Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၀. ဃဋီကာရသုတ္တံ
10. Ghaṭīkārasuttaṃ
၅၀.
50.
‘‘အဝိဟံ ဥပပန္နာသေ၊ ဝိမုတ္တာ သတ္တ ဘိက္ခဝော။
‘‘Avihaṃ upapannāse, vimuttā satta bhikkhavo;
ရာဂဒောသပရိက္ခီဏာ၊ တိဏ္ဏာ လောကေ ဝိသတ္တိက’’န္တိ။
Rāgadosaparikkhīṇā, tiṇṇā loke visattika’’nti.
‘‘ကေ စ တေ အတရုံ ပင္ကံ 1၊ မစ္စုဓေယ္ယံ သုဒုတ္တရံ။
‘‘Ke ca te ataruṃ paṅkaṃ 2, maccudheyyaṃ suduttaraṃ;
ကေ ဟိတ္ဝာ မာနုသံ ဒေဟံ၊ ဒိဗ္ဗယောဂံ ဥပစ္စဂု’’န္တိ။
Ke hitvā mānusaṃ dehaṃ, dibbayogaṃ upaccagu’’nti.
‘‘ဥပကော ပလဂဏ္ဍော စ၊ ပုက္ကုသာတိ စ တေ တယော။
‘‘Upako palagaṇḍo ca, pukkusāti ca te tayo;
တေ ဟိတ္ဝာ မာနုသံ ဒေဟံ၊ ဒိဗ္ဗယောဂံ ဥပစ္စဂု’’န္တိ။
Te hitvā mānusaṃ dehaṃ, dibbayogaṃ upaccagu’’nti.
‘‘ကုသလီ ဘာသသီ တေသံ၊ မာရပာသပ္ပဟာယိနံ။
‘‘Kusalī bhāsasī tesaṃ, mārapāsappahāyinaṃ;
ကသ္သ တေ ဓမ္မမညာယ၊ အစ္ဆိဒုံ ဘဝဗန္ဓန’’န္တိ။
Kassa te dhammamaññāya, acchiduṃ bhavabandhana’’nti.
‘‘န အညတ္ရ ဘဂဝတာ၊ နာညတ္ရ တဝ သာသနာ။
‘‘Na aññatra bhagavatā, nāññatra tava sāsanā;
ယသ္သ တေ ဓမ္မမညာယ၊ အစ္ဆိဒုံ ဘဝဗန္ဓနံ။
Yassa te dhammamaññāya, acchiduṃ bhavabandhanaṃ.
‘‘ယတ္ထ နာမဉ္စ ရူပဉ္စ၊ အသေသံ ဥပရုဇ္ဈတိ။
‘‘Yattha nāmañca rūpañca, asesaṃ uparujjhati;
တံ တေ ဓမ္မံ ဣဓညာယ၊ အစ္ဆိဒုံ ဘဝဗန္ဓန’’န္တိ။
Taṃ te dhammaṃ idhaññāya, acchiduṃ bhavabandhana’’nti.
‘‘ဂမ္ဘီရံ ဘာသသီ ဝာစံ၊ ဒုဗ္ဗိဇာနံ သုဒုဗ္ဗုဓံ။
‘‘Gambhīraṃ bhāsasī vācaṃ, dubbijānaṃ sudubbudhaṃ;
ကသ္သ တ္ဝံ ဓမ္မမညာယ၊ ဝာစံ ဘာသသိ ဤဒိသ’’န္တိ။
Kassa tvaṃ dhammamaññāya, vācaṃ bhāsasi īdisa’’nti.
မာတာပေတ္တိဘရော အာသိံ၊ ကသ္သပသ္သ ဥပာသကော။
Mātāpettibharo āsiṃ, kassapassa upāsako.
‘‘ဝိရတော မေထုနာ ဓမ္မာ၊ ဗ္ရဟ္မစာရီ နိရာမိသော။
‘‘Virato methunā dhammā, brahmacārī nirāmiso;
အဟုဝာ တေ သဂာမေယ္ယော၊ အဟုဝာ တေ ပုရေ သခာ။
Ahuvā te sagāmeyyo, ahuvā te pure sakhā.
‘‘သောဟမေတေ ပဇာနာမိ၊ ဝိမုတ္တေ သတ္တ ဘိက္ခဝော။
‘‘Sohamete pajānāmi, vimutte satta bhikkhavo;
ရာဂဒောသပရိက္ခီဏေ၊ တိဏ္ဏေ လောကေ ဝိသတ္တိက’’န္တိ။
Rāgadosaparikkhīṇe, tiṇṇe loke visattika’’nti.
‘‘ဧဝမေတံ တဒာ အာသိ၊ ယထာ ဘာသသိ ဘဂ္ဂဝ။
‘‘Evametaṃ tadā āsi, yathā bhāsasi bhaggava;
ကုမ္ဘကာရော ပုရေ အာသိ၊ ဝေကဠိင္ဂေ ဃဋီကရော။
Kumbhakāro pure āsi, vekaḷiṅge ghaṭīkaro;
မာတာပေတ္တိဘရော အာသိ၊ ကသ္သပသ္သ ဥပာသကော။
Mātāpettibharo āsi, kassapassa upāsako.
‘‘ဝိရတော မေထုနာ ဓမ္မာ၊ ဗ္ရဟ္မစာရီ နိရာမိသော။
‘‘Virato methunā dhammā, brahmacārī nirāmiso;
အဟုဝာ မေ သဂာမေယ္ယော၊ အဟုဝာ မေ ပုရေ သခာ’’တိ။
Ahuvā me sagāmeyyo, ahuvā me pure sakhā’’ti.
‘‘ဧဝမေတံ ပုရာဏာနံ၊ သဟာယာနံ အဟု သင္ဂမော။
‘‘Evametaṃ purāṇānaṃ, sahāyānaṃ ahu saṅgamo;
ဥဘိန္နံ ဘာဝိတတ္တာနံ၊ သရီရန္တိမဓာရိန’’န္တိ။
Ubhinnaṃ bhāvitattānaṃ, sarīrantimadhārina’’nti.
အာဒိတ္တဝဂ္ဂော ပဉ္စမော။
Ādittavaggo pañcamo.
တသ္သုဒ္ဒာနံ –
Tassuddānaṃ –
အာဒိတ္တံ ကိံဒဒံ အန္နံ၊ ဧကမူလအနောမိယံ။
Ādittaṃ kiṃdadaṃ annaṃ, ekamūlaanomiyaṃ;
အစ္ဆရာဝနရောပဇေတံ၊ မစ္ဆရေန ဃဋီကရောတိ။
Accharāvanaropajetaṃ, maccharena ghaṭīkaroti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. ဃဋီကာရသုတ္တဝဏ္ဏနာ • 10. Ghaṭīkārasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. ဃဋီကာရသုတ္တဝဏ္ဏနာ • 10. Ghaṭīkārasuttavaṇṇanā