| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
දුතියසමණබ්‍රාහ්‌මණසුත්‌තවණ්‌ණනා
7. Dutiyasamaṇabrāhmaṇasuttavaṇṇanā
477. දුක්‌ඛසච්‌චවසෙනාති දුක්‌ඛසච්‌චභාවෙන න පජානන්‌ති. තඤ්‌හි පරිඤ්‌ඤෙය්‍යතාය දුක්‌ඛසච්‌චසඞ්‌ගහං. සමුදයසච්‌චවසෙනාති තණ්‌හාවිජ්‌ජාදිං සද්‌ධින්‌ද්‍රියස්‌ස සමුදයසච්‌චභාවෙන න පජානන්‌ති. නිරොධන්‌ති සද්‌ධින්‌ද්‍රියස්‌ස අනුපාදාය නිරොධනිමිත්‌තං නිබ්‌බානං. පටිපදන්‌ති සද්‌ධින්‌ද්‍රියනිරොධගාමිනිං පටිපදං අරියමග්‌ගං. සෙසෙසූති වීරියින්‌ද්‍රියාදීසු.
477.Dukkhasaccavasenāti dukkhasaccabhāvena na pajānanti. Tañhi pariññeyyatāya dukkhasaccasaṅgahaṃ. Samudayasaccavasenāti taṇhāvijjādiṃ saddhindriyassa samudayasaccabhāvena na pajānanti. Nirodhanti saddhindriyassa anupādāya nirodhanimittaṃ nibbānaṃ. Paṭipadanti saddhindriyanirodhagāminiṃ paṭipadaṃ ariyamaggaṃ. Sesesūti vīriyindriyādīsu.
සුක්‌කපක්‌ඛෙති ‘‘සද්‌ධින්‌ද්‍රියං පජානන්‌තී’’තිආදිනයප්‌පවත්‌තෙ අනවජ්‌ජපක්‌ඛෙ. අධිමොක්‌ඛවසෙන ආවජ්‌ජනසමුදයාති ‘‘අත්‌ථි දින්‌න’’න්‌තිආදිනයප්‌පවත්‌තපුබ්‌බභාගභූතසද්‌ධාධිමොක්‌ඛවසෙන ආවජ්‌ජනුප්‌පත්‌තියා. තස්‌මා පඨමුප්‌පන්‌නා සද්‌ධා එව හෙත්‌ථ ‘‘ආවජ්‌ජන’’න්‌ති වුත්‌තා, න මනොද්‌වාරාවජ්‌ජනං. එස නයො සෙසෙසුපි. තස්‌මා පඨමුප්‌පන්‌නා ආවජ්‌ජනා පග්‌ගහුප්‌පත්‌තිට්‌ඨානානං තික්‌ඛානං වීරියින්‌ද්‍රියාදීනං පඨමුප්‌පත්‌තියා ආවජ්‌ජනපරියායෙන වුත්‌තාති දට්‌ඨබ්‌බං. දුබ්‌බලා හි පඨමුප්‌පන්‌නා පග්‌ගහාභාවතො වීරියින්‌ද්‍රියාදීනං සමුදයොති බලවභාවප්‌පත්‌තවීරියින්‌ද්‍රියාදිකස්‌ස ආවජ්‌ජනට්‌ඨානියානි හොන්‌තීති තෙසං සමුදයොති වුත්‌තා, පුබ්‌බෙ අධිමුච්‌චනාදිවසෙන පවත්‌තස්‌ස ආවජ්‌ජනස්‌ස සමුදයාති අත්‌ථො. පුන ඡන්‌දවසෙනාති කත්‌තුකාමතාකුසලච්‌ඡන්‌දවසෙන සද්‌ධාදීනං උප්‌පාදෙතුකාමතාකාරප්‌පවත්‌තස්‌ස ඡන්‌දස්‌ස වසෙන. මනසිකාරවසෙන ආවජ්‌ජනසමුදයාති සද්‌ධින්‌ද්‍රියාදිවසෙන පවත්‌තස්‌ස දුබ්‌බලස්‌ස තස්‌ස නිබ්‌බත්‌තකයොනිසොමනසිකාරවසෙන ආවජ්‌ජනස්‌ස උප්‌පත්‌තියා. එවම්‌පීති ‘‘අධිමොක්‌ඛවසෙනා’’තිආදිනා වුත්‌තාකාරෙනපි. ඡසු සුත්‌තෙසූති දුතියතො පට්‌ඨාය ඡසු සුත්‌තෙසු. චතුසච්‌චමෙව කථිතං. අස්‌සාදග්‌ගහණෙන හි සමුදයසච්‌චං, ආදීනවග්‌ගහණෙන දුක්‌ඛසච්‌චං, නිස්‌සරණග්‌ගහණෙන නිරොධමග්‌ගසච්‌චානි ගහිතානීති. පඨමසුත්‌තෙ පන ඉන්‌ද්‍රියානං සරූපදස්‌සනමෙවාති.
Sukkapakkheti ‘‘saddhindriyaṃ pajānantī’’tiādinayappavatte anavajjapakkhe. Adhimokkhavasena āvajjanasamudayāti ‘‘atthi dinna’’ntiādinayappavattapubbabhāgabhūtasaddhādhimokkhavasena āvajjanuppattiyā. Tasmā paṭhamuppannā saddhā eva hettha ‘‘āvajjana’’nti vuttā, na manodvārāvajjanaṃ. Esa nayo sesesupi. Tasmā paṭhamuppannā āvajjanā paggahuppattiṭṭhānānaṃ tikkhānaṃ vīriyindriyādīnaṃ paṭhamuppattiyā āvajjanapariyāyena vuttāti daṭṭhabbaṃ. Dubbalā hi paṭhamuppannā paggahābhāvato vīriyindriyādīnaṃ samudayoti balavabhāvappattavīriyindriyādikassa āvajjanaṭṭhāniyāni hontīti tesaṃ samudayoti vuttā, pubbe adhimuccanādivasena pavattassa āvajjanassa samudayāti attho. Puna chandavasenāti kattukāmatākusalacchandavasena saddhādīnaṃ uppādetukāmatākārappavattassa chandassa vasena. Manasikāravasena āvajjanasamudayāti saddhindriyādivasena pavattassa dubbalassa tassa nibbattakayonisomanasikāravasena āvajjanassa uppattiyā. Evampīti ‘‘adhimokkhavasenā’’tiādinā vuttākārenapi. Chasu suttesūti dutiyato paṭṭhāya chasu suttesu. Catusaccameva kathitaṃ. Assādaggahaṇena hi samudayasaccaṃ, ādīnavaggahaṇena dukkhasaccaṃ, nissaraṇaggahaṇena nirodhamaggasaccāni gahitānīti. Paṭhamasutte pana indriyānaṃ sarūpadassanamevāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. දුතියසමණබ්‍රාහ්‌මණසුත්‌තං • 7. Dutiyasamaṇabrāhmaṇasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. දුතියසමණබ්‍රාහ්‌මණසුත්‌තවණ්‌ණනා • 7. Dutiyasamaṇabrāhmaṇasuttavaṇṇanā
