Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya

    ၄. ဒုတိယဥပနိသာသုတ္တံ

    4. Dutiyaupanisāsuttaṃ

    . တတ္ရ ခော အာယသ္မာ သာရိပုတ္တော ဘိက္ခူ အာမန္တေသိ – ‘‘အာဝုသော ဘိက္ခဝေ’’တိ 1။ ‘‘အာဝုသော’’တိ ခော တေ ဘိက္ခူ အာယသ္မတော သာရိပုတ္တသ္သ ပစ္စသ္သောသုံ။ အာယသ္မာ သာရိပုတ္တော ဧတဒဝောစ –

    4. Tatra kho āyasmā sāriputto bhikkhū āmantesi – ‘‘āvuso bhikkhave’’ti 2. ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –

    ‘‘ဒုသ္သီလသ္သ , အာဝုသော, သီလဝိပန္နသ္သ ဟတူပနိသော ဟောတိ အဝိပ္ပဋိသာရော, အဝိပ္ပဋိသာရေ အသတိ အဝိပ္ပဋိသာရဝိပန္နသ္သ ဟတူပနိသံ ဟောတိ ပာမောဇ္ဇံ, ပာမောဇ္ဇေ အသတိ ပာမောဇ္ဇဝိပန္နသ္သ ဟတူပနိသာ ဟောတိ ပီတိ, ပီတိယာ အသတိ ပီတိဝိပန္နသ္သ ဟတူပနိသာ ဟောတိ ပသ္သဒ္ဓိ, ပသ္သဒ္ဓိယာ အသတိ ပသ္သဒ္ဓိဝိပန္နသ္သ ဟတူပနိသံ ဟောတိ သုခံ, သုခေ အသတိ သုခဝိပန္နသ္သ ဟတူပနိသော ဟောတိ သမ္မာသမာဓိ, သမ္မာသမာဓိမ္ဟိ အသတိ သမ္မာသမာဓိဝိပန္နသ္သ ဟတူပနိသံ ဟောတိ ယထာဘူတဉာဏဒသ္သနံ, ယထာဘူတဉာဏဒသ္သနေ အသတိ ယထာဘူတဉာဏဒသ္သနဝိပန္နသ္သ ဟတူပနိသာ ဟောတိ နိဗ္ဗိဒာ , နိဗ္ဗိဒာယ အသတိ နိဗ္ဗိဒာဝိပန္နသ္သ ဟတူပနိသော ဟောတိ ဝိရာဂော, ဝိရာဂေ အသတိ ဝိရာဂဝိပန္နသ္သ ဟတူပနိသံ ဟောတိ ဝိမုတ္တိဉာဏဒသ္သနံ။

    ‘‘Dussīlassa , āvuso, sīlavipannassa hatūpaniso hoti avippaṭisāro, avippaṭisāre asati avippaṭisāravipannassa hatūpanisaṃ hoti pāmojjaṃ, pāmojje asati pāmojjavipannassa hatūpanisā hoti pīti, pītiyā asati pītivipannassa hatūpanisā hoti passaddhi, passaddhiyā asati passaddhivipannassa hatūpanisaṃ hoti sukhaṃ, sukhe asati sukhavipannassa hatūpaniso hoti sammāsamādhi, sammāsamādhimhi asati sammāsamādhivipannassa hatūpanisaṃ hoti yathābhūtañāṇadassanaṃ, yathābhūtañāṇadassane asati yathābhūtañāṇadassanavipannassa hatūpanisā hoti nibbidā , nibbidāya asati nibbidāvipannassa hatūpaniso hoti virāgo, virāge asati virāgavipannassa hatūpanisaṃ hoti vimuttiñāṇadassanaṃ.

    ‘‘သေယ္ယထာပိ, အာဝုသော, ရုက္ခော သာခာပလာသဝိပန္နော။ တသ္သ ပပဋိကာပိ န ပာရိပူရိံ ဂစ္ဆတိ, တစောပိ။ ဖေဂ္ဂုပိ။ သာရောပိ န ပာရိပူရိံ ဂစ္ဆတိ။ ဧဝမေဝံ ခော, အာဝုသော, ဒုသ္သီလသ္သ သီလဝိပန္နသ္သ ဟတူပနိသော ဟောတိ အဝိပ္ပဋိသာရော, အဝိပ္ပဋိသာရေ အသတိ အဝိပ္ပဋိသာရဝိပန္နသ္သ ဟတူပနိသံ ဟောတိ ပာမောဇ္ဇံ။ပေ.။ ဝိမုတ္တိဉာဏဒသ္သနံ။

    ‘‘Seyyathāpi, āvuso, rukkho sākhāpalāsavipanno. Tassa papaṭikāpi na pāripūriṃ gacchati, tacopi… pheggupi… sāropi na pāripūriṃ gacchati. Evamevaṃ kho, āvuso, dussīlassa sīlavipannassa hatūpaniso hoti avippaṭisāro, avippaṭisāre asati avippaṭisāravipannassa hatūpanisaṃ hoti pāmojjaṃ…pe… vimuttiñāṇadassanaṃ.

    ‘‘သီလဝတော, အာဝုသော, သီလသမ္ပန္နသ္သ ဥပနိသသမ္ပန္နော ဟောတိ အဝိပ္ပဋိသာရော, အဝိပ္ပဋိသာရေ သတိ အဝိပ္ပဋိသာရသမ္ပန္နသ္သ ဥပနိသသမ္ပန္နံ ဟောတိ ပာမောဇ္ဇံ, ပာမောဇ္ဇေ သတိ ပာမောဇ္ဇသမ္ပန္နသ္သ ဥပနိသသမ္ပန္နာ ဟောတိ ပီတိ, ပီတိယာ သတိ ပီတိသမ္ပန္နသ္သ ဥပနိသသမ္ပန္နာ ဟောတိ ပသ္သဒ္ဓိ, ပသ္သဒ္ဓိယာ သတိ ပသ္သဒ္ဓိသမ္ပန္နသ္သ ဥပနိသသမ္ပန္နံ ဟောတိ သုခံ, သုခေ သတိ သုခသမ္ပန္နသ္သ ဥပနိသသမ္ပန္နော ဟောတိ သမ္မာသမာဓိ, သမ္မာသမာဓိမ္ဟိ သတိ သမ္မာသမာဓိသမ္ပန္နသ္သ ဥပနိသသမ္ပန္နံ ဟောတိ ယထာဘူတဉာဏဒသ္သနံ, ယထာဘူတဉာဏဒသ္သနေ သတိ ယထာဘူတဉာဏဒသ္သနသမ္ပန္နသ္သ ဥပနိသသမ္ပန္နာ ဟောတိ နိဗ္ဗိဒာ, နိဗ္ဗိဒာယ သတိ နိဗ္ဗိဒာသမ္ပန္နသ္သ ဥပနိသသမ္ပန္နော ဟောတိ ဝိရာဂော, ဝိရာဂေ သတိ ဝိရာဂသမ္ပန္နသ္သ ဥပနိသသမ္ပန္နံ ဟောတိ ဝိမုတ္တိဉာဏဒသ္သနံ။

    ‘‘Sīlavato, āvuso, sīlasampannassa upanisasampanno hoti avippaṭisāro, avippaṭisāre sati avippaṭisārasampannassa upanisasampannaṃ hoti pāmojjaṃ, pāmojje sati pāmojjasampannassa upanisasampannā hoti pīti, pītiyā sati pītisampannassa upanisasampannā hoti passaddhi, passaddhiyā sati passaddhisampannassa upanisasampannaṃ hoti sukhaṃ, sukhe sati sukhasampannassa upanisasampanno hoti sammāsamādhi, sammāsamādhimhi sati sammāsamādhisampannassa upanisasampannaṃ hoti yathābhūtañāṇadassanaṃ, yathābhūtañāṇadassane sati yathābhūtañāṇadassanasampannassa upanisasampannā hoti nibbidā, nibbidāya sati nibbidāsampannassa upanisasampanno hoti virāgo, virāge sati virāgasampannassa upanisasampannaṃ hoti vimuttiñāṇadassanaṃ.

    ‘‘သေယ္ယထာပိ, အာဝုသော, ရုက္ခော သာခာပလာသသမ္ပန္နော။ တသ္သ ပပဋိကာပိ ပာရိပူရိံ ဂစ္ဆတိ, တစောပိ။ ဖေဂ္ဂုပိ။ သာရောပိ ပာရိပူရိံ ဂစ္ဆတိ။ ဧဝမေဝံ ခော, အာဝုသော, သီလဝတော သီလသမ္ပန္နသ္သ ဥပနိသသမ္ပန္နော ဟောတိ အဝိပ္ပဋိသာရော, အဝိပ္ပဋိသာရေ သတိ အဝိပ္ပဋိသာရသမ္ပန္နသ္သ ဥပနိသသမ္ပန္နံ ဟောတိ ပာမောဇ္ဇံ။ပေ.။ ဝိမုတ္တိဉာဏဒသ္သန’’န္တိ။ စတုတ္ထံ။

    ‘‘Seyyathāpi, āvuso, rukkho sākhāpalāsasampanno. Tassa papaṭikāpi pāripūriṃ gacchati, tacopi… pheggupi… sāropi pāripūriṃ gacchati. Evamevaṃ kho, āvuso, sīlavato sīlasampannassa upanisasampanno hoti avippaṭisāro, avippaṭisāre sati avippaṭisārasampannassa upanisasampannaṃ hoti pāmojjaṃ…pe… vimuttiñāṇadassana’’nti. Catutthaṃ.







    Footnotes:
    1. ဘိက္ခဝောတိ (သီ. သ္ယာ. ပီ.) ဧဝံ သဗ္ဗတ္ထ အ. နိ. ၁၀.၄
    2. bhikkhavoti (sī. syā. pī.) evaṃ sabbattha a. ni. 10.4



    Related texts:



    အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁-၆. ကိမတ္ထိယသုတ္တာဒိဝဏ္ဏနာ • 1-6. Kimatthiyasuttādivaṇṇanā

    ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၁၀. ကိမတ္ထိယသုတ္တာဒိဝဏ္ဏနာ • 1-10. Kimatthiyasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact