| Library / Tipiṭaka / ತಿಪಿಟಕ • Tipiṭaka / ಸುತ್ತನಿಪಾತಪಾಳಿ • Suttanipātapāḷi |
೨. ಗುಹಟ್ಠಕಸುತ್ತಂ
2. Guhaṭṭhakasuttaṃ
೭೭೮.
778.
ಸತ್ತೋ ಗುಹಾಯಂ ಬಹುನಾಭಿಛನ್ನೋ, ತಿಟ್ಠಂ ನರೋ ಮೋಹನಸ್ಮಿಂ ಪಗಾಳ್ಹೋ।
Satto guhāyaṃ bahunābhichanno, tiṭṭhaṃ naro mohanasmiṃ pagāḷho;
ದೂರೇ ವಿವೇಕಾ ಹಿ ತಥಾವಿಧೋ ಸೋ, ಕಾಮಾ ಹಿ ಲೋಕೇ ನ ಹಿ ಸುಪ್ಪಹಾಯಾ॥
Dūre vivekā hi tathāvidho so, kāmā hi loke na hi suppahāyā.
೭೭೯.
779.
ಇಚ್ಛಾನಿದಾನಾ ಭವಸಾತಬದ್ಧಾ, ತೇ ದುಪ್ಪಮುಞ್ಚಾ ನ ಹಿ ಅಞ್ಞಮೋಕ್ಖಾ।
Icchānidānā bhavasātabaddhā, te duppamuñcā na hi aññamokkhā;
ಪಚ್ಛಾ ಪುರೇ ವಾಪಿ ಅಪೇಕ್ಖಮಾನಾ, ಇಮೇವ ಕಾಮೇ ಪುರಿಮೇವ ಜಪ್ಪಂ॥
Pacchā pure vāpi apekkhamānā, imeva kāme purimeva jappaṃ.
೭೮೦.
780.
ಕಾಮೇಸು ಗಿದ್ಧಾ ಪಸುತಾ ಪಮೂಳ್ಹಾ, ಅವದಾನಿಯಾ ತೇ ವಿಸಮೇ ನಿವಿಟ್ಠಾ।
Kāmesu giddhā pasutā pamūḷhā, avadāniyā te visame niviṭṭhā;
ದುಕ್ಖೂಪನೀತಾ ಪರಿದೇವಯನ್ತಿ, ಕಿಂಸೂ ಭವಿಸ್ಸಾಮ ಇತೋ ಚುತಾಸೇ॥
Dukkhūpanītā paridevayanti, kiṃsū bhavissāma ito cutāse.
೭೮೧.
781.
ತಸ್ಮಾ ಹಿ ಸಿಕ್ಖೇಥ ಇಧೇವ ಜನ್ತು, ಯಂ ಕಿಞ್ಚಿ ಜಞ್ಞಾ ವಿಸಮನ್ತಿ ಲೋಕೇ।
Tasmā hi sikkhetha idheva jantu, yaṃ kiñci jaññā visamanti loke;
ನ ತಸ್ಸ ಹೇತೂ ವಿಸಮಂ ಚರೇಯ್ಯ, ಅಪ್ಪಞ್ಹಿದಂ ಜೀವಿತಮಾಹು ಧೀರಾ॥
Na tassa hetū visamaṃ careyya, appañhidaṃ jīvitamāhu dhīrā.
೭೮೨.
782.
ಪಸ್ಸಾಮಿ ಲೋಕೇ ಪರಿಫನ್ದಮಾನಂ, ಪಜಂ ಇಮಂ ತಣ್ಹಗತಂ ಭವೇಸು।
Passāmi loke pariphandamānaṃ, pajaṃ imaṃ taṇhagataṃ bhavesu;
ಹೀನಾ ನರಾ ಮಚ್ಚುಮುಖೇ ಲಪನ್ತಿ, ಅವೀತತಣ್ಹಾಸೇ ಭವಾಭವೇಸು॥
Hīnā narā maccumukhe lapanti, avītataṇhāse bhavābhavesu.
೭೮೩.
783.
ಮಮಾಯಿತೇ ಪಸ್ಸಥ ಫನ್ದಮಾನೇ, ಮಚ್ಛೇವ ಅಪ್ಪೋದಕೇ ಖೀಣಸೋತೇ।
Mamāyite passatha phandamāne, maccheva appodake khīṇasote;
ಏತಮ್ಪಿ ದಿಸ್ವಾ ಅಮಮೋ ಚರೇಯ್ಯ, ಭವೇಸು ಆಸತ್ತಿಮಕುಬ್ಬಮಾನೋ॥
Etampi disvā amamo careyya, bhavesu āsattimakubbamāno.
೭೮೪.
784.
ಉಭೋಸು ಅನ್ತೇಸು ವಿನೇಯ್ಯ ಛನ್ದಂ, ಫಸ್ಸಂ ಪರಿಞ್ಞಾಯ ಅನಾನುಗಿದ್ಧೋ।
Ubhosu antesu vineyya chandaṃ, phassaṃ pariññāya anānugiddho;
ಯದತ್ತಗರಹೀ ತದಕುಬ್ಬಮಾನೋ, ನ ಲಿಪ್ಪತೀ 1 ದಿಟ್ಠಸುತೇಸು ಧೀರೋ॥
Yadattagarahī tadakubbamāno, na lippatī 2 diṭṭhasutesu dhīro.
೭೮೫.
785.
ಸಞ್ಞಂ ಪರಿಞ್ಞಾ ವಿತರೇಯ್ಯ ಓಘಂ, ಪರಿಗ್ಗಹೇಸು ಮುನಿ ನೋಪಲಿತ್ತೋ।
Saññaṃ pariññā vitareyya oghaṃ, pariggahesu muni nopalitto;
ಅಬ್ಬೂಳ್ಹಸಲ್ಲೋ ಚರಮಪ್ಪಮತ್ತೋ, ನಾಸೀಸತೀ 3 ಲೋಕಮಿಮಂ ಪರಞ್ಚಾತಿ॥
Abbūḷhasallo caramappamatto, nāsīsatī 4 lokamimaṃ parañcāti.
ಗುಹಟ್ಠಕಸುತ್ತಂ ದುತಿಯಂ ನಿಟ್ಠಿತಂ।
Guhaṭṭhakasuttaṃ dutiyaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಸುತ್ತನಿಪಾತ-ಅಟ್ಠಕಥಾ • Suttanipāta-aṭṭhakathā / ೨. ಗುಹಟ್ಠಕಸುತ್ತವಣ್ಣನಾ • 2. Guhaṭṭhakasuttavaṇṇanā
