| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
4. ராஜவக்³கோ³
4. Rājavaggo
1. க⁴டிகாரஸுத்தவண்ணனா
1. Ghaṭikārasuttavaṇṇanā
282. ஏவங் மே ஸுதந்தி க⁴டிகாரஸுத்தங். தத்த² ஸிதங் பாத்வாகாஸீதி மஹாமக்³கே³ன க³ச்ச²ந்தோ அஞ்ஞதரங் பூ⁴மிப்பதே³ஸங் ஓலோகெத்வா – ‘‘அத்தி² நு கோ² மயா சரியங் சரமானேன இமஸ்மிங் டா²னே நிவுத்த²புப்³ப³’’ந்தி ஆவஜ்ஜந்தோ அத்³த³ஸ – ‘‘கஸ்ஸபபு³த்³த⁴காலே இமஸ்மிங் டா²னே வேக³ளிங்க³ங் நாம கா³மனிக³மோ அஹோஸி, அஹங் ததா³ ஜோதிபாலோ நாம மாணவோ அஹோஸிங், மய்ஹங் ஸஹாயோ க⁴டிகாரோ நாம கும்ப⁴காரோ அஹோஸி, தேன ஸத்³தி⁴ங் மயா இத⁴ ஏகங் ஸுகாரணங் கதங், தங் பி⁴க்கு²ஸங்க⁴ஸ்ஸ அபாகடங் படிச்ச²ன்னங், ஹந்த³ நங் பி⁴க்கு²ஸங்க⁴ஸ்ஸ பாகடங் கரோமீ’’தி மக்³கா³ ஓக்கம்ம அஞ்ஞதரஸ்மிங் பதே³ஸே டி²தகோவ ஸிதபாதுகம்மமகாஸி, அக்³க³க்³க³த³ந்தே த³ஸ்ஸெத்வா மந்த³ஹஸிதங் ஹஸி. யதா² ஹி லோகியமனுஸ்ஸா உரங் பஹரந்தா – ‘‘குஹங் குஹ’’ந்தி ஹஸந்தி, ந ஏவங் பு³த்³தா⁴, பு³த்³தா⁴னங் பன ஹஸிதங் ஹட்ட²பஹட்டா²காரமத்தமேவ ஹோதி.
282.Evaṃme sutanti ghaṭikārasuttaṃ. Tattha sitaṃ pātvākāsīti mahāmaggena gacchanto aññataraṃ bhūmippadesaṃ oloketvā – ‘‘atthi nu kho mayā cariyaṃ caramānena imasmiṃ ṭhāne nivutthapubba’’nti āvajjanto addasa – ‘‘kassapabuddhakāle imasmiṃ ṭhāne vegaḷiṅgaṃ nāma gāmanigamo ahosi, ahaṃ tadā jotipālo nāma māṇavo ahosiṃ, mayhaṃ sahāyo ghaṭikāro nāma kumbhakāro ahosi, tena saddhiṃ mayā idha ekaṃ sukāraṇaṃ kataṃ, taṃ bhikkhusaṅghassa apākaṭaṃ paṭicchannaṃ, handa naṃ bhikkhusaṅghassa pākaṭaṃ karomī’’ti maggā okkamma aññatarasmiṃ padese ṭhitakova sitapātukammamakāsi, aggaggadante dassetvā mandahasitaṃ hasi. Yathā hi lokiyamanussā uraṃ paharantā – ‘‘kuhaṃ kuha’’nti hasanti, na evaṃ buddhā, buddhānaṃ pana hasitaṃ haṭṭhapahaṭṭhākāramattameva hoti.
ஹஸிதஞ்ச நாமேதங் தேரஸஹி ஸோமனஸ்ஸஸஹக³தசித்தேஹி ஹோதி. தத்த² லோகியமஹாஜனோ அகுஸலதோ சதூஹி, காமாவசரகுஸலதோ சதூஹீதி அட்ட²ஹி சித்தேஹி ஹஸதி, ஸெக்கா² அகுஸலதோ தி³ட்டி²ஸம்பயுத்தானி த்³வே அபனெத்வா ச²ஹி சித்தேஹி ஹஸந்தி, கீ²ணாஸவா சதூஹி ஸஹேதுககிரியசித்தேஹி ஏகேன அஹேதுககிரியசித்தேனாதி பஞ்சஹி சித்தேஹி ஹஸந்தி. தேஸுபி ப³லவாரம்மணே ஆபாத²க³தே த்³வீஹி ஞாணஸம்பயுத்தசித்தேஹி ஹஸந்தி, து³ப்³ப³லாரம்மணே து³ஹேதுகசித்தத்³வயேன ச அஹேதுகசித்தேன சாதி தீஹி சித்தேஹி ஹஸந்தி. இமஸ்மிங் பன டா²னே கிரியாஹேதுகமனோவிஞ்ஞாணதா⁴துஸோமனஸ்ஸஸஹக³தசித்தங் ப⁴க³வதோ ஹட்ட²பஹட்டா²காரமத்தங் ஹஸிதங் உப்பாதே³ஸி.
Hasitañca nāmetaṃ terasahi somanassasahagatacittehi hoti. Tattha lokiyamahājano akusalato catūhi, kāmāvacarakusalato catūhīti aṭṭhahi cittehi hasati, sekkhā akusalato diṭṭhisampayuttāni dve apanetvā chahi cittehi hasanti, khīṇāsavā catūhi sahetukakiriyacittehi ekena ahetukakiriyacittenāti pañcahi cittehi hasanti. Tesupi balavārammaṇe āpāthagate dvīhi ñāṇasampayuttacittehi hasanti, dubbalārammaṇe duhetukacittadvayena ca ahetukacittena cāti tīhi cittehi hasanti. Imasmiṃ pana ṭhāne kiriyāhetukamanoviññāṇadhātusomanassasahagatacittaṃ bhagavato haṭṭhapahaṭṭhākāramattaṃ hasitaṃ uppādesi.
தங் பனேதங் ஹஸிதங் ஏவங் அப்பமத்தகம்பி தே²ரஸ்ஸ பாகடங் அஹோஸி. கத²ங்? ததா²ரூபே ஹி காலே ததா²க³தஸ்ஸ சதூஹி தா³டா²ஹி சதுத்³தீ³பிகமஹாமேக⁴முக²தோ ஸதேரதாவிஜ்ஜுலதா விய விரோசமானா மஹாதாலக்க²ந்த⁴பமாணா ரஸ்மிவட்டியோ உட்ட²ஹித்வா திக்க²த்துங் ஸீஸவரங் பத³க்கி²ணங் கத்வா தா³ட²க்³கே³ஸுயேவ அந்தரதா⁴யந்தி. தேன ஸஞ்ஞாணேன ஆயஸ்மா ஆனந்தோ³ ப⁴க³வதோ பச்ச²தோ க³ச்ச²மானோபி ஸிதபாதுபா⁴வங் ஜானாதி.
Taṃ panetaṃ hasitaṃ evaṃ appamattakampi therassa pākaṭaṃ ahosi. Kathaṃ? Tathārūpe hi kāle tathāgatassa catūhi dāṭhāhi catuddīpikamahāmeghamukhato sateratāvijjulatā viya virocamānā mahātālakkhandhapamāṇā rasmivaṭṭiyo uṭṭhahitvā tikkhattuṃ sīsavaraṃ padakkhiṇaṃ katvā dāṭhaggesuyeva antaradhāyanti. Tena saññāṇena āyasmā ānando bhagavato pacchato gacchamānopi sitapātubhāvaṃ jānāti.
ப⁴க³வந்தங் ஏதத³வோசாதி – ‘‘எத்த² கிர கஸ்ஸபோ ப⁴க³வா பி⁴க்கு²ஸங்க⁴ங் ஓவதி³, சதுஸச்சப்பகாஸனங் அகாஸி, ப⁴க³வதோபி எத்த² நிஸீதி³துங் ருசிங் உப்பாதெ³ஸ்ஸாமி, ஏவமயங் பூ⁴மிபா⁴கோ³ த்³வீஹி பு³த்³தே⁴ஹி பரிபு⁴த்தோ ப⁴விஸ்ஸதி, மஹாஜனோ க³ந்த⁴மாலாதீ³ஹி பூஜெத்வா சேதியட்டா²னங் கத்வா பரிசரந்தோ ஸக்³க³மக்³க³பராயணோ ப⁴விஸ்ஸதீ’’தி சிந்தெத்வா ஏதங் ‘‘தேன ஹி, ப⁴ந்தே,’’திஆதி³வசனங் அவோச.
Bhagavantaṃ etadavocāti – ‘‘ettha kira kassapo bhagavā bhikkhusaṅghaṃ ovadi, catusaccappakāsanaṃ akāsi, bhagavatopi ettha nisīdituṃ ruciṃ uppādessāmi, evamayaṃ bhūmibhāgo dvīhi buddhehi paribhutto bhavissati, mahājano gandhamālādīhi pūjetvā cetiyaṭṭhānaṃ katvā paricaranto saggamaggaparāyaṇo bhavissatī’’ti cintetvā etaṃ ‘‘tena hi, bhante,’’tiādivacanaṃ avoca.
283. முண்ட³கேன ஸமணகேனாதி முண்ட³ங் முண்டோ³தி, ஸமணங் வா ஸமணோதி வத்துங் வட்டதி, அயங் பன அபரிபக்கஞாணத்தா ப்³ராஹ்மணகுலே உக்³க³ஹிதவோஹாரவஸேனேவ ஹீளெந்தோ ஏவமாஹ. ஸொத்திஸினானிந்தி ஸினானத்தா²ய கதஸொத்திங். ஸொத்தி நாம குருவிந்த³பாஸாணசுண்ணானி லாகா²ய ப³ந்தி⁴த்வா கதகு³ளிககலாபகா வுச்சதி, யங் ஸந்தா⁴ய – ‘‘தேன கோ² பன ஸமயேன ச²ப்³ப³க்³கி³யா பி⁴க்கூ² குருவிந்த³கஸுத்தியா நஹாயந்தீ’’தி (சூளவ॰ 243) வுத்தங். தங் உபோ⁴ஸு அந்தேஸு க³ஹெத்வா ஸரீரங் க⁴ங்ஸந்தி. ஏவங் ஸம்மாதி யதா² ஏதரஹிபி மனுஸ்ஸா ‘‘சேதியவந்த³னாய க³ச்சா²ம, த⁴ம்மஸ்ஸவனத்தா²ய க³ச்சா²மா’’தி வுத்தா உஸ்ஸாஹங் ந கரொந்தி, ‘‘நடஸமஜ்ஜாதி³த³ஸ்ஸனத்தா²ய க³ச்சா²மா’’தி வுத்தா பன ஏகவசனேனேவ ஸம்படிச்ச²ந்தி, ததே²வ ஸின்ஹாயிதுந்தி வுத்தே ஏகவசனேன ஸம்படிச்ச²ந்தோ ஏவமாஹ.
283.Muṇḍakena samaṇakenāti muṇḍaṃ muṇḍoti, samaṇaṃ vā samaṇoti vattuṃ vaṭṭati, ayaṃ pana aparipakkañāṇattā brāhmaṇakule uggahitavohāravaseneva hīḷento evamāha. Sottisināninti sinānatthāya katasottiṃ. Sotti nāma kuruvindapāsāṇacuṇṇāni lākhāya bandhitvā kataguḷikakalāpakā vuccati, yaṃ sandhāya – ‘‘tena kho pana samayena chabbaggiyā bhikkhū kuruvindakasuttiyā nahāyantī’’ti (cūḷava. 243) vuttaṃ. Taṃ ubhosu antesu gahetvā sarīraṃ ghaṃsanti. Evaṃ sammāti yathā etarahipi manussā ‘‘cetiyavandanāya gacchāma, dhammassavanatthāya gacchāmā’’ti vuttā ussāhaṃ na karonti, ‘‘naṭasamajjādidassanatthāya gacchāmā’’ti vuttā pana ekavacaneneva sampaṭicchanti, tatheva sinhāyitunti vutte ekavacanena sampaṭicchanto evamāha.
284. ஜோதிபாலங் மாணவங் ஆமந்தேஸீதி ஏகபஸ்ஸே அரியபரிஹாரேன பட²மதரங் ந்ஹாயித்வா பச்சுத்தரித்வா டி²தோ தஸ்ஸ மஹந்தேன இஸ்ஸரியபரிஹாரேன ந்ஹாயந்தஸ்ஸ ந்ஹானபரியோஸானங் ஆக³மெத்வா தங் நிவத்த²னிவாஸனங் கேஸே வோத³கே குருமானங் ஆமந்தேஸி. அயந்தி ஆஸன்னத்தா த³ஸ்ஸெந்தோ ஆஹ. ஓவட்டிகங் வினிவட்டெ²த்வாதி நாக³ப³லோ போ³தி⁴ஸத்தோ ‘‘அபேஹி ஸம்மா’’தி ஈஸகங் பரிவத்தமானோவ தேன க³ஹிதக³ஹணங் விஸ்ஸஜ்ஜாபெத்வாதி அத்தோ². கேஸேஸு பராமஸித்வா ஏதத³வோசாதி ஸோ கிர சிந்தேஸி – ‘‘அயங் ஜோதிபாலோ பஞ்ஞவா, ஸகிங் த³ஸ்ஸனங் லப⁴மானோ ததா²க³தஸ்ஸ த³ஸ்ஸனேபி பஸீதி³ஸ்ஸதி, த⁴ம்மகதா²யபி பஸீதி³ஸ்ஸதி, பஸன்னோ ச பஸன்னாகாரங் காதுங் ஸக்கி²ஸ்ஸதி, மித்தா நாம ஏதத³த்த²ங் ஹொந்தி, யங்கிஞ்சி கத்வா மம ஸஹாயங் க³ஹெத்வா த³ஸப³லஸ்ஸ ஸந்திகங் க³மிஸ்ஸாமீ’’தி. தஸ்மா நங் கேஸேஸு பராமஸித்வா ஏதத³வோச.
284.Jotipālaṃ māṇavaṃ āmantesīti ekapasse ariyaparihārena paṭhamataraṃ nhāyitvā paccuttaritvā ṭhito tassa mahantena issariyaparihārena nhāyantassa nhānapariyosānaṃ āgametvā taṃ nivatthanivāsanaṃ kese vodake kurumānaṃ āmantesi. Ayanti āsannattā dassento āha. Ovaṭṭikaṃ vinivaṭṭhetvāti nāgabalo bodhisatto ‘‘apehi sammā’’ti īsakaṃ parivattamānova tena gahitagahaṇaṃ vissajjāpetvāti attho. Kesesu parāmasitvā etadavocāti so kira cintesi – ‘‘ayaṃ jotipālo paññavā, sakiṃ dassanaṃ labhamāno tathāgatassa dassanepi pasīdissati, dhammakathāyapi pasīdissati, pasanno ca pasannākāraṃ kātuṃ sakkhissati, mittā nāma etadatthaṃ honti, yaṃkiñci katvā mama sahāyaṃ gahetvā dasabalassa santikaṃ gamissāmī’’ti. Tasmā naṃ kesesu parāmasitvā etadavoca.
இத்தரஜச்சோதி அஞ்ஞஜாதிகோ, மயா ஸத்³தி⁴ங் அஸமானஜாதிகோ, லாமகஜாதிகோதி அத்தோ². ந வதித³ந்தி இத³ங் அம்ஹாகங் க³மனங் ந வத ஓரகங் ப⁴விஸ்ஸதி ந கு²த்³த³கங், மஹந்தங் ப⁴விஸ்ஸதி. அயஞ்ஹி ந அத்தனோ தா²மேன க³ண்ஹி, ஸத்து² தா²மேன க³ண்ஹீதி க³ஹணஸ்மிங்யேவ நிட்ட²ங் அக³மாஸி. யாவதாதோ³ஹிபீதி எத்த² தோ³காரஹிகாரபிகாரா நிபாதா, யாவதுபரிமந்தி அத்தோ². இத³ங் வுத்தங் ஹோதி – ‘‘வாசாய ஆலபனங் ஓவட்டிகாய க³ஹணஞ்ச அதிக்கமித்வா யாவ கேஸக்³க³ஹணம்பி தத்த² க³மனத்த²ங் பயோகோ³ கத்தப்³போ³’’தி.
Ittarajaccoti aññajātiko, mayā saddhiṃ asamānajātiko, lāmakajātikoti attho. Na vatidanti idaṃ amhākaṃ gamanaṃ na vata orakaṃ bhavissati na khuddakaṃ, mahantaṃ bhavissati. Ayañhi na attano thāmena gaṇhi, satthu thāmena gaṇhīti gahaṇasmiṃyeva niṭṭhaṃ agamāsi. Yāvatādohipīti ettha dokārahikārapikārā nipātā, yāvatuparimanti attho. Idaṃ vuttaṃ hoti – ‘‘vācāya ālapanaṃ ovaṭṭikāya gahaṇañca atikkamitvā yāva kesaggahaṇampi tattha gamanatthaṃ payogo kattabbo’’ti.
285. த⁴ம்மியா கதா²யாதி இத⁴ ஸதிபடிலாப⁴த்தா²ய புப்³பே³னிவாஸபடிஸங்யுத்தா த⁴ம்மீ கதா² வேதி³தப்³பா³. தஸ்ஸ ஹி ப⁴க³வா, – ‘‘ஜோதிபால, த்வங் ந லாமகட்டா²னங் ஓதிண்ணஸத்தோ, மஹாபோ³தி⁴பல்லங்கே பன ஸப்³ப³ஞ்ஞுதஞ்ஞாணங் பத்தெ²த்வா ஓதிண்ணோஸி, தாதி³ஸஸ்ஸ நாம பமாத³விஹாரோ ந யுத்தோ’’திஆதி³னா நயேன ஸதிபடிலாபா⁴ய த⁴ம்மங் கதே²ஸி. பரஸமுத்³த³வாஸீதே²ரா பன வத³ந்தி – ‘‘ஜோதிபால, யதா² அஹங் த³ஸபாரமியோ பூரெத்வா ஸப்³ப³ஞ்ஞுதஞ்ஞாணங் படிவிஜ்ஜி²த்வா வீஸதிஸஹஸ்ஸபி⁴க்கு²பரிவாரோ லோகே விசராமி, ஏவமேவங் த்வம்பி த³ஸபாரமியோ பூரெத்வா ஸப்³ப³ஞ்ஞுதஞ்ஞாணங் படிவிஜ்ஜி²த்வா ஸமணக³ணபரிவாரோ லோகே விசரிஸ்ஸஸி. ஏவரூபேன நாம தயா பமாத³ங் ஆபஜ்ஜிதுங் ந யுத்த’’ந்தி யதா²ஸ்ஸ பப்³ப³ஜ்ஜாய சித்தங் நமதி, ஏவங் காமேஸு ஆதீ³னவங் நெக்க²ம்மே ச ஆனிஸங்ஸங் கதே²ஸீதி.
285.Dhammiyākathāyāti idha satipaṭilābhatthāya pubbenivāsapaṭisaṃyuttā dhammī kathā veditabbā. Tassa hi bhagavā, – ‘‘jotipāla, tvaṃ na lāmakaṭṭhānaṃ otiṇṇasatto, mahābodhipallaṅke pana sabbaññutaññāṇaṃ patthetvā otiṇṇosi, tādisassa nāma pamādavihāro na yutto’’tiādinā nayena satipaṭilābhāya dhammaṃ kathesi. Parasamuddavāsītherā pana vadanti – ‘‘jotipāla, yathā ahaṃ dasapāramiyo pūretvā sabbaññutaññāṇaṃ paṭivijjhitvā vīsatisahassabhikkhuparivāro loke vicarāmi, evamevaṃ tvampi dasapāramiyo pūretvā sabbaññutaññāṇaṃ paṭivijjhitvā samaṇagaṇaparivāro loke vicarissasi. Evarūpena nāma tayā pamādaṃ āpajjituṃ na yutta’’nti yathāssa pabbajjāya cittaṃ namati, evaṃ kāmesu ādīnavaṃ nekkhamme ca ānisaṃsaṃ kathesīti.
286. அலத்த² கோ², ஆனந்த³,…பே॰… பப்³ப³ஜ்ஜங் அலத்த² உபஸம்பத³ந்தி பப்³ப³ஜித்வா கிமகாஸி? யங் போ³தி⁴ஸத்தேஹி கத்தப்³ப³ங். போ³தி⁴ஸத்தா ஹி பு³த்³தா⁴னங் ஸம்முகே² பப்³ப³ஜந்தி. பப்³ப³ஜித்வா ச பன இத்தரஸத்தா விய பதிதஸிங்கா³ ந ஹொந்தி, சதுபாரிஸுத்³தி⁴ஸீலே பன ஸுபதிட்டா²ய தேபிடகங் பு³த்³த⁴வசனங் உக்³க³ண்ஹித்வா தேரஸ து⁴தங்கா³னி ஸமாதா³ய அரஞ்ஞங் பவிஸித்வா க³தபச்சாக³தவத்தங் பூரயமானா ஸமணத⁴ம்மங் கரொந்தா விபஸ்ஸனங் வட்³டெ⁴த்வா யாவ அனுலோமஞாணங் ஆஹச்ச திட்ட²ந்தி, மக்³க³ப²லத்த²ங் வாயாமங் ந கரொந்தி. ஜோதிபாலோபி ததே²வ அகாஸி.
286.Alattha kho, ānanda,…pe… pabbajjaṃ alattha upasampadanti pabbajitvā kimakāsi? Yaṃ bodhisattehi kattabbaṃ. Bodhisattā hi buddhānaṃ sammukhe pabbajanti. Pabbajitvā ca pana ittarasattā viya patitasiṅgā na honti, catupārisuddhisīle pana supatiṭṭhāya tepiṭakaṃ buddhavacanaṃ uggaṇhitvā terasa dhutaṅgāni samādāya araññaṃ pavisitvā gatapaccāgatavattaṃ pūrayamānā samaṇadhammaṃ karontā vipassanaṃ vaḍḍhetvā yāva anulomañāṇaṃ āhacca tiṭṭhanti, maggaphalatthaṃ vāyāmaṃ na karonti. Jotipālopi tatheva akāsi.
287. அட்³ட⁴மாஸுபஸம்பன்னேதி குலதா³ரகஞ்ஹி பப்³பா³ஜெத்வா அட்³ட⁴மாஸம்பி அவஸித்வா க³தே மாதாபிதூனங் ஸோகோ ந வூபஸம்மதி, ஸோபி பத்தசீவரக்³க³ஹணங் ந ஜானாதி, த³ஹரபி⁴க்கு²ஸாமணேரேஹி ஸத்³தி⁴ங் விஸ்ஸாஸோ ந உப்பஜ்ஜதி, தே²ரேஹி ஸத்³தி⁴ங் ஸினேஹோ ந பதிட்டா²தி, க³தக³தட்டா²னே அனபி⁴ரதி உப்பஜ்ஜதி. எத்தகங் பன காலங் நிவாஸே ஸதி மாதாபிதரோ பஸ்ஸிதுங் லப⁴ந்தி. தேன தேஸங் ஸோகோ தனுபா⁴வங் க³ச்ச²தி, பத்தசீவரக்³க³ஹணங் ஜானாதி, ஸாமணேரத³ஹரபி⁴க்கூ²ஹி ஸத்³தி⁴ங் விஸ்ஸாஸோ ஜாயதி, தே²ரேஹி ஸத்³தி⁴ங் ஸினேஹோ பதிட்டா²தி, க³தக³தட்டா²னே அபி⁴ரமதி, ந உக்கண்ட²தி. தஸ்மா எத்தகங் வஸிதுங் வட்டதீதி அட்³ட⁴மாஸங் வஸித்வா பக்காமி.
287.Aḍḍhamāsupasampanneti kuladārakañhi pabbājetvā aḍḍhamāsampi avasitvā gate mātāpitūnaṃ soko na vūpasammati, sopi pattacīvaraggahaṇaṃ na jānāti, daharabhikkhusāmaṇerehi saddhiṃ vissāso na uppajjati, therehi saddhiṃ sineho na patiṭṭhāti, gatagataṭṭhāne anabhirati uppajjati. Ettakaṃ pana kālaṃ nivāse sati mātāpitaro passituṃ labhanti. Tena tesaṃ soko tanubhāvaṃ gacchati, pattacīvaraggahaṇaṃ jānāti, sāmaṇeradaharabhikkhūhi saddhiṃ vissāso jāyati, therehi saddhiṃ sineho patiṭṭhāti, gatagataṭṭhāne abhiramati, na ukkaṇṭhati. Tasmā ettakaṃ vasituṃ vaṭṭatīti aḍḍhamāsaṃ vasitvā pakkāmi.
பண்டு³புடகஸ்ஸ ஸாலினோதி புடகே கத்வா ஸுக்கா²பிதஸ்ஸ ரத்தஸாலினோ. தஸ்ஸ கிர ஸாலினோ வப்பகாலதோ பட்டா²ய அயங் பரிஹாரோ – கேதா³ரா ஸுபரிகம்மகதா ஹொந்தி, தத்த² பீ³ஜானி பதிட்டா²பெத்வா க³ந்தோ⁴த³கேன ஸிஞ்சிங்ஸு, வப்பகாலே விதானங் விய உபரி வத்த²கிலஞ்ஜங் ப³ந்தி⁴த்வா பரிபக்ககாலே வீஹிஸீஸானி சி²ந்தி³த்வா முட்டி²மத்தே புடகே கத்வா யொத்தப³த்³தே⁴ வேஹாஸங்யேவ ஸுக்கா²பெத்வா க³ந்த⁴சுண்ணானி அத்த²ரித்வா கொட்ட²கேஸு பூரெத்வா ததியே வஸ்ஸே விவரிங்ஸு. ஏவங் திவஸ்ஸங் பரிவுத்த²ஸ்ஸ ஸுக³ந்த⁴ரத்தஸாலினோ அபக³தகாளகே ஸுபரிஸுத்³தே⁴ தண்டு³லே க³ஹெத்வா க²ஜ்ஜகவிகதிம்பி ப⁴த்தம்பி படியாதி³யிங்ஸு. தங் ஸந்தா⁴ய வுத்தங் பணீதங் கா²த³னீயங் போ⁴ஜனீயங்…பே॰… காலங் ஆரோசாபேஸீதி.
Paṇḍupuṭakassa sālinoti puṭake katvā sukkhāpitassa rattasālino. Tassa kira sālino vappakālato paṭṭhāya ayaṃ parihāro – kedārā suparikammakatā honti, tattha bījāni patiṭṭhāpetvā gandhodakena siñciṃsu, vappakāle vitānaṃ viya upari vatthakilañjaṃ bandhitvā paripakkakāle vīhisīsāni chinditvā muṭṭhimatte puṭake katvā yottabaddhe vehāsaṃyeva sukkhāpetvā gandhacuṇṇāni attharitvā koṭṭhakesu pūretvā tatiye vasse vivariṃsu. Evaṃ tivassaṃ parivutthassa sugandharattasālino apagatakāḷake suparisuddhe taṇḍule gahetvā khajjakavikatimpi bhattampi paṭiyādiyiṃsu. Taṃ sandhāya vuttaṃ paṇītaṃ khādanīyaṃ bhojanīyaṃ…pe… kālaṃ ārocāpesīti.
288. அதி⁴வுட்டோ² மேதி கிங் ஸந்தா⁴ய வத³தி? வேக³ளிங்க³தோ நிக்க²மனகாலே க⁴டிகாரோ அத்தனோ ஸந்திகே வஸ்ஸாவாஸங் வஸனத்தா²ய படிஞ்ஞங் அக்³க³ஹேஸி, தங் ஸந்தா⁴ய வத³தி. அஹுதே³வ அஞ்ஞத²த்தங் அஹு தோ³மனஸ்ஸந்தி தேமாஸங் தா³னங் தா³துங், த⁴ம்மஞ்ச ஸோதுங், இமினா ச நியாமேன வீஸதி பி⁴க்கு²ஸஹஸ்ஸானி படிஜக்³கி³துங் நாலத்த²ந்தி அலாப⁴ங் ஆரப்³ப⁴ சித்தஞ்ஞத²த்தங் சித்ததோ³மனஸ்ஸங் அஹோஸி, ந ததா²க³தங் ஆரப்³ப⁴. கஸ்மா? ஸோதாபன்னத்தா. ஸோ கிர புப்³பே³ ப்³ராஹ்மணப⁴த்தோ அஹோஸி. அதே²கஸ்மிங் ஸமயே பச்சந்தே குபிதே வூபஸமனத்த²ங் க³ச்ச²ந்தோ உரச்ச²த³ங் நாம தீ⁴தரமாஹ – ‘‘அம்ம அம்ஹாகங் தே³வே மா பமஜ்ஜீ’’தி. ப்³ராஹ்மணா தங் ராஜதீ⁴தரங் தி³ஸ்வா விஸஞ்ஞினோ அஹேஸுங். கே இமே சாதி வுத்தே தும்ஹாகங் பூ⁴மிதே³வாதி. பூ⁴மிதே³வா நாம ஏவரூபா ஹொந்தீதி நிட்டு²பி⁴த்வா பாஸாத³ங் அபி⁴ருஹி. ஸா ஏகதி³வஸங் வீதி²ங் ஓலோகெந்தீ டி²தா கஸ்ஸபஸ்ஸ ப⁴க³வதோ அக்³க³ஸாவகங் தி³ஸ்வா பக்கோஸாபெத்வா பிண்ட³பாதங் த³த்வா அனுமோத³னங் ஸுணமானாயேவ ஸோதாபன்னா ஹுத்வா ‘‘அஞ்ஞேபி பி⁴க்கூ² அத்தீ²’’தி புச்சி²த்வா ‘‘ஸத்தா² வீஸதியா பி⁴க்கு²ஸஹஸ்ஸேஹி ஸத்³தி⁴ங் இஸிபதனே வஸதீ’’தி ச ஸுத்வா நிமந்தெத்வா தா³னங் அதா³ஸி.
288.Adhivuṭṭho meti kiṃ sandhāya vadati? Vegaḷiṅgato nikkhamanakāle ghaṭikāro attano santike vassāvāsaṃ vasanatthāya paṭiññaṃ aggahesi, taṃ sandhāya vadati. Ahudeva aññathattaṃ ahu domanassanti temāsaṃ dānaṃ dātuṃ, dhammañca sotuṃ, iminā ca niyāmena vīsati bhikkhusahassāni paṭijaggituṃ nālatthanti alābhaṃ ārabbha cittaññathattaṃ cittadomanassaṃ ahosi, na tathāgataṃ ārabbha. Kasmā? Sotāpannattā. So kira pubbe brāhmaṇabhatto ahosi. Athekasmiṃ samaye paccante kupite vūpasamanatthaṃ gacchanto uracchadaṃ nāma dhītaramāha – ‘‘amma amhākaṃ deve mā pamajjī’’ti. Brāhmaṇā taṃ rājadhītaraṃ disvā visaññino ahesuṃ. Ke ime cāti vutte tumhākaṃ bhūmidevāti. Bhūmidevā nāma evarūpā hontīti niṭṭhubhitvā pāsādaṃ abhiruhi. Sā ekadivasaṃ vīthiṃ olokentī ṭhitā kassapassa bhagavato aggasāvakaṃ disvā pakkosāpetvā piṇḍapātaṃ datvā anumodanaṃ suṇamānāyeva sotāpannā hutvā ‘‘aññepi bhikkhū atthī’’ti pucchitvā ‘‘satthā vīsatiyā bhikkhusahassehi saddhiṃ isipatane vasatī’’ti ca sutvā nimantetvā dānaṃ adāsi.
ராஜா பச்சந்தங் வூபஸமெத்வா ஆக³தோ. அத² நங் பட²மதரமேவ ப்³ராஹ்மணா ஆக³ந்த்வா தீ⁴து அவண்ணங் வத்வா பரிபி⁴ந்தி³ங்ஸு. ராஜா பன தீ⁴து ஜாதகாலேயேவ வரங் அதா³ஸி. தஸ்ஸா ‘‘ஸத்த தி³வஸானி ரஜ்ஜங் தா³தப்³ப³’’ந்தி வரங் க³ண்ஹிங்ஸு. அத²ஸ்ஸா ராஜா ஸத்த தி³வஸானி ரஜ்ஜங் நிய்யாதேஸி. ஸா ஸத்தா²ரங் போ⁴ஜயமானா ராஜானங் பக்கோஸாபெத்வா ப³ஹிஸாணியங் நிஸீதா³பேஸி. ராஜா ஸத்து² அனுமோத³னங் ஸுத்வாவ ஸோதாபன்னோ ஜாதோ. ஸோதாபன்னஸ்ஸ ச நாம ததா²க³தங் ஆரப்³ப⁴ ஆகா⁴தோ நத்தி². தேன வுத்தங் – ‘‘ந ததா²க³தங் ஆரப்³பா⁴’’தி.
Rājā paccantaṃ vūpasametvā āgato. Atha naṃ paṭhamatarameva brāhmaṇā āgantvā dhītu avaṇṇaṃ vatvā paribhindiṃsu. Rājā pana dhītu jātakāleyeva varaṃ adāsi. Tassā ‘‘satta divasāni rajjaṃ dātabba’’nti varaṃ gaṇhiṃsu. Athassā rājā satta divasāni rajjaṃ niyyātesi. Sā satthāraṃ bhojayamānā rājānaṃ pakkosāpetvā bahisāṇiyaṃ nisīdāpesi. Rājā satthu anumodanaṃ sutvāva sotāpanno jāto. Sotāpannassa ca nāma tathāgataṃ ārabbha āghāto natthi. Tena vuttaṃ – ‘‘na tathāgataṃ ārabbhā’’ti.
யங் இச்ச²தி தங் ஹரதூதி ஸோ கிர பா⁴ஜனானி பசித்வா கயவிக்கயங் ந கரோதி, ஏவங் பன வத்வா தா³ருத்தா²ய வா மத்திகத்தா²ய வா பலாலத்தா²ய வா அரஞ்ஞங் க³ச்ச²தி. மஹாஜனா ‘‘க⁴டிகாரேன பா⁴ஜனானி பக்கானீ’’தி ஸுத்வா பரிஸுத்³த⁴தண்டு³லலோணத³தி⁴தேலபா²ணிதாதீ³னி க³ஹெத்வா ஆக³ச்ச²ந்தி. ஸசே பா⁴ஜனங் மஹக்³க⁴ங் ஹோதி, மூலங் அப்பங், யங் வா தங் வா த³த்வா க³ண்ஹாமாதி தங் ந க³ண்ஹந்தி. த⁴ம்மிகோ வாணிஜோ மாதாபிதரோ படிஜக்³க³தி, ஸம்மாஸம்பு³த்³த⁴ங் உபட்ட²ஹதி, ப³ஹு நோ அகுஸலங் ப⁴விஸ்ஸதீதி புன க³ந்த்வா மூலங் ஆஹரந்தி. ஸசே பன பா⁴ஜனங் அப்பக்³க⁴ங் ஹோதி, ஆப⁴தங் மூலங் ப³ஹு, த⁴ம்மிகோ வாணிஜோ, அம்ஹாகங் புஞ்ஞங் ப⁴விஸ்ஸதீதி யதா²ப⁴தங் க⁴ரஸாமிகா விய ஸாது⁴கங் படிஸாமெத்வா க³ச்ச²ந்தி. ஏவங்கு³ணோ பன கஸ்மா ந பப்³ப³ஜதீதி. ரஞ்ஞோ வசனபத²ங் பச்சி²ந்த³ந்தோ அந்தே⁴ ஜிண்ணே மாதாபிதரோ போஸேதீதி ஆஹ.
Yaṃ icchati taṃ haratūti so kira bhājanāni pacitvā kayavikkayaṃ na karoti, evaṃ pana vatvā dārutthāya vā mattikatthāya vā palālatthāya vā araññaṃ gacchati. Mahājanā ‘‘ghaṭikārena bhājanāni pakkānī’’ti sutvā parisuddhataṇḍulaloṇadadhitelaphāṇitādīni gahetvā āgacchanti. Sace bhājanaṃ mahagghaṃ hoti, mūlaṃ appaṃ, yaṃ vā taṃ vā datvā gaṇhāmāti taṃ na gaṇhanti. Dhammiko vāṇijo mātāpitaro paṭijaggati, sammāsambuddhaṃ upaṭṭhahati, bahu no akusalaṃ bhavissatīti puna gantvā mūlaṃ āharanti. Sace pana bhājanaṃ appagghaṃ hoti, ābhataṃ mūlaṃ bahu, dhammiko vāṇijo, amhākaṃ puññaṃ bhavissatīti yathābhataṃ gharasāmikā viya sādhukaṃ paṭisāmetvā gacchanti. Evaṃguṇo pana kasmā na pabbajatīti. Rañño vacanapathaṃ pacchindanto andhe jiṇṇe mātāpitaro posetīti āha.
289. கோ நு கோ²தி குஹிங் நு கோ². கும்பி⁴யாதி உக்க²லிதோ. பரியோகா³தி ஸூபபா⁴ஜனதோ. பரிபு⁴ஞ்ஜாதி பு⁴ஞ்ஜ. கஸ்மா பனேதே ஏவங் வத³ந்தி? க⁴டிகாரோ கிர ப⁴த்தங் பசித்வா ஸூபங் ஸம்பாதெ³த்வா மாதாபிதரோ போ⁴ஜெத்வா ஸயம்பி பு⁴ஞ்ஜித்வா ப⁴க³வதோ வட்³ட⁴மானகங் ப⁴த்தஸூபங் பட்ட²பெத்வா ஆஸனங் பஞ்ஞபெத்வா ஆதா⁴ரகங் உபட்ட²பெத்வா உத³கங் பச்சுபட்ட²பெத்வா மாதாபிதூனங் ஸஞ்ஞங் த³த்வா அரஞ்ஞங் க³ச்ச²தி. தஸ்மா ஏவங் வத³ந்தி. அபி⁴விஸ்ஸத்தோ²தி அதிவிஸ்ஸத்தோ². பீதிஸுக²ங் ந விஜஹதீதி ந நிரந்தரங் விஜஹதி, அத² கோ² ரத்திபா⁴கே³ வா தி³வஸபா⁴கே³ வா கா³மே வா அரஞ்ஞே வா யஸ்மிங் யஸ்மிங் க²ணே – ‘‘ஸதே³வகே நாம லோகே அக்³க³புக்³க³லோ மய்ஹங் கே³ஹங் பவிஸித்வா ஸஹத்தே²ன ஆமிஸங் க³ஹெத்வா பரிபு⁴ஞ்ஜதி, லாபா⁴ வத மே’’தி அனுஸ்ஸரதி, தஸ்மிங் தஸ்மிங் க²ணே பஞ்சவண்ணா பீதி உப்பஜ்ஜதி. தங் ஸந்தா⁴ய ஏவங் வுத்தங்.
289.Ko nu khoti kuhiṃ nu kho. Kumbhiyāti ukkhalito. Pariyogāti sūpabhājanato. Paribhuñjāti bhuñja. Kasmā panete evaṃ vadanti? Ghaṭikāro kira bhattaṃ pacitvā sūpaṃ sampādetvā mātāpitaro bhojetvā sayampi bhuñjitvā bhagavato vaḍḍhamānakaṃ bhattasūpaṃ paṭṭhapetvā āsanaṃ paññapetvā ādhārakaṃ upaṭṭhapetvā udakaṃ paccupaṭṭhapetvā mātāpitūnaṃ saññaṃ datvā araññaṃ gacchati. Tasmā evaṃ vadanti. Abhivissatthoti ativissattho. Pītisukhaṃna vijahatīti na nirantaraṃ vijahati, atha kho rattibhāge vā divasabhāge vā gāme vā araññe vā yasmiṃ yasmiṃ khaṇe – ‘‘sadevake nāma loke aggapuggalo mayhaṃ gehaṃ pavisitvā sahatthena āmisaṃ gahetvā paribhuñjati, lābhā vata me’’ti anussarati, tasmiṃ tasmiṃ khaṇe pañcavaṇṇā pīti uppajjati. Taṃ sandhāya evaṃ vuttaṃ.
290. களோபியாதி பச்சி²தோ. கிங் பன ப⁴க³வா ஏவமகாஸீதி. பச்சயோ த⁴ம்மிகோ, பி⁴க்கூ²னங் பத்தே ப⁴த்தஸதி³ஸோ, தஸ்மா ஏவமகாஸி. ஸிக்கா²பத³பஞ்ஞத்திபி ச ஸாவகானங்யேவ ஹோதி, பு³த்³தா⁴னங் ஸிக்கா²பத³வேலா நாம நத்தி². யதா² ஹி ரஞ்ஞோ உய்யானே புப்ப²ப²லானி ஹொந்தி, அஞ்ஞேஸங் தானி க³ண்ஹந்தானங் நிக்³க³ஹங் கரொந்தி, ராஜா யதா²ருசியா பரிபு⁴ஞ்ஜதி, ஏவங்ஸம்பத³மேதங். பரஸமுத்³த³வாஸீதே²ரா பன ‘‘தே³வதா கிர படிக்³க³ஹெத்வா அத³ங்ஸூ’’தி வத³ந்தி.
290.Kaḷopiyāti pacchito. Kiṃ pana bhagavā evamakāsīti. Paccayo dhammiko, bhikkhūnaṃ patte bhattasadiso, tasmā evamakāsi. Sikkhāpadapaññattipi ca sāvakānaṃyeva hoti, buddhānaṃ sikkhāpadavelā nāma natthi. Yathā hi rañño uyyāne pupphaphalāni honti, aññesaṃ tāni gaṇhantānaṃ niggahaṃ karonti, rājā yathāruciyā paribhuñjati, evaṃsampadametaṃ. Parasamuddavāsītherā pana ‘‘devatā kira paṭiggahetvā adaṃsū’’ti vadanti.
291. ஹரத², ப⁴ந்தே, ஹரத² ப⁴த்³ரமுகா²தி அம்ஹாகங் புத்தோ ‘‘குஹிங் க³தோஸீ’’தி வுத்தே – ‘‘த³ஸப³லஸ்ஸ ஸந்திக’’ந்தி வத³தி, குஹிங் நு கோ² க³ச்ச²தி, ஸத்து² வஸனட்டா²னஸ்ஸ ஓவஸ்ஸகபா⁴வம்பி ந ஜானாதீதி புத்தே அபராத⁴ஸஞ்ஞினோ க³ஹணே துட்ட²சித்தா ஏவமாஹங்ஸு.
291.Haratha, bhante, haratha bhadramukhāti amhākaṃ putto ‘‘kuhiṃ gatosī’’ti vutte – ‘‘dasabalassa santika’’nti vadati, kuhiṃ nu kho gacchati, satthu vasanaṭṭhānassa ovassakabhāvampi na jānātīti putte aparādhasaññino gahaṇe tuṭṭhacittā evamāhaṃsu.
தேமாஸங் ஆகாஸச்ச²த³னங் அட்டா²ஸீதி ப⁴க³வா கிர சதுன்னங் வஸ்ஸிகானங் மாஸானங் ஏகங் மாஸங் அதிக்கமித்வா திணங் ஆஹராபேஸி, தஸ்மா ஏவமாஹ. அயங் பனெத்த² பத³த்தோ² – ஆகாஸங் ச²த³னமஸ்ஸாதி ஆகாஸச்ச²த³னங். ந தே³வோதிவஸ்ஸீதி கேவலங் நாதிவஸ்ஸி, யதா² பனெத்த² பகதியா ச நிப்³ப³கோஸஸ்ஸ உத³கபாதட்டா²னப்³ப⁴ந்தரே ஏகம்பி உத³கபி³ந்து³ நாதிவஸ்ஸி, ஏவங் க⁴னச²த³னகே³ஹப்³ப⁴ந்தரே விய ந வாதாதபாபி ஆபா³த⁴ங் அகங்ஸு, பகதியா உதுப²ரணமேவ அஹோஸி. அபரபா⁴கே³ தஸ்மிங் நிக³மே ச²ட்³டி³தேபி தங் டா²னங் அனோவஸ்ஸகமேவ அஹோஸி. மனுஸ்ஸா கம்மங் கரொந்தா தே³வே வஸ்ஸந்தே தத்த² ஸாடகே ட²பெத்வா கம்மங் கரொந்தி. யாவ கப்புட்டா²னா தங் டா²னங் தாதி³ஸமேவ ப⁴விஸ்ஸதி. தஞ்ச கோ² பன ந ததா²க³தஸ்ஸ இத்³தா⁴னுபா⁴வேன, தேஸங்யேவ பன கு³ணஸம்பத்தியா. தேஸஞ்ஹி – ‘‘ஸம்மாஸம்பு³த்³தோ⁴ கத்த² ந லபெ⁴ய்ய, அம்ஹாகங் நாம த்³வின்னங் அந்த⁴கானங் நிவேஸனங் உத்திணங் காரேஸீ’’தி ந தப்பச்சயா தோ³மனஸ்ஸங் உத³பாதி³ – ‘‘ஸதே³வகே லோகே அக்³க³புக்³க³லோ அம்ஹாகங் நிவேஸனா திணங் ஆஹராபெத்வா க³ந்த⁴குடிங் சா²தா³பேஸீ’’தி பன தேஸங் அனப்பகங் ப³லவஸோமனஸ்ஸங் உத³பாதி³. இதி தேஸங்யேவ கு³ணஸம்பத்தியா இத³ங் பாடிஹாரியங் ஜாதந்தி வேதி³தப்³ப³ங்.
Temāsaṃ ākāsacchadanaṃ aṭṭhāsīti bhagavā kira catunnaṃ vassikānaṃ māsānaṃ ekaṃ māsaṃ atikkamitvā tiṇaṃ āharāpesi, tasmā evamāha. Ayaṃ panettha padattho – ākāsaṃ chadanamassāti ākāsacchadanaṃ. Na devotivassīti kevalaṃ nātivassi, yathā panettha pakatiyā ca nibbakosassa udakapātaṭṭhānabbhantare ekampi udakabindu nātivassi, evaṃ ghanachadanagehabbhantare viya na vātātapāpi ābādhaṃ akaṃsu, pakatiyā utupharaṇameva ahosi. Aparabhāge tasmiṃ nigame chaḍḍitepi taṃ ṭhānaṃ anovassakameva ahosi. Manussā kammaṃ karontā deve vassante tattha sāṭake ṭhapetvā kammaṃ karonti. Yāva kappuṭṭhānā taṃ ṭhānaṃ tādisameva bhavissati. Tañca kho pana na tathāgatassa iddhānubhāvena, tesaṃyeva pana guṇasampattiyā. Tesañhi – ‘‘sammāsambuddho kattha na labheyya, amhākaṃ nāma dvinnaṃ andhakānaṃ nivesanaṃ uttiṇaṃ kāresī’’ti na tappaccayā domanassaṃ udapādi – ‘‘sadevake loke aggapuggalo amhākaṃ nivesanā tiṇaṃ āharāpetvā gandhakuṭiṃ chādāpesī’’ti pana tesaṃ anappakaṃ balavasomanassaṃ udapādi. Iti tesaṃyeva guṇasampattiyā idaṃ pāṭihāriyaṃ jātanti veditabbaṃ.
292. தண்டு³லவாஹஸதானீதி எத்த² த்³வே ஸகடானி ஏகோ வாஹோதி வேதி³தப்³போ³. தது³பியஞ்ச ஸூபெய்யந்தி ஸூபத்தா²ய தத³னுரூபங் தேலபா²ணிதாதி³ங். வீஸதிபி⁴க்கு²ஸஹஸ்ஸஸ்ஸ தேமாஸத்தா²ய ப⁴த்தங் ப⁴விஸ்ஸதீதி கிர ஸஞ்ஞாய ராஜா எத்தகங் பேஸேஸி. அலங் மே ரஞ்ஞோவ ஹோதூதி கஸ்மா படிக்கி²பி? அதி⁴க³தஅப்பிச்ச²தாய. ஏவங் கிரஸ்ஸ அஹோஸி – ‘‘நாஹங் ரஞ்ஞா தி³ட்ட²புப்³போ³, கத²ங் நு கோ² பேஸேஸீ’’தி. ததோ சிந்தேஸி – ‘‘ஸத்தா² பா³ராணஸிங் க³தோ, அத்³தா⁴ ஸோ ரஞ்ஞோ வஸ்ஸாவாஸங் யாசியமானோ மய்ஹங் படிஞ்ஞாதபா⁴வங் ஆரோசெத்வா மம கு³ணகத²ங் கதே²ஸி, கு³ணகதா²ய லத்³த⁴லாபோ⁴ பன நடேன நச்சித்வா லத்³த⁴ங் விய கா³யகேன கா³யித்வா லத்³த⁴ங் விய ச ஹோதி. கிங் மய்ஹங் இமினா, கம்மங் கத்வா உப்பன்னேன மாதாபிதூனம்பி ஸம்மாஸம்பு³த்³த⁴ஸ்ஸபி உபட்டா²னங் ஸக்கா காது’’ந்தி. ஸேஸங் ஸப்³ப³த்த² உத்தானமேவாதி.
292.Taṇḍulavāhasatānīti ettha dve sakaṭāni eko vāhoti veditabbo. Tadupiyañca sūpeyyanti sūpatthāya tadanurūpaṃ telaphāṇitādiṃ. Vīsatibhikkhusahassassa temāsatthāya bhattaṃ bhavissatīti kira saññāya rājā ettakaṃ pesesi. Alaṃ me raññova hotūti kasmā paṭikkhipi? Adhigataappicchatāya. Evaṃ kirassa ahosi – ‘‘nāhaṃ raññā diṭṭhapubbo, kathaṃ nu kho pesesī’’ti. Tato cintesi – ‘‘satthā bārāṇasiṃ gato, addhā so rañño vassāvāsaṃ yāciyamāno mayhaṃ paṭiññātabhāvaṃ ārocetvā mama guṇakathaṃ kathesi, guṇakathāya laddhalābho pana naṭena naccitvā laddhaṃ viya gāyakena gāyitvā laddhaṃ viya ca hoti. Kiṃ mayhaṃ iminā, kammaṃ katvā uppannena mātāpitūnampi sammāsambuddhassapi upaṭṭhānaṃ sakkā kātu’’nti. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
க⁴டிகாரஸுத்தவண்ணனா நிட்டி²தா.
Ghaṭikārasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. க⁴டிகாரஸுத்தங் • 1. Ghaṭikārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 1. க⁴டிகாரஸுத்தவண்ணனா • 1. Ghaṭikārasuttavaṇṇanā
