Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၀. ဂိဟိသာမီစိသုတ္တံ
10. Gihisāmīcisuttaṃ
၆၀. အထ ခော အနာထပိဏ္ဍိကော ဂဟပတိ ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နံ ခော အနာထပိဏ္ဍိကံ ဂဟပတိံ ဘဂဝာ ဧတဒဝောစ –
60. Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca –
‘‘စတူဟိ ခော, ဂဟပတိ, ဓမ္မေဟိ သမန္နာဂတော အရိယသာဝကော ဂိဟိသာမီစိပဋိပဒံ ပဋိပန္နော ဟောတိ ယသောပဋိလာဘိနိံ သဂ္ဂသံဝတ္တနိကံ။ ကတမေဟိ စတူဟိ? ဣဓ, ဂဟပတိ, အရိယသာဝကော ဘိက္ခုသင္ဃံ ပစ္စုပဋ္ဌိတော ဟောတိ စီဝရေန, ဘိက္ခုသင္ဃံ ပစ္စုပဋ္ဌိတော ဟောတိ ပိဏ္ဍပာတေန, ဘိက္ခုသင္ဃံ ပစ္စုပဋ္ဌိတော ဟောတိ သေနာသနေန , ဘိက္ခုသင္ဃံ ပစ္စုပဋ္ဌိတော ဟောတိ ဂိလာနပ္ပစ္စယဘေသဇ္ဇပရိက္ခာရေန။ ဣမေဟိ ခော, ဂဟပတိ, စတူဟိ ဓမ္မေဟိ သမန္နာဂတော အရိယသာဝကော ဂိဟိသာမီစိပဋိပဒံ ပဋိပန္နော ဟောတိ ယသောပဋိလာဘိနိံ သဂ္ဂသံဝတ္တနိက’’န္တိ။
‘‘Catūhi kho, gahapati, dhammehi samannāgato ariyasāvako gihisāmīcipaṭipadaṃ paṭipanno hoti yasopaṭilābhiniṃ saggasaṃvattanikaṃ. Katamehi catūhi? Idha, gahapati, ariyasāvako bhikkhusaṅghaṃ paccupaṭṭhito hoti cīvarena, bhikkhusaṅghaṃ paccupaṭṭhito hoti piṇḍapātena, bhikkhusaṅghaṃ paccupaṭṭhito hoti senāsanena , bhikkhusaṅghaṃ paccupaṭṭhito hoti gilānappaccayabhesajjaparikkhārena. Imehi kho, gahapati, catūhi dhammehi samannāgato ariyasāvako gihisāmīcipaṭipadaṃ paṭipanno hoti yasopaṭilābhiniṃ saggasaṃvattanika’’nti.
‘‘ဂိဟိသာမီစိပဋိပဒံ၊ ပဋိပဇ္ဇန္တိ ပဏ္ဍိတာ။
‘‘Gihisāmīcipaṭipadaṃ, paṭipajjanti paṇḍitā;
သမ္မဂ္ဂတေ သီလဝန္တေ၊ စီဝရေန ဥပဋ္ဌိတာ။
Sammaggate sīlavante, cīvarena upaṭṭhitā.
ပိဏ္ဍပာတသယနေန၊ ဂိလာနပ္ပစ္စယေန စ။
Piṇḍapātasayanena, gilānappaccayena ca;
တေသံ ဒိဝာ စ ရတ္တော စ၊ သဒာ ပုညံ ပဝဍ္ဎတိ။
Tesaṃ divā ca ratto ca, sadā puññaṃ pavaḍḍhati;
သဂ္ဂဉ္စ ကမတိဋ္ဌာနံ 1၊ ကမ္မံ ကတ္ဝာန ဘဒ္ဒက’’န္တိ။ ဒသမံ။
Saggañca kamatiṭṭhānaṃ 2, kammaṃ katvāna bhaddaka’’nti. dasamaṃ;
ပုညာဘိသန္ဒဝဂ္ဂော ပဌမော။
Puññābhisandavaggo paṭhamo.
တသ္သုဒ္ဒာနံ –
Tassuddānaṃ –
ဒ္ဝေ ပုညာဘိသန္ဒာ ဒ္ဝေ စ၊ သံဝာသာ သမဇီဝိနော။
Dve puññābhisandā dve ca, saṃvāsā samajīvino;
သုပ္ပဝာသာ သုဒတ္တော စ၊ ဘောဇနံ ဂိဟိသာမိစီတိ။
Suppavāsā sudatto ca, bhojanaṃ gihisāmicīti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. ဂိဟိသာမီစိသုတ္တဝဏ္ဏနာ • 10. Gihisāmīcisuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၇-၁၀. သုပ္ပဝာသာသုတ္တာဒိဝဏ္ဏနာ • 7-10. Suppavāsāsuttādivaṇṇanā