| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. ဒုတိယသာရိပုတ္တသုတ္တံ
5. Dutiyasāriputtasuttaṃ
၁၀၀၁. အထ ခော အာယသ္မာ သာရိပုတ္တော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နံ ခော အာယသ္မန္တံ သာရိပုတ္တံ ဘဂဝာ ဧတဒဝောစ – ‘‘‘သောတာပတ္တိယင္ဂံ, သောတာပတ္တိယင္ဂ’န္တိ ဟိဒံ, သာရိပုတ္တ, ဝုစ္စတိ။ ကတမံ နု ခော သာရိပုတ္တ, သောတာပတ္တိယင္ဂ’’န္တိ? ‘‘သပ္ပုရိသသံသေဝော ဟိ, ဘန္တေ, သောတာပတ္တိယင္ဂံ, သဒ္ဓမ္မသ္သဝနံ သောတာပတ္တိယင္ဂံ, ယောနိသောမနသိကာရော သောတာပတ္တိယင္ဂံ, ဓမ္မာနုဓမ္မပ္ပဋိပတ္တိ သောတာပတ္တိယင္ဂ’’န္တိ။ ‘‘သာဓု သာဓု, သာရိပုတ္တ! သပ္ပုရိသသံသေဝော ဟိ, သာရိပုတ္တ, သောတာပတ္တိယင္ဂံ, သဒ္ဓမ္မသ္သဝနံ သောတာပတ္တိယင္ဂံ, ယောနိသောမနသိကာရော သောတာပတ္တိယင္ဂံ, ဓမ္မာနုဓမ္မပ္ပဋိပတ္တိ သောတာပတ္တိယင္ဂံ’’။
1001. Atha kho āyasmā sāriputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ sāriputtaṃ bhagavā etadavoca – ‘‘‘sotāpattiyaṅgaṃ, sotāpattiyaṅga’nti hidaṃ, sāriputta, vuccati. Katamaṃ nu kho sāriputta, sotāpattiyaṅga’’nti? ‘‘Sappurisasaṃsevo hi, bhante, sotāpattiyaṅgaṃ, saddhammassavanaṃ sotāpattiyaṅgaṃ, yonisomanasikāro sotāpattiyaṅgaṃ, dhammānudhammappaṭipatti sotāpattiyaṅga’’nti. ‘‘Sādhu sādhu, sāriputta! Sappurisasaṃsevo hi, sāriputta, sotāpattiyaṅgaṃ, saddhammassavanaṃ sotāpattiyaṅgaṃ, yonisomanasikāro sotāpattiyaṅgaṃ, dhammānudhammappaṭipatti sotāpattiyaṅgaṃ’’.
‘‘‘သောတော, သောတော’တိ ဟိဒံ, သာရိပုတ္တ, ဝုစ္စတိ။ ကတမော နု ခော, သာရိပုတ္တ, သောတော’’တိ? ‘‘အယမေဝ ဟိ, ဘန္တေ, အရိယော အဋ္ဌင္ဂိကော မဂ္ဂော သောတော, သေယ္ယထိဒံ – သမ္မာဒိဋ္ဌိ, သမ္မာသင္ကပ္ပော, သမ္မာဝာစာ, သမ္မာကမ္မန္တော, သမ္မာအာဇီဝော, သမ္မာဝာယာမော, သမ္မာသတိ, သမ္မာသမာဓီ’’တိ။ ‘‘သာဓု သာဓု, သာရိပုတ္တ! အယမေဝ ဟိ, သာရိပုတ္တ, အရိယော အဋ္ဌင္ဂိကော မဂ္ဂော သောတော, သေယ္ယထိဒံ – သမ္မာဒိဋ္ဌိ။ပေ.။ သမ္မာသမာဓိ’’။
‘‘‘Soto, soto’ti hidaṃ, sāriputta, vuccati. Katamo nu kho, sāriputta, soto’’ti? ‘‘Ayameva hi, bhante, ariyo aṭṭhaṅgiko maggo soto, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhī’’ti. ‘‘Sādhu sādhu, sāriputta! Ayameva hi, sāriputta, ariyo aṭṭhaṅgiko maggo soto, seyyathidaṃ – sammādiṭṭhi…pe… sammāsamādhi’’.
‘‘‘သောတာပန္နော , သောတာပန္နော’တိ ဟိဒံ, သာရိပုတ္တ, ဝုစ္စတိ။ ကတမော နု ခော, သာရိပုတ္တ, သောတာပန္နော’’တိ ? ‘‘ယော ဟိ, ဘန္တေ, ဣမိနာ အရိယေန အဋ္ဌင္ဂိကေန မဂ္ဂေန သမန္နာဂတော အယံ ဝုစ္စတိ သောတာပန္နော, သ္ဝာယံ အာယသ္မာ ဧဝံနာမော ဧဝံဂောတ္တော’’တိ။ ‘‘သာဓု သာဓု, သာရိပုတ္တ! ယော ဟိ, သာရိပုတ္တ, ဣမိနာ အရိယေန အဋ္ဌင္ဂိကေန မဂ္ဂေန သမန္နာဂတော အယံ ဝုစ္စတိ သောတာပန္နော, သ္ဝာယံ အာယသ္မာ ဧဝံနာမော ဧဝံဂောတ္တော’’တိ။ ပဉ္စမံ။
‘‘‘Sotāpanno , sotāpanno’ti hidaṃ, sāriputta, vuccati. Katamo nu kho, sāriputta, sotāpanno’’ti ? ‘‘Yo hi, bhante, iminā ariyena aṭṭhaṅgikena maggena samannāgato ayaṃ vuccati sotāpanno, svāyaṃ āyasmā evaṃnāmo evaṃgotto’’ti. ‘‘Sādhu sādhu, sāriputta! Yo hi, sāriputta, iminā ariyena aṭṭhaṅgikena maggena samannāgato ayaṃ vuccati sotāpanno, svāyaṃ āyasmā evaṃnāmo evaṃgotto’’ti. Pañcamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄-၅. ပဌမသာရိပုတ္တသုတ္တာဒိဝဏ္ဏနာ • 4-5. Paṭhamasāriputtasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄-၅. ပဌမသာရိပုတ္တသုတ္တာဒိဝဏ္ဏနာ • 4-5. Paṭhamasāriputtasuttādivaṇṇanā
