| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
4. එකාසනියත්‌ථෙරඅපදානවණ්‌ණනා
4. Ekāsaniyattheraapadānavaṇṇanā
වරුණො නාම නාමෙනාතිආදිකං ආයස්‌මතො එකාසනියත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො අත්‌ථදස්‌සිස්‌ස භගවතො කාලෙ වරුණො නාම දෙවරාජා හුත්‌වා නිබ්‌බත්‌ති. සො භගවන්‌තං දිස්‌වා පසන්‌නමානසො ගන්‌ධමාලාදීහි ගීතවාදිතෙහි ච උපට්‌ඨයමානො සපරිවාරො පූජෙසි. තතො අපරභාගෙ භගවති පරිනිබ්‌බුතෙ තස්‌ස මහාබොධිරුක්‌ඛං බුද්‌ධදස්‌සනං විය සබ්‌බතූරියතාළාවචරෙහි සපරිවාරො උපහාරමකාසි. සො තෙන පුඤ්‌ඤෙන තතො කාලඞ්‌කත්‌වා නිම්‌මානරතිදෙවලොකෙ උප්‌පජ්‌ජි. එවං දෙවසම්‌පත්‌තිමනුභවිත්‌වා මනුස්‌සෙසු ච මනුස්‌සභූතො චක්‌කවත්‌තිසම්‌පත්‌තිං අනුභවිත්‌වා ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො විඤ්‌ඤුතං පත්‌වා සත්‌ථු සාසනෙ පබ්‌බජිත්‌වා නචිරස්‌සෙව අරහා අහොසි.
Varuṇonāma nāmenātiādikaṃ āyasmato ekāsaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle varuṇo nāma devarājā hutvā nibbatti. So bhagavantaṃ disvā pasannamānaso gandhamālādīhi gītavāditehi ca upaṭṭhayamāno saparivāro pūjesi. Tato aparabhāge bhagavati parinibbute tassa mahābodhirukkhaṃ buddhadassanaṃ viya sabbatūriyatāḷāvacarehi saparivāro upahāramakāsi. So tena puññena tato kālaṅkatvā nimmānaratidevaloke uppajji. Evaṃ devasampattimanubhavitvā manussesu ca manussabhūto cakkavattisampattiṃ anubhavitvā imasmiṃ buddhuppāde kulagehe nibbatto viññutaṃ patvā satthu sāsane pabbajitvā nacirasseva arahā ahosi.
31. සො පච්‌ඡා සකකම්‌මං සරිත්‌වා තං තථතො ඤත්‌වා සොමනස්‌සජාතො පුබ්‌බචරිතාපදානං පකාසෙන්‌තො වරුණො නාම නාමෙනාතිආදිමාහ. තත්‌ථ යදා අහං සම්‌බොධනත්‌ථාය බුද්‌ධං බොධිඤ්‌ච පූජෙසිං, තදා වරුණො නාම දෙවරාජා අහොසින්‌ති සම්‌බන්‌ධො.
31. So pacchā sakakammaṃ saritvā taṃ tathato ñatvā somanassajāto pubbacaritāpadānaṃ pakāsento varuṇo nāma nāmenātiādimāha. Tattha yadā ahaṃ sambodhanatthāya buddhaṃ bodhiñca pūjesiṃ, tadā varuṇo nāma devarājā ahosinti sambandho.
34. ධරණීරුහපාදපන්‌ති එත්‌ථ රුක්‌ඛලතාපබ්‌බතසත්‌ථරතනාදයො ධාරෙතීති ධරණී, තස්‌මිං රුහති පතිට්‌ඨහතීති ධරණීරුහො. පාදෙන පිවතීති පාදපො, සිඤ්‌චිතසිඤ්‌චිතොදකං පාදෙන මූලෙන පිවති රුක්‌ඛක්‌ඛන්‌ධසාඛාවිටපෙහි ආපොරසං පත්‌ථරියතීති අත්‌ථො, තං ධරණීරුහපාදපං බොධිරුක්‌ඛන්‌ති සම්‌බන්‌ධො.
34.Dharaṇīruhapādapanti ettha rukkhalatāpabbatasattharatanādayo dhāretīti dharaṇī, tasmiṃ ruhati patiṭṭhahatīti dharaṇīruho. Pādena pivatīti pādapo, siñcitasiñcitodakaṃ pādena mūlena pivati rukkhakkhandhasākhāviṭapehi āporasaṃ patthariyatīti attho, taṃ dharaṇīruhapādapaṃ bodhirukkhanti sambandho.
35. සකකම්‌මාභිරද්‌ධොති අත්‌තනො කුසලකම්‌මෙන අභිරද්‌ධො පසන්‌නො උත්‌තමෙ බොධිම්‌හි පසන්‌නොති සම්‌බන්‌ධො. සෙසං සබ්‌බත්‌ථ උත්‌තානමෙවාති.
35.Sakakammābhiraddhoti attano kusalakammena abhiraddho pasanno uttame bodhimhi pasannoti sambandho. Sesaṃ sabbattha uttānamevāti.
එකාසනියත්‌ථෙරඅපදානවණ්‌ණනා සමත්‌තා.
Ekāsaniyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 4. එකාසනියත්‌ථෙරඅපදානං • 4. Ekāsaniyattheraapadānaṃ
