoti? Idha, bhikkhave, bhikkhu ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti. Evaṃ kho, bhikkhave, bhikkhu cakkhumā hoti.
‘‘ကထဉ္စ, ဘိက္ခဝေ, ဘိက္ခု ဝိဓုရော ဟောတိ? ဣဓ, ဘိက္ခဝေ, ဘိက္ခု အာရဒ္ဓဝီရိယော ဝိဟရတိ အကုသလာနံ ဓမ္မာနံ ပဟာနာယ, ကုသလာနံ ဓမ္မာနံ ဥပသမ္ပဒာယ, ထာမဝာ ဒဠ္ဟပရက္ကမော အနိက္ခိတ္တဓုရော ကုသလေသု ဓမ္မေသု။ ဧဝံ ခော, ဘိက္ခဝေ, ဘိက္ခု ဝိဓုရော ဟောတိ။
‘‘Kathañca, bhikkhave, bhikkhu vidhuro hoti? Idha, bhikkhave, bhikkhu āraddhavīriyo viharati akusalānaṃ dhammānaṃ pahānāya, kusalānaṃ dhammānaṃ upasampadāya, thāmavā daḷhaparakkamo anikkhittadhuro kusalesu dhammesu. Evaṃ kho, bhikkhave, bhikkhu vidhuro hoti.
‘‘ကထဉ္စ, ဘိက္ခဝေ, ဘိက္ခု နိသ္သယသမ္ပန္နော ဟောတိ? ဣဓ, ဘိက္ခဝေ, ဘိက္ခု ယေ တေ ဘိက္ခူ ဗဟုသ္သုတာ အာဂတာဂမာ ဓမ္မဓရာ ဝိနယဓရာ မာတိကာဓရာ တေ ကာလေန ကာလံ ဥပသင္ကမိတ္ဝာ ပရိပုစ္ဆတိ ပရိပဉ္ဟတိ – ‘ဣဒံ, ဘန္တေ, ကထံ, ဣမသ္သ ကော အတ္ထော’တိ? တသ္သ တေ အာယသ္မန္တော အဝိဝဋဉ္စေဝ ဝိဝရန္တိ, အနုတ္တာနီကတဉ္စ ဥတ္တာနီကရောန္တိ, အနေကဝိဟိတေသု စ ကင္ခာဌာနိယေသု ဓမ္မေသု ကင္ခံ ပဋိဝိနောဒေန္တိ။ ဧဝံ ခော, ဘိက္ခဝေ, ဘိက္ခု နိသ္သယသမ္ပန္နော ဟောတိ။ ဣမေဟိ ခော, ဘိက္ခဝေ, တီဟိ ဓမ္မေဟိ သမန္နာဂတော ဘိက္ခု နစိရသ္သေဝ မဟတ္တံ ဝေပုလ္လတ္တံ ပာပုဏာတိ ကုသလေသု ဓမ္မေသူ’’တိ။ ဒသမံ။
‘‘Kathañca, bhikkhave, bhikkhu nissayasampanno hoti? Idha, bhikkhave, bhikkhu ye te bhikkhū bahussutā āgatāgamā dhammadharā vinayadharā mātikādharā te kālena kālaṃ upasaṅkamitvā paripucchati paripañhati – ‘idaṃ, bhante, kathaṃ, imassa ko attho’ti? Tassa te āyasmanto avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṃ paṭivinodenti. Evaṃ kho, bhikkhave, bhikkhu nissayasampanno hoti. Imehi kho, bhikkhave, tīhi dhammehi samannāgato bhikkhu nacirasseva mahattaṃ vepullattaṃ pāpuṇāti kusalesu dhammesū’’ti. Dasamaṃ.
ရထကာရဝဂ္ဂော ဒုတိယော။
Rathakāravaggo dutiyo.
ပဌမဘာဏဝာရော နိဋ္ဌိတော။
Paṭhamabhāṇavāro niṭṭhito.
တသ္သုဒ္ဒာနံ –
Tassuddānaṃ –
အပဏ္ဏကတ္တာ ဒေဝော စ၊ ဒုဝေ ပာပဏိကေန စာတိ။
Apaṇṇakattā devo ca, duve pāpaṇikena cāti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. ဒုတိယပာပဏိကသုတ္တဝဏ္ဏနာ • 10. Dutiyapāpaṇikasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၀. ဒုတိယပာပဏိကသုတ္တဝဏ္ဏနာ • 10. Dutiyapāpaṇikasuttavaṇṇanā
