| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၇. မဟာဝဂ္ဂော
7. Mahāvaggo
၁. ဟိရီဩတ္တပ္ပသုတ္တံ
1. Hirīottappasuttaṃ
၆၅. 1 ‘‘ဟိရောတ္တပ္ပေ , ဘိက္ခဝေ, အသတိ ဟိရောတ္တပ္ပဝိပန္နသ္သ ဟတူပနိသော ဟောတိ ဣန္ဒ္ရိယသံဝရော; ဣန္ဒ္ရိယသံဝရေ အသတိ ဣန္ဒ္ရိယသံဝရဝိပန္နသ္သ ဟတူပနိသံ ဟောတိ သီလံ; သီလေ အသတိ သီလဝိပန္နသ္သ ဟတူပနိသော ဟောတိ သမ္မာသမာဓိ; သမ္မာသမာဓိမ္ဟိ အသတိ သမ္မာသမာဓိဝိပန္နသ္သ ဟတူပနိသံ ဟောတိ ယထာဘူတဉာဏဒသ္သနံ; ယထာဘူတဉာဏဒသ္သနေ အသတိ ယထာဘူတဉာဏဒသ္သနဝိပန္နသ္သ ဟတူပနိသော ဟောတိ နိဗ္ဗိဒာဝိရာဂော; နိဗ္ဗိဒာဝိရာဂေ အသတိ နိဗ္ဗိဒာဝိရာဂဝိပန္နသ္သ ဟတူပနိသံ ဟောတိ ဝိမုတ္တိဉာဏဒသ္သနံ။ သေယ္ယထာပိ, ဘိက္ခဝေ, ရုက္ခော သာခာပလာသဝိပန္နော။ တသ္သ ပပဋိကာပိ န ပာရိပူရိံ ဂစ္ဆတိ, တစောပိ ဖေဂ္ဂုပိ သာရောပိ န ပာရိပူရိံ ဂစ္ဆတိ။ ဧဝမေဝံ ခော, ဘိက္ခဝေ, ဟိရောတ္တပ္ပေ အသတိ ဟိရောတ္တပ္ပဝိပန္နသ္သ ဟတူပနိသော ဟောတိ ဣန္ဒ္ရိယသံဝရော; ဣန္ဒ္ရိယသံဝရေ အသတိ ဣန္ဒ္ရိယသံဝရဝိပန္နသ္သ ဟတူပနိသံ ဟောတိ သီလံ; သီလေ အသတိ သီလဝိပန္နသ္သ ဟတူပနိသော ဟောတိ သမ္မာသမာဓိ; သမ္မာသမာဓိမ္ဟိ အသတိ သမ္မာသမာဓိဝိပန္နသ္သ ဟတူပနိသံ ဟောတိ ယထာဘူတဉာဏဒသ္သနံ; ယထာဘူတဉာဏဒသ္သနေ အသတိ ယထာဘူတဉာဏဒသ္သနဝိပန္နသ္သ ဟတူပနိသော ဟောတိ နိဗ္ဗိဒာဝိရာဂော; နိဗ္ဗိဒာဝိရာဂေ အသတိ နိဗ္ဗိဒာဝိရာဂဝိပန္နသ္သ ဟတူပနိသံ ဟောတိ ဝိမုတ္တိဉာဏဒသ္သနံ။
65.2 ‘‘Hirottappe , bhikkhave, asati hirottappavipannassa hatūpaniso hoti indriyasaṃvaro; indriyasaṃvare asati indriyasaṃvaravipannassa hatūpanisaṃ hoti sīlaṃ; sīle asati sīlavipannassa hatūpaniso hoti sammāsamādhi; sammāsamādhimhi asati sammāsamādhivipannassa hatūpanisaṃ hoti yathābhūtañāṇadassanaṃ; yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo; nibbidāvirāge asati nibbidāvirāgavipannassa hatūpanisaṃ hoti vimuttiñāṇadassanaṃ. Seyyathāpi, bhikkhave, rukkho sākhāpalāsavipanno. Tassa papaṭikāpi na pāripūriṃ gacchati, tacopi pheggupi sāropi na pāripūriṃ gacchati. Evamevaṃ kho, bhikkhave, hirottappe asati hirottappavipannassa hatūpaniso hoti indriyasaṃvaro; indriyasaṃvare asati indriyasaṃvaravipannassa hatūpanisaṃ hoti sīlaṃ; sīle asati sīlavipannassa hatūpaniso hoti sammāsamādhi; sammāsamādhimhi asati sammāsamādhivipannassa hatūpanisaṃ hoti yathābhūtañāṇadassanaṃ; yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo; nibbidāvirāge asati nibbidāvirāgavipannassa hatūpanisaṃ hoti vimuttiñāṇadassanaṃ.
‘‘ဟိရောတ္တပ္ပေ, ဘိက္ခဝေ, သတိ ဟိရောတ္တပ္ပသမ္ပန္နသ္သ ဥပနိသသမ္ပန္နော ဟောတိ ဣန္ဒ္ရိယသံဝရော; ဣန္ဒ္ရိယသံဝရေ သတိ ဣန္ဒ္ရိယသံဝရသမ္ပန္နသ္သ ဥပနိသသမ္ပန္နံ ဟောတိ သီလံ; သီလေ သတိ သီလသမ္ပန္နသ္သ ဥပနိသသမ္ပန္နော ဟောတိ သမ္မာသမာဓိ; သမ္မာသမာဓိမ္ဟိ သတိ သမ္မာသမာဓိသမ္ပန္နသ္သ ဥပနိသသမ္ပန္နံ ဟောတိ ယထာဘူတဉာဏဒသ္သနံ; ယထာဘူတဉာဏဒသ္သနေ သတိ ယထာဘူတဉာဏဒသ္သနသမ္ပန္နသ္သ ဥပနိသသမ္ပန္နော ဟောတိ နိဗ္ဗိဒာဝိရာဂော; နိဗ္ဗိဒာဝိရာဂေ သတိ နိဗ္ဗိဒာဝိရာဂသမ္ပန္နသ္သ ဥပနိသသမ္ပန္နံ ဟောတိ ဝိမုတ္တိဉာဏဒသ္သနံ။ သေယ္ယထာပိ, ဘိက္ခဝေ, ရုက္ခော သာခာပလာသသမ္ပန္နော။ တသ္သ ပပဋိကာပိ ပာရိပူရိံ ဂစ္ဆတိ, တစောပိ ဖေဂ္ဂုပိ သာရောပိ ပာရိပူရိံ ဂစ္ဆတိ ။ ဧဝမေဝံ ခော, ဘိက္ခဝေ, ဟိရောတ္တပ္ပေ သတိ ဟိရောတ္တပ္ပသမ္ပန္နသ္သ ဥပနိသသမ္ပန္နော ဟောတိ။ပေ.။ ဝိမုတ္တိဉာဏဒသ္သန’’န္တိ။ ပဌမံ။
‘‘Hirottappe, bhikkhave, sati hirottappasampannassa upanisasampanno hoti indriyasaṃvaro; indriyasaṃvare sati indriyasaṃvarasampannassa upanisasampannaṃ hoti sīlaṃ; sīle sati sīlasampannassa upanisasampanno hoti sammāsamādhi; sammāsamādhimhi sati sammāsamādhisampannassa upanisasampannaṃ hoti yathābhūtañāṇadassanaṃ; yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo; nibbidāvirāge sati nibbidāvirāgasampannassa upanisasampannaṃ hoti vimuttiñāṇadassanaṃ. Seyyathāpi, bhikkhave, rukkho sākhāpalāsasampanno. Tassa papaṭikāpi pāripūriṃ gacchati, tacopi pheggupi sāropi pāripūriṃ gacchati . Evamevaṃ kho, bhikkhave, hirottappe sati hirottappasampannassa upanisasampanno hoti…pe… vimuttiñāṇadassana’’nti. Paṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁. ဟိရိဩတ္တပ္ပသုတ္တဝဏ္ဏနာ • 1. Hiriottappasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၂. ဟိရိဩတ္တပ္ပသုတ္တာဒိဝဏ္ဏနာ • 1-2. Hiriottappasuttādivaṇṇanā
