| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
2. දුතියසික්‌ඛාපදං
2. Dutiyasikkhāpadaṃ
738. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ . තෙන ඛො පන සමයෙන සම්‌බහුලා භික්‌ඛුනියො ගාමකාවාසෙ වස්‌සංවුට්‌ඨා 1 සාවත්‌ථිං අගමංසු වත්‌තසම්‌පන්‌නා ඉරියාපථසම්‌පන්‌නා දුච්‌චොළා ලූඛචීවරා. උපාසකා තා භික්‌ඛුනියො පස්‌සිත්‌වා – ‘‘ඉමා භික්‌ඛුනියො වත්‌තසම්‌පන්‌නා ඉරියාපථසම්‌පන්‌නා දුච්‌චොළා ලූඛචීවරා, ඉමා භික්‌ඛුනියො අච්‌ඡින්‌නා භවිස්‌සන්‌තී’’ති භික්‌ඛුනිසඞ්‌ඝස්‌ස අකාලචීවරං අදංසු. ථුල්‌ලනන්‌දා භික්‌ඛුනී – ‘‘අම්‌හාකං කථිනං අත්‌ථතං කාලචීවර’’න්‌ති අධිට්‌ඨහිත්‌වා භාජාපෙසි. උපාසකා තා භික්‌ඛුනියො පස්‌සිත්‌වා එතදවොචුං – ‘‘අපය්‍යාහි චීවරං ලද්‌ධ’’න්‌ති? ‘‘න මයං, ආවුසො, චීවරං ලභාම. අය්‍යා ථුල්‌ලනන්‌දා – ‘අම්‌හාකං කථිනං අත්‌ථතං කාලචීවර’න්‌ති අධිට්‌ඨහිත්‌වා භාජාපෙසී’’ති. උපාසකා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා අකාලචීවරං ‘කාලචීවර’න්‌ති අධිට්‌ඨහිත්‌වා භාජාපෙස්‌සතී’’ති! අස්‌සොසුං ඛො භික්‌ඛුනියො තෙසං උපාසකානං උජ්‌ඣායන්‌තානං ඛිය්‍යන්‌තානං විපාචෙන්‌තානං. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා අකාලචීවරං ‘කාලචීවර’න්‌ති අධිට්‌ඨහිත්‌වා භාජාපෙස්‌සතී’’ති! අථ ඛො තා භික්‌ඛුනියො භික්‌ඛූනං එතමත්‌ථං ආරොචෙසුං. භික්‌ඛූ භගවතො එතමත්‌ථං ආරොචෙසුං …පෙ.… සච්‌චං කිර, භික්‌ඛවෙ , ථුල්‌ලනන්‌දා භික්‌ඛුනී අකාලචීවරං ‘‘කාලචීවර’’න්‌ති අධිට්‌ඨහිත්‌වා භාජාපෙතීති 2? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී අකාලචීවරං ‘‘කාලචීවර’’න්‌ති අධිට්‌ඨහිත්‌වා භාජාපෙස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
738. Tena samayena buddho bhagavā sāvatthiyaṃ viharati jetavane anāthapiṇḍikassa ārāme . Tena kho pana samayena sambahulā bhikkhuniyo gāmakāvāse vassaṃvuṭṭhā 3 sāvatthiṃ agamaṃsu vattasampannā iriyāpathasampannā duccoḷā lūkhacīvarā. Upāsakā tā bhikkhuniyo passitvā – ‘‘imā bhikkhuniyo vattasampannā iriyāpathasampannā duccoḷā lūkhacīvarā, imā bhikkhuniyo acchinnā bhavissantī’’ti bhikkhunisaṅghassa akālacīvaraṃ adaṃsu. Thullanandā bhikkhunī – ‘‘amhākaṃ kathinaṃ atthataṃ kālacīvara’’nti adhiṭṭhahitvā bhājāpesi. Upāsakā tā bhikkhuniyo passitvā etadavocuṃ – ‘‘apayyāhi cīvaraṃ laddha’’nti? ‘‘Na mayaṃ, āvuso, cīvaraṃ labhāma. Ayyā thullanandā – ‘amhākaṃ kathinaṃ atthataṃ kālacīvara’nti adhiṭṭhahitvā bhājāpesī’’ti. Upāsakā ujjhāyanti khiyyanti vipācenti – ‘‘kathañhi nāma ayyā thullanandā akālacīvaraṃ ‘kālacīvara’nti adhiṭṭhahitvā bhājāpessatī’’ti! Assosuṃ kho bhikkhuniyo tesaṃ upāsakānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā akālacīvaraṃ ‘kālacīvara’nti adhiṭṭhahitvā bhājāpessatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ …pe… saccaṃ kira, bhikkhave , thullanandā bhikkhunī akālacīvaraṃ ‘‘kālacīvara’’nti adhiṭṭhahitvā bhājāpetīti 4? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī akālacīvaraṃ ‘‘kālacīvara’’nti adhiṭṭhahitvā bhājāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
739. ‘‘යා පන භික්‌ඛුනී අකාලචීවරං ‘කාලචීවර’න්‌ති අධිට්‌ඨහිත්‌වා භාජාපෙය්‍ය, නිස්‌සග්‌ගියං පාචිත්‌තිය’’න්‌ති.
739.‘‘Yā pana bhikkhunī akālacīvaraṃ ‘kālacīvara’nti adhiṭṭhahitvā bhājāpeyya, nissaggiyaṃ pācittiya’’nti.
740. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
740.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
අකාලචීවරං නාම අනත්‌ථතෙ කථිනෙ එකාදසමාසෙ උප්‌පන්‌නං, අත්‌ථතෙ කථිනෙ සත්‌තමාසෙ උප්‌පන්‌නං, කාලෙපි ආදිස්‌ස දින්‌නං, එතං අකාලචීවරං නාම.
Akālacīvaraṃ nāma anatthate kathine ekādasamāse uppannaṃ, atthate kathine sattamāse uppannaṃ, kālepi ādissa dinnaṃ, etaṃ akālacīvaraṃ nāma.
අකාලචීවරං ‘‘කාලචීවර’’න්‌ති අධිට්‌ඨහිත්‌වා භාජාපෙති, පයොගෙ දුක්‌කටං. පටිලාභෙන නිස්‌සග්‌ගියං හොති. නිස්‌සජ්‌ජිතබ්‌බං සඞ්‌ඝස්‌ස වා ගණස්‌ස වා එකභික්‌ඛුනියා වා. එවඤ්‌ච පන , භික්‌ඛවෙ, නිස්‌සජ්‌ජිතබ්‌බං…පෙ.… ඉදං මෙ, අය්‍යෙ, අකාලචීවරං ‘‘කාලචීවර’න්‌ති අධිට්‌ඨහිත්‌වා භාජාපිතං නිස්‌සග්‌ගියං, ඉමාහං සඞ්‌ඝස්‌ස නිස්‌සජ්‌ජාමී’’ති…පෙ.… දදෙය්‍යාති…පෙ.… දදෙය්‍යුන්‌ති…පෙ.… අය්‍යාය දම්‌මීති.
Akālacīvaraṃ ‘‘kālacīvara’’nti adhiṭṭhahitvā bhājāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana , bhikkhave, nissajjitabbaṃ…pe… idaṃ me, ayye, akālacīvaraṃ ‘‘kālacīvara’nti adhiṭṭhahitvā bhājāpitaṃ nissaggiyaṃ, imāhaṃ saṅghassa nissajjāmī’’ti…pe… dadeyyāti…pe… dadeyyunti…pe… ayyāya dammīti.
741. අකාලචීවරෙ අකාලචීවරසඤ්‌ඤා ‘‘කාලචීවර’’න්‌ති අධිට්‌ඨහිත්‌වා භාජාපෙති, නිස්‌සග්‌ගියං පාචිත්‌තියං. අකාලචීවරෙ වෙමතිකා ‘‘කාලචීවර’’න්‌ති අධිට්‌ඨහිත්‌වා භාජාපෙති, ආපත්‌ති දුක්‌කටස්‌ස. අකාලචීවරෙ කාලචීවරසඤ්‌ඤා ‘‘කාලචීවර’’න්‌ති අධිට්‌ඨහිත්‌වා භාජාපෙති , අනාපත්‌ති. කාලචීවරෙ අකාලචීවරසඤ්‌ඤා, ආපත්‌ති දුක්‌කටස්‌ස. කාලචීවරෙ වෙමතිකා, ආපත්‌ති දුක්‌කටස්‌ස. කාලචීවරෙ කාලචීවරසඤ්‌ඤා, අනාපත්‌ති.
741. Akālacīvare akālacīvarasaññā ‘‘kālacīvara’’nti adhiṭṭhahitvā bhājāpeti, nissaggiyaṃ pācittiyaṃ. Akālacīvare vematikā ‘‘kālacīvara’’nti adhiṭṭhahitvā bhājāpeti, āpatti dukkaṭassa. Akālacīvare kālacīvarasaññā ‘‘kālacīvara’’nti adhiṭṭhahitvā bhājāpeti , anāpatti. Kālacīvare akālacīvarasaññā, āpatti dukkaṭassa. Kālacīvare vematikā, āpatti dukkaṭassa. Kālacīvare kālacīvarasaññā, anāpatti.
742. අනාපත්‌ති අකාලචීවරං කාලචීවරසඤ්‌ඤා භාජාපෙති, කාලචීවරං කාලචීවරසඤ්‌ඤා භාජාපෙති, උම්‌මත්‌තිකාය, ආදිකම්‌මිකායාති.
742. Anāpatti akālacīvaraṃ kālacīvarasaññā bhājāpeti, kālacīvaraṃ kālacīvarasaññā bhājāpeti, ummattikāya, ādikammikāyāti.
දුතියසික්‌ඛාපදං නිට්‌ඨිතං.
Dutiyasikkhāpadaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / දුතියනිස්‌සග්‌ගියපාචිත්‌තියසික්‌ඛාපදවණ්‌ණනා • Dutiyanissaggiyapācittiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. නිස්‌සග්‌ගියකණ්‌ඩං (භික්‌ඛුනීවිභඞ්‌ගවණ්‌ණනා) • 3. Nissaggiyakaṇḍaṃ (bhikkhunīvibhaṅgavaṇṇanā)
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 2. දුතියනිස්‌සග්‌ගියපාචිත්‌තියසික්‌ඛාපදවණ්‌ණනා • 2. Dutiyanissaggiyapācittiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 2. දුතියනිස්‌සග්‌ගියාදිපාචිත්‌තියසික්‌ඛාපදවණ්‌ණනා • 2. Dutiyanissaggiyādipācittiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 2. දුතියනිස්‌සග්‌ගියපාචිත්‌තියසික්‌ඛාපදං • 2. Dutiyanissaggiyapācittiyasikkhāpadaṃ
