| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
2. හත්‌ථිරාජවණ්‌ණසුත්‌තවණ්‌ණනා
2. Hatthirājavaṇṇasuttavaṇṇanā
138. දුතියෙ රත්‌තන්‌ධකාරතිමිසායන්‌ති රත්‌තිං අන්‌ධභාවකාරකෙ මහාතමෙ චතුරඞ්‌ගෙ තමසි. අබ්‌භොකාසෙ නිසින්‌නො හොතීති ගන්‌ධකුටිතො නික්‌ඛමිත්‌වා චඞ්‌කමනකොටියං පාසාණඵලකෙ මහාචීවරං සීසෙ ඨපෙත්‌වා පධානං පරිග්‌ගණ්‌හමානො නිසින්‌නො හොති.
138. Dutiye rattandhakāratimisāyanti rattiṃ andhabhāvakārake mahātame caturaṅge tamasi. Abbhokāse nisinno hotīti gandhakuṭito nikkhamitvā caṅkamanakoṭiyaṃ pāsāṇaphalake mahācīvaraṃ sīse ṭhapetvā padhānaṃ pariggaṇhamāno nisinno hoti.
නනු ච තථාගතස්‌ස අභාවිතො වා මග්‌ගො, අප්‌පහීනා වා කිලෙසා, අප්‌පටිවිද්‌ධං වා අකුප්‌පං, අසච්‌ඡිකතො වා නිරොධො නත්‌ථි, කස්‌මා එවමකාසීති? අනාගතෙ කුලපුත්‌තානං අඞ්‌කුසත්‌ථං. ‘‘අනාගතෙ හි කුලපුත්‌තා මයා ගතමග්‌ගං ආවජ්‌ජිත්‌වා අබ්‌භොකාසවාසං වසිතබ්‌බං මඤ්‌ඤමානා පධානකම්‌මං කරිස්‌සන්‌තී’’ති සම්‌පස්‌සමානො සත්‌ථා එවමකාසි. මහාති මහන්‌තො. අරිට්‌ඨකොති කාළකො. මණීති පාසාණො. එවමස්‌ස සීසං හොතීති එවරූපං තස්‌ස කාළවණ්‌ණං කූටාගාරප්‌පමාණං මහාපාසාණසදිසං සීසං හොති.
Nanu ca tathāgatassa abhāvito vā maggo, appahīnā vā kilesā, appaṭividdhaṃ vā akuppaṃ, asacchikato vā nirodho natthi, kasmā evamakāsīti? Anāgate kulaputtānaṃ aṅkusatthaṃ. ‘‘Anāgate hi kulaputtā mayā gatamaggaṃ āvajjitvā abbhokāsavāsaṃ vasitabbaṃ maññamānā padhānakammaṃ karissantī’’ti sampassamāno satthā evamakāsi. Mahāti mahanto. Ariṭṭhakoti kāḷako. Maṇīti pāsāṇo. Evamassa sīsaṃ hotīti evarūpaṃ tassa kāḷavaṇṇaṃ kūṭāgārappamāṇaṃ mahāpāsāṇasadisaṃ sīsaṃ hoti.
සුභාසුභන්‌ති දීඝමද්‌ධානං සංසරන්‌තො සුන්‌දරාසුන්‌දරං වණ්‌ණං කත්‌වා ආගතොසීති වදති. අථ වා සංසරන්‌ති සංසරන්‌තො ආගච්‌ඡන්‌තො. දීඝමද්‌ධානන්‌ති වසවත්‌තිට්‌ඨානතො යාව උරුවෙලාය දීඝමග්‌ගං, පුරෙ බොධාය වා ඡබ්‌බස්‌සානි දුක්‌කරකාරිකසමයසඞ්‌ඛාතං දීඝකාලං. වණ්‌ණං කත්‌වා සුභාසුභන්‌ති සුන්‌දරඤ්‌ච අසුන්‌දරඤ්‌ච නානප්‌පකාරං වණ්‌ණං කත්‌වා අනෙකවාරං මම සන්‌තිකං ආගතොසීති අත්‌ථො. සො කිර වණ්‌ණො නාම නත්‌ථි, යෙන වණ්‌ණෙන මාරො විභිංසකත්‌ථාය භගවතො සන්‌තිකං න ආගතපුබ්‌බො. තෙන තං භගවා එවමාහ. අලං තෙ තෙනාති අලං තුය්‌හං එතෙන මාරවිභිංසාකාරදස්‌සනබ්‍යාපාරෙන. දුතියං.
Subhāsubhanti dīghamaddhānaṃ saṃsaranto sundarāsundaraṃ vaṇṇaṃ katvā āgatosīti vadati. Atha vā saṃsaranti saṃsaranto āgacchanto. Dīghamaddhānanti vasavattiṭṭhānato yāva uruvelāya dīghamaggaṃ, pure bodhāya vā chabbassāni dukkarakārikasamayasaṅkhātaṃ dīghakālaṃ. Vaṇṇaṃ katvā subhāsubhanti sundarañca asundarañca nānappakāraṃ vaṇṇaṃ katvā anekavāraṃ mama santikaṃ āgatosīti attho. So kira vaṇṇo nāma natthi, yena vaṇṇena māro vibhiṃsakatthāya bhagavato santikaṃ na āgatapubbo. Tena taṃ bhagavā evamāha. Alaṃ te tenāti alaṃ tuyhaṃ etena māravibhiṃsākāradassanabyāpārena. Dutiyaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 2. හත්‌ථිරාජවණ්‌ණසුත්‌තං • 2. Hatthirājavaṇṇasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. හත්‌ථිරාජවණ්‌ණසුත්‌තවණ්‌ණනා • 2. Hatthirājavaṇṇasuttavaṇṇanā
