Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၈. ဂဟဋ္ဌဝန္ဒနာသုတ္တံ
8. Gahaṭṭhavandanāsuttaṃ
၂၆၄. သာဝတ္ထိယံ။ တတ္ရ။ပေ.။ ဧတဒဝောစ – ‘‘ဘူတပုဗ္ဗံ, ဘိက္ခဝေ, သက္ကော ဒေဝာနမိန္ဒော မာတလိံ သင္ဂာဟကံ အာမန္တေသိ – ‘ယောဇေဟိ, သမ္မ မာတလိ, သဟသ္သယုတ္တံ အာဇညရထံ။ ဥယ္ယာနဘူမိံ ဂစ္ဆာမ သုဘူမိံ ဒသ္သနာယာ’တိ။ ‘ဧဝံ ဘဒ္ဒန္တဝာ’တိ ခော, ဘိက္ခဝေ, မာတလိ သင္ဂာဟကော သက္ကသ္သ ဒေဝာနမိန္ဒသ္သ ပဋိသ္သုတ္ဝာ သဟသ္သယုတ္တံ အာဇညရထံ ယောဇေတ္ဝာ သက္ကသ္သ ဒေဝာနမိန္ဒသ္သ ပဋိဝေဒေသိ – ‘ယုတ္တော ခော တေ, မာရိသ, သဟသ္သယုတ္တော အာဇညရထော။ ယသ္သ ဒာနိ ကာလံ မညသီ’’’တိ။ အထ ခော, ဘိက္ခဝေ, သက္ကော ဒေဝာနမိန္ဒော ဝေဇယန္တပာသာဒာ ဩရောဟန္တော အဉ္ဇလိံ ကတ္ဝာ 1 သုဒံ ပုထုဒ္ဒိသာ နမသ္သတိ။ အထ ခော, ဘိက္ခဝေ, မာတလိ သင္ဂာဟကော သက္ကံ ဒေဝာနမိန္ဒံ ဂာထာယ အဇ္ဈဘာသိ –
264. Sāvatthiyaṃ. Tatra…pe… etadavoca – ‘‘bhūtapubbaṃ, bhikkhave, sakko devānamindo mātaliṃ saṅgāhakaṃ āmantesi – ‘yojehi, samma mātali, sahassayuttaṃ ājaññarathaṃ. Uyyānabhūmiṃ gacchāma subhūmiṃ dassanāyā’ti. ‘Evaṃ bhaddantavā’ti kho, bhikkhave, mātali saṅgāhako sakkassa devānamindassa paṭissutvā sahassayuttaṃ ājaññarathaṃ yojetvā sakkassa devānamindassa paṭivedesi – ‘yutto kho te, mārisa, sahassayutto ājaññaratho. Yassa dāni kālaṃ maññasī’’’ti. Atha kho, bhikkhave, sakko devānamindo vejayantapāsādā orohanto añjaliṃ katvā 2 sudaṃ puthuddisā namassati. Atha kho, bhikkhave, mātali saṅgāhako sakkaṃ devānamindaṃ gāthāya ajjhabhāsi –
‘‘တံ နမသ္သန္တိ တေဝိဇ္ဇာ၊ သဗ္ဗေ ဘုမ္မာ စ ခတ္တိယာ။
‘‘Taṃ namassanti tevijjā, sabbe bhummā ca khattiyā;
စတ္တာရော စ မဟာရာဇာ၊ တိဒသာ စ ယသသ္သိနော။
Cattāro ca mahārājā, tidasā ca yasassino;
အထ ကော နာမ သော ယက္ခော၊ ယံ တ္ဝံ သက္က နမသ္သသီ’’တိ။
Atha ko nāma so yakkho, yaṃ tvaṃ sakka namassasī’’ti.
‘‘မံ နမသ္သန္တိ တေဝိဇ္ဇာ၊ သဗ္ဗေ ဘုမ္မာ စ ခတ္တိယာ။
‘‘Maṃ namassanti tevijjā, sabbe bhummā ca khattiyā;
စတ္တာရော စ မဟာရာဇာ၊ တိဒသာ စ ယသသ္သိနော။
Cattāro ca mahārājā, tidasā ca yasassino.
‘‘အဟဉ္စ သီလသမ္ပန္နေ၊ စိရရတ္တသမာဟိတေ။
‘‘Ahañca sīlasampanne, cirarattasamāhite;
သမ္မာပဗ္ဗဇိတေ ဝန္ဒေ၊ ဗ္ရဟ္မစရိယပရာယနေ။
Sammāpabbajite vande, brahmacariyaparāyane.
‘‘ယေ ဂဟဋ္ဌာ ပုညကရာ၊ သီလဝန္တော ဥပာသကာ။
‘‘Ye gahaṭṭhā puññakarā, sīlavanto upāsakā;
ဓမ္မေန ဒာရံ ပောသေန္တိ၊ တေ နမသ္သာမိ မာတလီ’’တိ။
Dhammena dāraṃ posenti, te namassāmi mātalī’’ti.
‘‘သေဋ္ဌာ ဟိ ကိရ လောကသ္မိံ၊ ယေ တ္ဝံ သက္က နမသ္သသိ။
‘‘Seṭṭhā hi kira lokasmiṃ, ye tvaṃ sakka namassasi;
အဟမ္ပိ တေ နမသ္သာမိ၊ ယေ နမသ္သသိ ဝာသဝာ’’တိ။
Ahampi te namassāmi, ye namassasi vāsavā’’ti.
‘‘ဣဒံ ဝတ္ဝာန မဃဝာ၊ ဒေဝရာဇာ သုဇမ္ပတိ။
‘‘Idaṃ vatvāna maghavā, devarājā sujampati;
ပုထုဒ္ဒိသာ နမသ္သိတ္ဝာ၊ ပမုခော ရထမာရုဟီ’’တိ။
Puthuddisā namassitvā, pamukho rathamāruhī’’ti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. ဂဟဋ္ဌဝန္ဒနာသုတ္တဝဏ္ဏနာ • 8. Gahaṭṭhavandanāsuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၈. ဂဟဋ္ဌဝန္ဒနာသုတ္တဝဏ္ဏနာ • 8. Gahaṭṭhavandanāsuttavaṇṇanā