Library / Tipiṭaka / තිපිටක • Tipiṭaka / පෙතවත්ථුපාළි • Petavatthupāḷi |
8. ගොණපෙතවත්ථු
8. Goṇapetavatthu
46.
46.
‘‘කිං නු උම්මත්තරූපොව, ලායිත්වා හරිතං තිණං;
‘‘Kiṃ nu ummattarūpova, lāyitvā haritaṃ tiṇaṃ;
ඛාද ඛාදාති ලපසි, ගතසත්තං ජරග්ගවං.
Khāda khādāti lapasi, gatasattaṃ jaraggavaṃ.
47.
47.
‘‘න හි අන්නෙන පානෙන, මතො ගොණො සමුට්ඨහෙ;
‘‘Na hi annena pānena, mato goṇo samuṭṭhahe;
ත්වංසි බාලො ච 1 දුම්මෙධො, යථා තඤ්ඤොව දුම්මතී’’ති.
Tvaṃsi bālo ca 2 dummedho, yathā taññova dummatī’’ti.
48.
48.
‘‘ඉමෙ පාදා ඉදං සීසං, අයං කායො සවාලධි;
‘‘Ime pādā idaṃ sīsaṃ, ayaṃ kāyo savāladhi;
නෙත්තා තථෙව තිට්ඨන්ති, අයං ගොණො සමුට්ඨහෙ.
Nettā tatheva tiṭṭhanti, ayaṃ goṇo samuṭṭhahe.
49.
49.
‘‘නාය්යකස්ස හත්ථපාදා, කායො සීසඤ්ච දිස්සති;
‘‘Nāyyakassa hatthapādā, kāyo sīsañca dissati;
රුදං මත්තිකථූපස්මිං, නනු ත්වඤ්ඤෙව දුම්මතී’’ති.
Rudaṃ mattikathūpasmiṃ, nanu tvaññeva dummatī’’ti.
50.
50.
‘‘ආදිත්තං වත මං සන්තං, ඝතසිත්තංව පාවකං;
‘‘Ādittaṃ vata maṃ santaṃ, ghatasittaṃva pāvakaṃ;
වාරිනා විය ඔසිඤ්චං, සබ්බං නිබ්බාපයෙ දරං.
Vārinā viya osiñcaṃ, sabbaṃ nibbāpaye daraṃ.
51.
51.
යො මෙ සොකපරෙතස්ස, පිතුසොකං අපානුදි.
Yo me sokaparetassa, pitusokaṃ apānudi.
52.
52.
‘‘ස්වාහං අබ්බූළ්හසල්ලොස්මි, සීතිභූතොස්මි නිබ්බුතො;
‘‘Svāhaṃ abbūḷhasallosmi, sītibhūtosmi nibbuto;
න සොචාමි න රොදාමි, තව සුත්වාන මාණව’.
Na socāmi na rodāmi, tava sutvāna māṇava’.
53.
53.
එවං කරොන්ති සප්පඤ්ඤා, යෙ හොන්ති අනුකම්පකා;
Evaṃ karonti sappaññā, ye honti anukampakā;
විනිවත්තයන්ති සොකම්හා, සුජාතො පිතරං යථාති.
Vinivattayanti sokamhā, sujāto pitaraṃ yathāti.
ගොණපෙතවත්ථු අට්ඨමං.
Goṇapetavatthu aṭṭhamaṃ.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / පෙතවත්ථු-අට්ඨකථා • Petavatthu-aṭṭhakathā / 8. ගොණපෙතවත්ථුවණ්ණනා • 8. Goṇapetavatthuvaṇṇanā